Read Falam Chin 2 SANSIARNAK 9 Bible Online

2 SANSIARNAK 9 - Falam Chin bible

2 SANSIARNAK 9

¹Sheba ram siangpahrang bawinu in siangpahrang Solomon hmin thannak a thei ih thusuhnak harzetzet thawn hniksak dingah Jerusalem ah a ra. Mi tampi in an thlun ih rimhmui, lungmankhung le sui tampi phurtu kalauk pawl thawn an ra. Solomon a ton tikah a thinlung ih a ruahmi thusuhnak hmuahhmuah cu a sut ṭheh.

²A thusuhmi cu Solomon in a let ṭheh, a leh thei lomi pakhat hman a um lo.

³Cutiin Sheba siangpahrang bawinu in Solomon fimzia cu a hmu ih siangpahrang innpi a sakmi,

⁴a cabuai parih a rawl ei ding an hunmi pawl, a kuthnuai bawi pawl ih inn pawl, siangpahrang zungih hnaṭuantu pawl an uk awkzia le an thilthuam pawl, a rawl ei tikih a zohtu hnen-um pawl le a tlanleen tikih a kiltu pawl le an hnipuan hruk daan pawl le BAWIPA ih Biakinn ih thawinak a pekmi pawl hmuahhmuah a hmuh tikah cun a mang a bangtuk ih a thinlung a hlo ṭheh.

⁵Cuih hnuah siangpahrang bawinu in Solomon hnenah cun, “Ka ram ihsin na thil titheizia le na fimnak thuhla ka theihmi cu a dik a si.

⁶Keimah rori ra in ka mit ih ka ra lo hmuh hlanah cun in simmi cu ka zum thei lo. Ka hna lawngin ka rak theihmi cu na fimnak ngaingai ih hrek hman a rak si lo. An lo rel hnakin na fim sawn a si.

⁷Na minung pawl le na kuthnuai ih hnaṭuantu pawl cu ziangtluk mi vanneiso an si! Ni tinte in na fimnak ṭongkam an thei ringring.

⁸BAWIPA na Pathian cu thangṭhat si ko seh. Na parah BAWIPA cu a lung a awi ih amah ih hmin in mi uktu hrimhrim si dingah siangpahrang ah a lo tuah a sihi! Amah ih minung Israel pawl cu a duhdawt ruangah le kumkhua in a humhim duh ruangah nangmah cu an parih thudik le dingthluk lairelnak thawn uktu si dingah siangpahrang ah a lo tuah a si,” tiah a ti.

⁹Siangpahrang bawinu in siangpahrang Solomon cu laksawng ah sui pawng thawngkua, rimhmui tampi le lungmankhung pawl a pek. Sheba ram siangpahrang bawinu in siangpahrang Solomon hnenih a pekmi rimhmui bangtuk rimhmui ṭha cu khui hmanah a um dah lo.

¹⁰Siangpahrang Hiram le siangpahrang Solomon tla ih milai pawl, Ofir ihsin sui a rak phurtu pawl in hual thing le lungmankhung pawl tla an rak phur.

¹¹Solomon in cuih thing cu Biakinn le siangpahrang innih kailawn pawl tuahnak ah le hla saktu pawl ih ṭingṭang le tingrisit pawl tuahnak ah a hmang. Judah ramah cubangtuk cu an hmu dah lo.

¹²Solomon in laksawng a ngahmi pawl ai-ah Sheba siangpahrang bawinu hnenah laksawng tampi a pek ih a ngahmi hnakin tam sawn a pek. Siangpahrang bawinu ih a dilmi hmuahhmuah a pek ṭheh a si. Cuih hnuah a thluntu pawl thawn Sheba ram ahcun an kir sal.

¹³Kum tinte siangpahrang Solomon in sui pawng thawng sawm nga zikte a ngah ringring.

¹⁴Himi cu sumtuahtu le dawrtuahtu pawl ih pekmi ngunkhuai tlunah a ngahmi a si. Arabia ram siangpahrang pawl le Israel ram sungih mi-uk bawi pawl in sui le ngun tampi an pek fawn.

¹⁵Solomon in ralphaw a tummi zahnih a tuah ih ralphaw pakhat cu deenmi sui pawng hleinga ciarih khuhmi a si.

¹⁶Cuih tlunah a fate deuhmi ralphaw zathum a tuah ih pakhat cu deenmi sui pawng riat ciarih khuhmi a si. Cuih ralphaw pawl cu a zatein Lebanon Tupi thingih sakmi siangpahrang innkhaan pakhat sungah a ret.

¹⁷Solomon in siangpahrang tokham tumpi pakhat vuiho in a tuah ih sui hlir in a khuut.

¹⁸Cuih tokham kainak dingah kaarbak paruk a um ih a hmai ahcun sui ih tuammi ke retnak a um. Vorhlam le kehlam ah kut retnak a um ih a siir ah kiosa lem pakhat veve an dinter.

¹⁹Karbak paruk ih siir le siir ah kiosa lem hleihnih an ding. Hi bangtuk siangpahrang tokham cu khui ram hmanah a um dah lo.

²⁰Siangpahrang Solomon ih khuathai hmuahhmuah cu sui hlir ih tuahmi an si ih Lebanon Tupi Khaan sungih beelkheng pawl tla sui hlir ih tuahmi an si ṭheh. Solomon sanah ngun cu sunloihmi a rak si lo.

²¹Cule tangphawlawng tampi a nei ih siangpahrang Hiram ih tangphawlawng thawn Tarshish khua ah an fehter ṭheu. A feh le a kir ah kum thum an rei. Cuih a tangphawlawng pawl cun sui, ngun, vuiho, zawng le utawng pawl an phur.

²²Siangpahrang Solomon cu leilung tlun siangpahrang hmuahhmuah lakah a fimbik le a lianbik a si.

²³Pathian ih a pekmi fimnak theih duh ah siangpahrang hmuahhmuah in thu an ra ron ṭheu.

²⁴Solomon cu laksawng a phunphun sui, ngun, korfualpi, hriamnam, rimhmui, rang le laak pawl an pek. Kum tinte cutin an pek ringring.

²⁵Cun Solomon in a rang le a rangleng pawl hrangah ranginn thawngli a nei ih rang ralkap pawl ih to dingah rang thawng hleihnih a nei. A rang hrekkhat cu Jerusalem ah a ret ih hrekkhat cu khawpi dangdangah a ret.

²⁶Eufrates Tiva in Filistin ram le Izipt ramri tiang siangpahrang a ummi hmuahhmuah tlunah thuneitu bik a si.

²⁷Solomon san ahcun ngun cu Jerusalem ah lungto tlukin a tam ih sidar thing cu theipi kung tlukin a tam.

²⁸Solomon in rang cu Izipt ram le ram dangdangin a lei.

²⁹Siangpahrang Solomon thuanthu dangdang cu, a thok ihsin a cemnak tiang, Profet Nathan Thuanthu Cabu sungah le Shiloh khua Ahijah ih Thuphuan cabu sungah le Profet Iddo Ih Hmuhmi Cabu sungah an ngan. Cuih cabu sungah Israel siangpahrang Jeroboam pakhatnak ih thuhla khal an ngan ve.

³⁰Solomon in Israel ram pumpi cu Jerusalem khua ihsin kum sawmli sung a uk.

³¹Solomon cu a thi ih David Khawpi, Jerusalem ah an phum. Cule a fapa Rehoboam in a ai-ah siangpahrang a run ṭuan.