Read Falam Chin 2 SANSIARNAK 3 Bible Online

2 SANSIARNAK 3 - Falam Chin bible

2 SANSIARNAK 3

¹Siangpahrang Solomon cun BAWIPA ih Biakinn cu Jerusalem khua, a pa siangpahrang David hnenih BAWIPA a langnak Moriah Tlangmual ah sak a thok. Cuih hmun cu Jebus mi Araunah in a fang ciilnak puum ih a rak hmanmi a si ih David in a rak simsial thluh zo mi a si.

²Solomon siangpahrang a ṭuannak kum li le thla hnihnak ah Biakinn sak cu a thok.

³Siangpahrang Solomon ih a sakmi Biakinn cu pi sawmkua a sau ih pi sawmthum a kau.

⁴Biakinn hmai ih hulhliap cu Biakinn tia in pi sawmthum a kau ih pi za le sawmriat a sang. Cuih hulhliap a phar sunglam cu sui in an khuut.

⁵A laifang khaan cu sidar thing in an ṭelh ih sui in an khuut ih tuumkung le cikcin zuk an cuanter.

⁶Siangpahrang in Biakinn cu lungmankhung le Parvaim ram ihsin lei mi sui in a ceimawi.

⁷Biakinn phar pawl, innbo le luanglu pawl, le sangka pawl cu sui in a khuut. A phar ah zungthiam pawl in cherubim lem pawl an cuanter.

⁸A sungta bik khaan cu Hmun Thianghlim Bik an timi a si ih pi sawmthum a sau ih Biakinn tia in pi sawmthum a kau. Hmun Thianghlim Bik phar pawl khuutnakah sui pawng thawng sawmli le thawng nga an hmang;

⁹tlawngkhen an hmanmi cu sui in an tuah ih tlawngkhen hrangah sui pawng khat lenglo a rit. Tlunta khaan phar pawl tla sui hlir in an khuut.

¹⁰Siangpahrang in a hnaṭuantu pawl cu thir in cherubim lem pahnih a tuahter ih Hmun Thianghlim Bik ahcun a ret.

¹¹Cuih cherubim lem pawl cu sangka lam hoi in a ret hai ih artlang in an dinter. Cherubim pakhat in thla pahnih a nei ih a thla pakhat cu pi sarih le a hrek a sau; cuhrangah an thla an pharh tikah a khaan laifangah an thla cu a tong-aw ih khatlam thla in phar an dai veve; cuticun a khaan kauh lam pi sawmthum cu an thla in a dai ṭheh.

¹⁴Puanzar pakhat an tuah ih cuih puanzar cu pat phangfemte ih tah mi le mepian, sendup le a sen in buhmi a si; cuih puanzar cu cherubim lem pawl cuangin an ṭelhmi a si.

¹⁵Siangpahrang in pi sawmnga le pi hnih a saangmi dar ṭhuam pahnih a tuah ih Biakinn hmaiah a phun. Ṭhuam ih lubo cu pi sarih le a hrek veve a sang.

¹⁶Ṭhuam ziik cu ṭhi kual a peh-aw thluhmi le dar ih tuahmi taleti zakhat in an ceimawi.

¹⁷Ṭhuam pahnih cu Biakinn vung luhnak saklam le thlanglam ah an phun; thlanglamta cu Jakhin[1] an ti ih saklamta cu Boaz [2] an ti.