Read Falam Chin NEHEMIAH 12 Bible Online

NEHEMIAH 12 - Falam Chin bible

NEHEMIAH 12

¹Babilon saltaannak ihsin Shealtiel ih fapa Zerubbabel le Puithiam Sang Joshua thawn a ra kirmi puithiam le Levi mi pawl cu a tanglam pawl hi an si:

²Puithiam pawl: Seraiah, Jeremiah, Ezra, Amariah, Malluk, Hattush, Shekaniah, Rehum, Meremoth, Iddo, Ginnethoi, Abijah, Mijamin, Maadiah, Bilgah, Shemaiah, Joiarib, Jedaiah, Sallu, Amok, Hilkiah le Jedaiah. Hi pawl cu Joshua sanih an unau puithiam pawl lakah hotu an si.

⁸Levi mi pawl: Lungawinak hla an sak tikah a tanglam pawl cu hla hruaitu an si: Jeshua, Binnui, Kadmiel, Sherebiah, Judah le Mattaniah.

⁹Bakbukiah le Unno cu an unau Levi mi pawl thawn hlarem sawn-awtu an si.

¹⁰Joshua cu Joiakim ih pa a si; Joiakim cu Eliashib ih pa a si; Eliashib cu Joiada ih pa a si.

¹¹Joiada cu Jonathan ih pa a si; Jonathan cu Jaddua ih pa a si.

¹²Puithiam Sang Joiakim sanah a tanglam pawl hi puithiam hrin ih hotu pawl an si: Seraiah hrin ah Meraiah, Jeremiah hrin ah Hananiah, Ezra hrin ah Meshullam, Amariah hrin ah Jehohanan, Mallukhi hrin ah Jonathan, Shebaniah hrin ah Josef, Harim hrin ah Adna, Meroioth hrin ah Helkai, Iddo hrin ah Zekhariah, Ginnethon hrin ah Meshullam, Abijah hrin ah Zikhri, Miniamin hrin ah … [11] Moadiah hrin ah Piltai, Bilgah hrin ah Shammua, Shemaiah hrin ah Jehonathan, Joiarib hrin ah Mattenai, Jedaiah hrin ah Uzzi, Sallai hrin ah Kallai, Amok hrin ah Eber, Hilkiah hrin ah Hashabiah, Jedaiah hrin ah Nethanel.

²²Puithiam Sang Eliashib, Joiada, Johanan le Jaddua pawl sanah Levi mi innsang pawl le puithiam innsang pawl hotu cazin cu ṭhatein an ret. Cuih cazin cu Darias[12] in Persia siangpahrang a ṭuan laiah an tuah ṭheh mi a si.

²³Levi mi innsang hotu pawl ih cazin cu Eliashib ih tu Johanan san tiang siangpahrang thu hminsinnak cabu sungah an khum.

²⁴Levi mi pawl cu Hashabiah, Sherebiah, Jeshua, Binnui le Kadmiel ho in bu tampi ah an ṭhen. Pathian ih minung, siangpahrang David ih thupeknak vekin ṭum khatah bu hnih bu hnih in a sawn-aw in Pathian an thangṭhat ih Pathian hnenah lungawinak an sim.

²⁵Biakinn kotka pawl kiangih thilri retnak inn pawl kiltu cu a tanglam pawl hi an si: Mattaniah, Bakbukiah, Obadiah, Meshullam, Talmon le Akkub.

²⁶Himi pawl cu Joshua fapa le Jehozadak ih tu Joiakim san le ram uk Mangki bawi Nehemiah san le Daan thei zettu le puithiam Ezra san ih a ummi an si.

²⁷Jerusalem khawpi phardawl cu Pathian hnenih an hlan tikah dar sumsel, ṭingṭang le tingrisit tum thawn mi hmuahhmuah in lungawinak hla an sak ih lungawi aipuang in puai ih an tel thei ciarnak dingah Levi mi pawl cu an umnak kipin Jerusalem ah an ko ṭheh.

²⁸Levi mi hla satu pawl cu an umnak hmun ihsin le Jerusalem kiangkap Netofah kiangkap khua pawl,

²⁹Beth Gilgal, Geba le Azmaveth khua pawl in an rasuak khawm.

³⁰Puithiam le Levi mi pawl cun anmah thianhlimnak thawinak le misenpi hrang thawinak, kotka pawl le khawpi phardawl thianhlim thawinak cu an pek.

