Read Falam Chin NEHEMIAH 5 Bible Online

NEHEMIAH 5 - Falam Chin bible

NEHEMIAH 5

¹Tikcu a rei deuh tikah nunau ti lo mipa ti loin an unau Judah mi ṭhenkhat tlunah lungkim lonak an nei.

²“Sungrual kan si ih kan nunnak dingah rawl kan khop lo,” an ti.

³Mi ṭhenkhat in, “Rawl loih thih hnak cun, tiah kan inn kan lo le kan sabit hmuan tiangin kan pawng a si,” an ti.

⁴A dang mi ṭhenkhat in, “Kan lo le kan sabit hmuan hrangih ngunkhuai pek dingah tangka kan cawi a ṭul a si.

⁵Judah mi unau pawl hi thiikhat le sakhat kan si; Annih poihai mi le kannih poihai mi hi a bangrep lo maw? An faate cu an hrangih an sunlawi vekin kan faate pawl cu kan hrangah an sunglawi ve lo maw? Asinain kan faate pawl cu salah kan tuah hai a ṭul. Kan fanu hrekkhat pawl cu salah zuar an si zo. Kan titheimi zianghman a um lo, ziangahtile kan lo le kan sabit hmuan pawl cu in long thluh a si,” an ti.

⁶Cutiih an phunzainak ka theih tikah ka thin a heng ngaingai ih,

⁷thil pakhatkhat ka tuah a ṭul a si, ka ti. An hotu pawl le an bawi upa pawl cu ka kawk ih an hnenah, “Nan unau pawl parih nan thil tuah mi hi aṭha lo a si,” tiah ka sim. Cule cuih thu rel dingah misenpi ka kokhawm ih,

⁸an hnenah, “A can thei nawn lo ruangah miphun dang hnenah a zuar-awmi kan unau Judah mi pawl hman a si thei tawkin kan lei kir sal rero. Culai ah nannih in nan unau pawl cu zuar-aw dingin nan rak hneek rero lehlam,” ka ti. An hotu pawl cu an dai khepkhep ih ṭong ding zianghman an nei lo.

⁹Cun, “Nan tuah mi hi thilsual a si! Kan ral pawl, Zentail mi pawl ih hmuhsuam lonak dingah Pathian ṭihzah in a dikmi tuah ding nan si sawn.

¹⁰Mipi pawl kha ka hnen ihsin paisa le rawl ka cawiter hai. Cuvekin ka hnaṭuanpi pawl le ka hnaṭuantu pawl khal in an coih ve. Atu thok ihsin in cawimi pawl cu zohman in kan cawh sal nawn lo pei.

¹¹Atu rori in an lo, an sabit hmuan, an olif hmuan le an inn pawl cu pek sal ṭheh uh. Tangka maw, fangfai maw, sabitti maw, olif hriak maw, an lo baakmi hmuahhmuah atu ihsin daih thluh uh,” ka ti.

¹²Cutikah hotu pawl in, “Na sim vek cun kan tuah thluh ding; an thilri cu kan pek sal ding ih in baakmi cu kan cawh nawn lo ding,” tiah in ti. Cule puithiam pawl ka ko ih an thutiam vekih tuahsuak dingah an hmaiah siat ka camter.

¹³Ka taaiven puan[7] ka phoih ih an hmaiah cun ka thin. “Nan thukam vekih nan tuah lo a si ahcun Pathian in hi taaiven puan vekin a lo thing ding. Pathian in nan inn pawl le nan neihmi hmuahhmuah a lo long ṭheh ding ih nan lawng fangkheh in a lo taan hai ding,” tiah ka ti. Cutawkih a ummi hmuahhmuah in, “Amen,” an ti ih BAWIPA an thangṭhat. Cule an thuthiam mi cu an thlun.

¹⁴Artakzaksis Siangpahrang a ṭuan kum kulnak ihsin kum sawmthum le kum hnihnak tiang, kumpi kum hleihnih, Judah ram uktu Mangki bawi ka si sungah hin keimah siseh ka sungkhat pawl siseh ram uktu bawi ih ei dingmi rawl kan ei dah hrih lo.

¹⁵Ka hlanih ram uktu Mangki bawi a rak ṭuantu pawl cu misenpi hrangah thilrit an rak si ih nitinte an rawl le an zu hrangah ngun tangka sawmli an hmang ringring. An hnen-um pawl tiangin misenpi tisiatu an si. Sikhalsehla kei cu Pathian ka ṭih ruangah cutin ka tuah lo.

¹⁶Ka thazaang neihmi hmuahhmuah cu khawpi ralhruang kulhnakah ka hmang ih ka hrangah ziangbangtuk thilri hman ka hawl lo. I riantu ka hnen-um pawl hmuahhmuah khal cuih phar dawl hna an ṭuan thluh.

¹⁷Ka rawl einak cabuai ah Judah mi le an hotu pawl za le sawmnga rawl ka eipi ringring ih hlei ah kan kiangkap ram ihsin ka hnenih a ra mi hmuahhmuah ka cawm a si.

¹⁸Ka ei dingah nitinte cawcang pakhat, tuu ṭha bik paruk le ar tampi kan that ringring ih nihra ah voikhat sabitti a thar in ka suah ringring. Cubangtuk a si naón misenpi pawl an zonzai tuk ruangah ram uktu Mangki bawi ih ngah ding timi zat hman ka lo la lo.

¹⁹Hi tlukin misenpi hrangih ka tuah mi hi Pathian in ka ṭhatnak hrangah i theihsak hram seh.