Read Falam Chin 2 SANSIARNAK 7 Bible Online

2 SANSIARNAK 7 - Falam Chin bible

2 SANSIARNAK 7

¹Solomon cu thla a cam thluh tikah van in meisa a rung ih an thilpekmi thawinak pawl cu a kaang ṭheh; cule BAWIPA ih sunlawinak huham in Biakinn cu a khat ṭheh.

²Biakinn cu tleunak in a khah ruangah puithiam pawl a sungah an lut thei lo.

³Van in meisa a rungmi le Biakinn cu tleunak in a khah kha Israel mi pawl in an hmuh tikah an dinnak tual ahcun an lu an kun ih Pathian bia in amah cu an thangṭhat, “BAWIPA cu a ṭha, A duhdawtnak cu kumkhua in a hmun” tiah an ti.

⁴Cuih hnuah Siangpahrang Solomon le misenpi in BAWIPA ih hnenah thawinak an pek.

⁵Cuih thawinak hrangah Solomon in caw thawngkul hluanhnih le tuu thawng zakhat le thawngkul a pek. Cuticun siangpahrang le misenpi in Biakinn cu BAWIPA ih hnenah an hlan.

⁶Puithiam pawl cu an hnaṭuannak hmun ciarah an ding ih Levi mi pawl cu an lam hoi in an ding. Siangpahrang David ih a rak hmanmi awn-mawi a phunphun thawn, “A duhdawtnak cu kumkhua in a hmun,” timi hla sak phah in BAWIPA cu an thangṭhat. Puithiam pawl in tawtawrawt an tum laiah misenpi pawl cu an ding thluh.

⁷Cule Solomon in a tual laifang, Biakinn hmaizawn cu a thianhlimter hnuah cutawkah mei-ur thawinak, thlairawl thawinak, le remnak thawinak pawl pekmi ih sathau cu Pathian hnenah a hlan. Hizat thawinak hrangah cun dar biakṭheng a tuahmi cu a fatet tuk ruangah cutawkah thawinak pawl a pek a si.

⁸Solomon le Israel mi pawl in Puai cu ni sarih sung an tuah. Puai hmun ih a rami pawl cu an tam ngaingai; saklam ah Hamath khua luhnak tlangkawn in le thlanglam ah Izipt ramri tiangin an ra.

⁹A netnak ni ah puai an tuah. Biakṭheng hlannak ah ni sarih an rei ih puai tuahnak ah a dang ni sarih an rei lala.

¹⁰Thla sarih thla, ni kul hluanthum ni ah Solomon in misenpi cu an inn ciarah a tlunter thluh. BAWIPA in Israel mi le David le Solomon hnenah thluasuah a pek ruangah misenpi cu lungawi aipuang tein an tlung.

¹¹Siangpahrang Solomon in Biakinn le siangpahrang inn cu a saduhthah le a ruangrai suaimi sungih a um vekin tlamtlingte in a sak ṭheh.

¹²Cule BAWIPA cu Solomon hnenah zanah a lang ih a hnenah, “Na thlacamnak ka thei ih hi Biakinn cu ka hnenih thawinak nan peknak hmun dingah ka lungkim mi a si.

¹³Vanruah ka surter lo tikah maw, rawl ei ṭhehtu dingah kharbok ka thlah tikah maw, a si lole ka minung pawl parih natsia ka thlenter tikah maw,

¹⁴ka hmin in kawhmi ka minung pawl in ka hnenah lungsiir in thla an cam ih ka mithmai an hawl ih an thil ṭha lo tuahnak ihsin an kirsal a si ahcun van in an thlacamnak ka thei ding ih an sualnak ka ngaithiam ding ih an ram cu ka damter ding.

¹⁵Hi hmun cu ka kilveng ding ih hitawk ihsin ka hnenih thla an camnak cu ka thei ding.

¹⁶Hi Biakinn cu ka hril zomi a si ih a kumkhua ih keimah biaknak hmunah ka thianhlimter zo mi a si. Hi hmun cu ka kilveng ding ih a kumkhua in ka humhim ding a si.

¹⁷Nangmah ih cungcang thu ahcun na pa David bangtuk in ka daan le ka thupekmi pawl na thlun ih rinsantlak le felzetin ka hna na ṭuan ahcun,

¹⁸na tesinfa in Israel cu an uk ringring ding, tiah na pa David hnenih thukamnak ka rak tuahmi cu ka kimter ding.

¹⁹Sikhalsehla nangmah le na minung pawl in ka daan le ka thupekmi pawl nan thlun lo ih khawzing dangdang tla nan biak asile,

²⁰ka lo pekmi ram ihsin ka lo dawihlo hai dingih keimah in biaknak hmunah tiih ka thianhlimter ciami Biakinn cu ka taanta ding; Israel cu mi hmuahhmuah ih hmuhsuammi le nautatmi ah a cang ding.

²¹“Atu ahcun hi Biakinn cu mikip ih porhmi a si; asinain cutikah cun a siatral thluh ding ih mi sukso pawl in an hmuh tikah mangbang khawruahhar in, ‘Ziangah so BAWIPA in hi ram le hi Biakinn cu hiti lawmmam in a tisiat?’ an ti tikah,

²²mikip in, ‘BAWIPA an Pathian, Izipt ram ihsin an pupa a hruaisuaktu cu an dungtun, an hnong ih khawzing dang hmaiah an kuun ih an biaksan ruangah BAWIPA in an parah hi tlukin siatsuahnak a thlenternak a si,’ an ti ding,” tiah a ti.