Read Falam Chin EZRA 6 Bible Online

EZRA 6 - Falam Chin bible

EZRA 6

¹Curuangah siangpahrang Darias in Babilon ih siangpahrang thuhminsinnak cabupi sungah cuih thu cu hawl dingin thu a pek.

²Cule Media peng, Ekbatana khua ah cazual pakhat an hmu ih a sungah:

³“Siangpahrang a can kum khatnak ah, siangpahrang Sairas in thawinak peknak ah le mei-ur thawi peknak ah Jerusalem ih Biakinn cu saksaal dingin thu a pek. Cuih Biakinn cu pi sawmkua a sang ding ih pi sawmkua a kau ding.

⁴A phar pawl cu lungto le thing in an tuah dingih lungto thuah thum ah thing thuah khatión a si ding. Inn saknak ih a cemmi hmuahhmuah cu siangpahrang tangka sungin pek a si ding.

⁵Siangpahrang Nebuchadnezzar in Babilon ih a retmi sui, ngun le beelkheng pawl cu khirh thluh a si ding ih Jerusalem Biakinn ih an rak retnak hmun ciar ah ret sal a si pei,” tiih nganmi an hmu.

⁶Cutikah siangpahrang Darias in hiti in ca a khirh: “Eufrates Nitlaknak lam peng uktu Mangki bawi Tattenai, Shethar Bozenai le Eufrates Nitlaknak lam pengih a ummi bawi upa pawl: “Biakinn kiangkapah tla rak um hlah uh;

⁷an hnaṭuan tla rak hnaihnok hlah uh. Judah peng uktu bawi le Judah mi hotu pawl in Pathian Biakinn cu a rak dinnak keel ah sak ko hai seh.

⁸An ṭulnak kipah rak bawm sawn uh. Ka thupekmi cu hiti in a si: Cawlbaang loih hna an ṭuan theinak dingah Eufrates Nitlaknak lam ihsin siangpahrang hrangih an pekmi siah sungin inn saknak ih an cemmi hmuahhmuah cu zamrangin anmah nan rak pe pei.

⁹Jerusalem ih puithiam pawl in an lo dil tikah an hnenah nitinte pelh loin an ṭulmi pawl-cawcang, tuu a si lole tuu faate pawl Van ih Pathian hnenih mei-ur thawinak an pek dingah sangvut, cite, sabitti le olif hriak pawl tla nan rak pe pei.

¹⁰Van ih Pathian hnenah a cotlak in thawinak an pek ih keimah le ka fapa pawl hrang tla ah thlaza in camsak theinak dingah a tlunih ka thupekmi pawl cu nan rak tuah tengteng pei.

¹¹Hi ka thupekmi a thlun lotu cu a inn ihsin kaan nan zuuk pei ih nan zum hnuah amah cu nan dawt pei.

¹²Jerusalem cu Amah an biaknak hmun si dingih a hriltu Pathian in hi ka thupekmi a eltu le hi Biakinn siatsuah a tumtu siangpahrang le miphun cu siatsuah seh. Keimah Darias in hi thu cu ka pek a si. Ka thupekmi cu kimtein thlun thluh ding a si,” a ti.

¹³Eufrates Nitlaknak lam ram uktu Mangki bawi Tattenai le Shethar Bozenai le a dang bawi upa pawl in siangpahrang Darias thupekmi vek cun taimak suah in an tuah thluh.

¹⁴Judah mi hotu pawl in Biakinn cu an sak ih profet Haggai le profet Zekhariah thuphuanmi thawngin an hnaṭuan cu a sawtzet. Cule Israel ih Pathian le Persia siangpahrang Sairas, Darias le Artakzaksis pawl ih thupek vekin an ṭheh.

¹⁵Darias in siangpahrang a ṭuan kum ruknak Adar thla[14] ni thum ni ah Biakinn cu an sak ṭheh.

¹⁶Cutikah Israel mi pawl - puithiam le Levi mi le Babilon saltaannak ihsin a rakirmi hmuahhmuah in - lungawi zetin Biakinn cu Pathian hnenah an hlan.

¹⁷Cuih ni ah Pathian hnenih thawinak hrangah cawcang zakhat, tuucang zahnih le tunote zali an pek; cuih tlunah Israel miphun hleihnih hrang sualthlah thawinakah me hleihnih an pek.

¹⁸Moses cabu sungih tuah ding daan a um vekin Jerusalem Biakinn sungih hnaṭuantu dingah puithiam pawl le Levi mi pawl cu a bur a bur in an ṭhen.

¹⁹Babilon saltaannak ihsin a kirmi pawl in thla khatnak thla[15] ni hleili ni ah Lantak Puai an tuah.

²⁰Puithiam hmuahhmuah le Levi pawl hmuahhmuah in thianfainak an tuah ih an thiangfai ṭheh. Levi mi pawl in saltaannak ihsin a ra kirmi pawl hrang le puithiam pawl le anmah ih hrangah Lantak Puai hrang thawinak rannung pawl an that.

²¹Thawinak ih an pekmi sa cu a rakirmi Israel mi hmuahhmuah le Judah ram sungih a ummi khuavang betu pawl ih biaknak a dungtun tu pawl le BAWIPA Israel ih Pathian bia dingih a rami pawl in an ei.

²²Ni sarih sung, Thilnu tello Sang Puai cu lungawi aipuang tein an tuah. BAWIPA in Assiria siangpahrang [16] cu Judah mi parah thinlung ṭha a neihter ih Israel Pathian ih Biakinn sak sal hnaṭuannak ah tampi a bom hai ruangah a hlei in an lung a awi cuang.