Read Falam Chin NEHEMIAH 1 Bible Online

NEHEMIAH 1 - Falam Chin bible

NEHEMIAH 1

¹Hakaliah ih fapa Nehemiah ih ṭuansuahmi thuanthu cu hiti in a si. Artakzaksis[1] siangpahrang a ṭuan kum kulnak, Kislev [2] thla ah keimah Nehemiah cu Susa[3] khawpi ah ka um.

²Culai ah ka unau pakhat Hanani cu a rualpi dang pawl thawn Judah ram ihsin an ra thleng; cule Babilon ram saltaannak ihsin Jerusalem ih a kirmi Judah mi pawl thuhla ka sut.

³Cutiih ka suh tikah, saltaannak in a suak ih an khua le an ram a thlengmi pawl cu harsatnak tampi an tong ih an kiangkap ih ummi miphun dang pawl in an hmuhsuam hai a si tiah in sim. Cuih tlunah Jerusalem kulhnak phar pawl cu an cim thluh ih, an ur thluh hnu in kotka pawl tla cu an tuah sal hrih lo a si, ti tla in sim.

⁴Cuih thu ka theih tikah ka to ih ka ṭap. Ni tampi sung riahsia in ka um ih zianghman ei loin rawl ka ul. Pathian hnenah thla ka cam ih,

⁵“Maw Bawipa, Van ih Pathian, nang cu na maksak ih kan lo ṭihzah ngaingai. Nang cu rintlak na si ih a lo duhdawtu le na thupekmi a thluntu pawl parah cun na thukam cu na kimter ringring.

⁶Maw ka Bawipa, na mit in i run zoh awla Israel mi na siahhlawh pawl hrangah sunzan ih thla ka camnak hi na hna in i run theihsak hram aw. Na parah Israel mi pawl cu kan sual ngaingai zo ih cuih kan sualnak cu ka phuang a si. Ka pupa pawl an rak sual ih keimah tla ka sual a si.

⁷Ṭha lozet le mawi lozetin na hmaiah kan nung a si. Na thupekmi kan tuah lo; na siahhlawh Moses hnen ihsin in pek mi daan pawl cu kan thlun lo.

⁸Asinain Moses hnenah, ‘Nannih Israel mi pawl zumtlak lo nan si ahcun ram dang le miphun dang lakah ka lo ṭhekdarh thluh ding.

⁹Sikhalsehla ka hnenah nan kirsal ih ka thupekmi nan thlun a si ahcun, vanrang deng tiang ṭhekdarh thluhmi sikhal uhla, keimah in biaknak dingah ka hril zomi hmun ahcun ka lo kirter sal ding a si,’ tiih na rak timi kha cingkeng hram aw.

¹⁰“Maw Bawipa, hi milai pawl hi na siahhlawh an si, nangmah ih minung an si. Na baan thacak le na huham in na runsuak mi an si.

¹¹Kei ka thlacamnak le na hmin upat a lo duhtu na siahhlawh dang pawl ih thlacamnak hi run ngai hram aw. Tuihsun ahhin i hlawhtlingter hram awla Siangpahrang Bawipa cu ka parah zaangfahnak neiter hram aw,” ka ti. Culai ahcun keimah cu siangpahrang bawipa ih sabitti petu ka si.