Read Falam Chin 2 SANSIARNAK 35 Bible Online

2 SANSIARNAK 35 - Falam Chin bible

2 SANSIARNAK 35

¹Siangpahrang Josiah in BAWIPA ih hmin thangṭhatnak ah Lantak Puai cu Jerusalem khua ah a tuah; thla hmaisa bik ni hleilinak ni ah cuih puai cu an tuah ih rannung pawl an that.

²Puithiam pawl hnenah Biakinn ih an hnaṭuan dingmi a pek ih felte ih tuahsuak dingah a forh hai.

³BAWIPA hnenih thianhlimter mi, Israel mi zirhtu Levi mi pawl tla thu a cah ih, an hnenah, “David fapa siangpahrang Solomon ih sakmi Biakinn sungah Thukam Kuang cu ret uh. Hi Thukam Kuang cu hmunkhat ihsin hmun dangah nan phur nawn lo pei ih BAWIPA nan Pathian le Amah ih minung Israel mi pawl ih hna lawnglawng nan ṭuan pei.

⁴Siangpahrang David le a fapa siangpahrang Solomon in ṭuanvo an lo pek bangtuk in Biakinn ah nan sungkhat fingfing in ṭuanvo nan lak pei.

⁵Israel mi sungah innsang pakhatkhat bom an ṭul tikah bawm theitu si ding in nan zuam pei.

⁶Nanmah in Lantak Puai hrangih tuu le me pawl cu nan that pei. Cule BAWIPA in Moses hnenih a pekmi Daan bangtuk in nan unau Israel mi pawl ih an thlun ve nak dingah nanmah cu thiangfaiter aw uhla, thawinak pekmi pawl cu timtuah uh,” tiah a ti.

⁷Siangpahrang Josiah in Lantak Puai tikcu ih misenpi pawl hrangah amah ih rannung rual pawl sung ihsin tuu le tuuno, le menote a zate ah thawng sawmthum a pek; cawcang khal thawng thum a pek.

⁸A kuthnuai bawi pawl khal in senpi pawl, puithiam pawl le Levi mi pawl hrangah an pek ve. Biakinn kiltu upa pawl: Puithiam Sang Hilkiah, Zekhariah le Jehiel in cuih puai tikcu ih thawinak pek dingah puithiam pawl hnenah tuuno le meno thawng hnih le zaruk, le cawcang zathum an pek.

⁹Levi mi hotu pawl Konaniah, Shemaiah le a unau Nethanel, Hashabiah, Jeiel le Jozabad pawl in tuuno, le meno thawng nga le cawcang zanga cu Levi mi pawl ih thawinak hrangah an pek.

¹⁰Lantak Puai hrangih ziang hmuahhmuah an tawlrel ṭheh tikah siangpahrang ih thupekmi vekin puithiam le Levi mi pawl cu an hnaṭuannak hmun ciarah an um.

¹¹Tuu le me pawl thah an si tikah Levi mi in a phaw an hawk ih a thisen cu puithiam pawl in biakṭheng ah an theh.

¹²Cule Moses Daan sung vekih mei-ur thawinak an pek theinak dingah rannung sa cu sungkhat sungkhat ciarin misenpi pawl an zem.

¹³A daan bangtuk in Lantak Puai thawinak sa cu Levi mi pawl in meisa ah an em ih thawinak thianghlim cu beel le thir beel le uhkang tumpipi in an suang ih senpi pawl hnenah zamrangte in an zem.

¹⁴Cu ṭheh hnu lawngah Levi mi pawl in anmah ih hrang le Aaron tesinfa puithiam pawl hrangah sa an zem; ziangahtile mei-ur thawinak le a thau pawl pekmi an urnak ah puithiam pawl cu zan khawthim tiang an man hrimhrim lo.

¹⁵Cun Asaf hrin hla satu pawl tla siangpahrang David ih thupekmi vekin an hnaṭuannak hmun ciarah an um. Asaf hrin pawl, Heman le siangpahrang profet Jeduthun le Biakinn kotka kiltu pawl cu an hnaṭuannak ihsin hmun dangih feh rero a ṭul lo; ziangahtile an hrangah Levi mi pawl in ziang hmuahhmuah an tawlrel sak a si.

¹⁶Curuangah siangpahrang Josiah ih thupek vekin Lantak Puai ulhnak le biakṭheng parih mei-ur thawinak pekmi pawl le cuih ni ih BAWIPA biaknak ziang hmuahhmuah cu famkim zetin an tuah thluh a si.

¹⁷Cutawkih a telmi Israel mi hmuahhmuah in Lantak Puai le Thilnu tello Sang Puai cu ni sarih sung an tuah.

¹⁸Profet Samuel san hnuah Lantak Puai cu hi vekin an tuah dah lo. Israel siangpahrang dang khal in Lantak Puai cu siangpahrang Josiah in puithiam pawl, Levi mi pawl, Judah mi, Israel mi le Jerusalem khawsungmi pawl thawn a tuahmi vek cun an tuah dah lo.

¹⁹Josiah siangpahrang a ṭuan kum hleiriat kumah hi Lantak Puai cu an tuah a si.

²⁰Siangpahrang Josiah in BAWIPA ih Biakinn hrangah hibangtuk hna a ṭuan ṭheh hnuah, Izipt siangpahrang Neko in Eufrates Tivapi kapih ummi Karkhemish ah raldo dingin a ralkap pawl thawn an pok. Cumi cu Josiah in kham a tum.

²¹Cutikah Neko in Josiah hnenah thu a cah ih, “Maw Judah siangpahrang, hi ka raldo ding mi hi i hnaihnok duh hlah, nang thawn zianghman a seng aw lo; nangmah do dingah ka ra lo. Ka ral pawl do ding lawngah ka ra ih Pathian in zamrangte ih feh dingah i fial a si. Pathian cu ka hnenah a ṭang ih Amah cu do duh hlah; na do asile a lo siatsuah sawn ding,” a ti.

²²Sikhalsehla Josiah cun a ngai lo ih a do tum thotho; curuangah theihthiam lo dingin a tuah-aw ih raldonak ah a feh. Siangpahrang Neko hmangin Pathian ih thusimmi cu a ngai duh lo ih Megiddo phairawn ah raldo dingin a feh.

²³An do awk tikah Izipt conkiang in siangpahrang Josiah cu a ngah. Cutikah a siahhlawh pa hnenah, “I tlanpi aw! Besiazet in in ngah a si,” a ti.

²⁴A rangleng ihsin an cawi ih a rangleng pahnihnak ah an ret ih Jerusalem ah an kirpi. Cutawkah a thi ih siangpahrang thlaan ah an phum. Judah mi le Jerusalem mi pawl in a thih cu an ul ih an ṭap.

²⁵Profet Jeremiah in siangpahrang Josiah hrangah ṭahhla a phuah ih an siangpahrang an ṭah tikah hla satu pawl in nunau siseh mipa siseh, cuih ṭahhla cun an ṭah ṭheu. Cutiih mithi ṭah cu Israel mi daan ah a cang ih cuih hla cu ṭahhla cabu sungah a um a si.

²⁶Josiah in BAWIPA a rinsannak, Daan a thlunzia,

²⁷a uknak hramthokin a net tiang, a thiltuahmi hmuahhmuah le amah ih thuanthu cu Israel le Judah Siangpahrang Thuanthu Cabu sungah kimtein an ngan a si.