Read Falam Chin 2 SANSIARNAK 36 Bible Online

2 SANSIARNAK 36 - Falam Chin bible

2 SANSIARNAK 36

¹Judah mi pawl in Josiah fapa Joahaz siangpahrang ah an hril ih Jerusalem khua ah hriak an culh.

²Joahaz cu Judah siangpahrang a ṭuan tikah kum kul hluanthum a ti ih Jerusalem ihsin thla thum sung a uk.

³Izipt siangpahrang Neko in a kaih ih thawngah a thlak; cule Judah mi in Neko cu ngun pawng zasarih le sawmnga, le sui pawng sawmsarih le pawng nga siah ah an pek.

⁴Neko in Joahaz unau Eliakim cu Judah siangpahrang ah a tuah ih a hmin Jehoiakim ah a thleng. Joahaz cu Neko in Izipt ramah a hruai.

⁵Jehoiakim cu Judah siangpahrang a ṭuan ah kum kul hluannga a ti ih Jerusalem ihsin kum hleikhat sung a uk. BAWIPA a Pathian hmaiah thil ṭha lo a tuah.

⁶Babilon siangpahrang Nebuchadnezzar in Judah ram cu a siim ih Jehoiakim cu kai tahrat in thir cikcin in an khit ih Babilon ah an hruai.

⁷Nebuchadnezzar in BAWIPA ih Biakinn thilri mankhung hrekkhat pawl a lak ih Babilon a siangpahrang inn ah a ret.

⁸Jehoiakim ih tuahmi hmuahhmuah, ningsinza thil a tuahmi cu a sualnak pawl tiangin, Israel Le Judah Siangpahrang Thuanthu Cabu sungah an ngan a si. A fapa Jehoiakhin in a ai-ah siangpahrang a run ṭuan.

⁹Jehoiakhin cu Judah siangpahrang a ṭuan tikah kum hleiriat a ti ih Jerusalem ihsin thla thum le nihra sung a uk. Anih khal BAWIPA ih hmaiah a sual.

¹⁰Khawsik a reh ih ṭhal a hungsuah tikah siangpahrang Nebuchadnezzar in a kai ih Babilon ah a hruai. BAWIPA ih Biakinn thilri mankhung pawl tla a phur ṭheh. Cule Nebuchadnezzar in Jehoiakhin ih unau Zedekiah cu Judah le Jerusalem siangpahrang ah a tuah.

¹¹Zedekiah cu Judah siangpahrang a ṭuan tikah kum kul hluankhat a ti ih Jerusalem ihsin kum hleikhat sung a uk.

¹²BAWIPA ih hmaiah sualnak a tuah; BAWIPA ih thu a phuangtu profet Jeremiah ih thusimmi a ngai lo.

¹³Zedekiah cu siangpahrang Nebuchadnezzar do dingah ral a tho. Cutikah Nebuchadnezzar in a kuthnuai um dingah Pathian hmin saal in thu a kamter. Zedekiah in BAWIPA Israel ih Pathian hnenah sualsir-aw in Pathian hnenih hoikir sal a tum hrimhrim lo.

¹⁴Cuih tlunah Judah mi hotu pawl, puithiam le misenpi pawl khal in an kiangkap ih um miphun pawl ih sualnak keneh cu an thlunih an uire a si. Cuticun BAWIPA amah rori in a thianhlimter mi Biakinn cu an borhhlawhter ṭheh.

¹⁵BAWIPA, an pupa ih Pathian in a minung pawl le a Biakinn cu a zuah duh ruangah an hnenih ralrinnak pe dingah cat loin profet a thlah.

¹⁶Asinain Pathian ih thlahmi palai le profet pawl cu an rak hmuhsuam; an hnihsan men ih zianghman ah an siar lo. A netnak ahcun an parah BAWIPA ih thinhengnak cu a luar tukih an luat theinak lamzin a um nawn lo.

¹⁷BAWIPA in Babilon siangpahrang a thlah ih Judah mi mino pawl cu Biakinn sung hmanah a that; zovek tlun hmanah zaangfahnak a nei lo; mino siseh, upa siseh, nunau mipa tilo in, a na mi le harhdam mi tla an zatein a kut sungah BAWIPA in a pek ṭheh a si.

¹⁸Babilon siangpahrang in BAWIPA ih Biakinn a siim ih thilri le sumsaw, siangpahrang le a kuthnuai bawi pawl thilri mankhung hmuahhmuah a lak ih Babilon ah a phur ṭheh.

¹⁹Jerusalem khawpi le BAWIPA Biakinn, siangpahrang innpi le a sung thilri pawl tla meisa in a ur ṭheh.

²⁰Ralnam in thah ngah lomi, a taanglai mi pawl cu Babilon ah a hruai thluh ih cutawkah, Persia uknak a thlen hlan lo, Babilon siangpahrang le a tesinfa pawl ih sal ah an cang.

²¹Cuticun profet Jeremiah hmangin BAWIPA ih a rak simmi, “An ulh lomi Sabbath colhnak [15] kimter dingah an ram cu kum sawmsarih sung a ṭhing ding,” a timi thu cu a kim a si.

²²Persia siangpahrang[16] Sairas in siangpahrang a ṭuan kum khatnak ah BAWIPA ih fial vekin ca a ngan ih a uk sung khuazakipih siar ding in a kuat. Himi cu profet Jeremiah hmangin BAWIPA ih thusimmi kimnakah a si. A thusuahmi cu hiti in a ngan:

²³“Himi cu Persia siangpahrang Sairas thusuah mi a si. BAWIPA vanih Pathian in leilung pumpuluk uktu ah i tuah ih Judah ram Jerusalem khua ah amah hrangih Biakinn sak dingah ṭuanvo i pek. Cu a si ruangah nannih Pathian minung hmuahhmuah cutawkah feh thluh uh; BAWIPA nan Pathian cu nan hnenah um hram seh,” tiah a ngan.