³¹Cule Judah mi hotu upa pawl cu phardawl parah cun ka kaiter hai ih Pathian hnenah lungawi thusim phah ih khawpi veltu dingah bu tum pipi bu hnih ah ka ṭhen. Bu khat cu phardawl parah cun vorhlam ihsin Hnawm Kotka lamah an feh.

³²Hla saktu pawl ih dungin Hoshaiah a feh ih amah cu Judah mi hotu a hrekin an thlun.

³³Cuih dungah a tanglam ih puithiam pawl in tawtawrawt tum phah in an thlun. Hmaisa bik ah Azariah, Ezra, Meshullam, Judah, Benjamin, Shemaiah le Jeremiah an si. A sangtu ah Jonathan ih fapa le Shemaiah ih tu Zekhariah a si. (A pupa pawl cu Mattaniah, Mikaiah le Zakkur an si ih Asaf hrin an si.)

³⁶Zekhariah cu a hrinpi unau pawl: Shemaiah, Azarel, Milalai, Gilalai, Maai, Nethanel, Judah le Hanani pawl in an thlun ih an zatein Pathian ih minung Siangpahrang David ih a rak tummi awnmawi vek an keng ciar. Hi pawl cu an feh tikah Daan thiam Ezra in hmai a ṭhi.

³⁷Cerhti Kotka an thlen in David Khawpi ih hung fehnak kailawn an kai ih David Siangpahrang inn an lan hnuah khawpi nisuahnak lam Tidai Kotka ih phardawl ahcun an ra thleng sal.

³⁸Lungawi thusimtu bu dang pakhat cu phardawl parah cun kehlam ah an feh ih keimah le mi ṭhenkhat in kan thlun. Kan feh ih Meikhu suahnak Innsangpi timi kan lan ih Phar Kaupi timi kan thleng.

³⁹Cutawkin Efraim Kotka, Jeshanah Kotka, Nga Kotka, Hananel donhleisang le Zakhat donhleisang kan lan ih Tuu Kotka kan thlen hnuah Ralveng Kotka ah kan netter.

⁴⁰Cuticun an bu hnih in Pathian thangṭhat phah in Biakinn kiang an thleng. Ka hnenih a fehmi hotu pawl hlei ah,

⁴¹tawtawrawt tum phah in puithiam Eliakim, Maaseiah, Miniamin, Mikaiah, Elioenai, Zekhariah le Hananiah pawl an tel.

⁴²Cule hla satu pawl ah Jezrahiah ho in Maaseiah, Shemaiah, Eleazar, Uzzi, Jehohanan, Malkhijah, Elam le Ezer pawl an tel ih an aw neih patawp in hla an sak.

⁴³Cuih ni ahcun thawinak tampi an pe ih lungawinak thawn an khat, ziangahtile Pathian in lungawizet dingin a tuah hai. Cuih lungawinak puai ahcun nunau le nauhak pawl tla an tel ih an thawmvang cu hlapi tiang a thang.

⁴⁴Culai ahcun an rawl hmaisa bik a cu mi le an thingrah kumtinte a rah hmaisa bik pawl le thawhlawm, ṭhenhra ṭhenkhat le a dangdang Biakinn hrangih an pekmi pawl retnak inn pawl kiltu dingah mi an ret. Hi an retmi pawl cun thilri retnak inn an kil ih tlunah, Daan sungih a um vekin puithiam pawl le Levi mi pawl hrangih an pek mi pawl cu khawpi kiangih a ummi lo ihsin an va khawm. Judah mi hmuahhmuah cu puithiam le Levi mi pawl parah an lung a awi ngaingai.

⁴⁵Ziangahtile Pathian ih thupekmi vekin thil an tuah ih felzetin thianhlim thawinak tla an tuah a si. Cule biakinn hla satu pawl le biakinn kiltu pawl khalin siangpahrang David le a fapa Solomon ih thupekmi vekin, an hnaṭuan cu feltein an ṭuan.

⁴⁶Hlanlai ih siangpahrang David le hlathiam Asaf san lai ihsin hla satu pawl cu thangṭhatnak hla sak tikah le Pathian hnenih lungawi thusim tikah mi hotu an si ringring.

⁴⁷Zerubbabel san le Nehemiah san khalah Biakinn hla satu pawl le biakinn kiltu pawl pumcawmnak hrangah cun Israel mi pawl in nitinte thawhlawm an pe ringring a si. Senpi pawl in thawinak thianghlim cu Levi mi pawl hnenah an pek ih Levi mi pawl in an pek ding zat cu Aaron ih tesinfa puithiam pawl hrangah an pe ve.