Read Falam Chin NEHEMIAH 8 Bible Online

NEHEMIAH 8 - Falam Chin bible

NEHEMIAH 8

¹Thla sarih thla[9] ah Israel mi pawl cu an khua ciarah an um ṭheh. Cuih thla ni khat ni ah lungrual zetin Jerusalem khua, Tidai Kotka hmaiah an tongkhawm aw. Cule Daan cabu la dingah Ezra an fial. Ezra cu puithiam a si ih BAWIPA in Israel mi hnenah Moses kut sungin a pekmi Daan thuhla a thei zetmi pa a si.

²Ezra in Daan cabu cu a lak ih misenpi an khawmnak hmun ahcun a feh. Cutawkah nunau, mipa le thu ciingthei hmuahhmuah an zatein an khawm-aw thluh.

³Kotka kiang mualrawn ah Ezra in Daan cabu cu zinglam khawfingcah in sun tiang ringzet in a siar ih misenpi pawl cun ṭhazet in an ngai.

⁴Cuti siarnak hrangih an donmi donhleisang parah Ezra cu a ding. A vorhlam ah Mattithiah, Shema, Anaiah, Uriah, Hilkiah le Maaseiah an dingih a kehlam ah Pedaiah, Mishael, Malkhijah, Hashum, Hashbaddanah, Zekhariah le Meshullam an ding.

⁵Cuih donhleisang parih Ezra a din cun an zate in an mit hman ṭhep loin an zoh. Cule Daan cabu a vun on vete in an zatein an ding.

⁶Ezra in, “A maksak BAWIPA Pathian cu thangṭhat uh!” a ti. Cutikah misenpi cun vanah an kut an phar ih, “Amen, Amen,” an tiah an let. An khuk an bil ih an hmai leilung dai tiangin kuun in Pathian an biak.

⁷Cule misenpi cu an tho ih an umnak ciarah an ding ih Levi mi Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan le Peliah pawl in Ezra ih siarmi Daan cu an fianter.

⁸Misenpi ih an theih theinak dingah cuih Pathian Daan an siar mi cu ṭong an let[10] copcop.

⁹Pathian Daan ih tican ngaingai an theih tikah an lung a zuur ih an ṭap. Cutikah ram uktu mangki bawi Nehemiah, puithiam le Daan theitu Ezra le senpi hnenih Daan a fiangtertu Levi mi pawl in, “BAWIPA nan Pathian hrangah tuihsun cu ni thianghlim a si. Riahsia in ṭap hlah uh.

¹⁰Nan inn ah tlung uhla rawl thawthaw ei uhla sabit thawthaw in uh. Nan rawl le nan sabit cu a nei ve lomi thawn hlawm-aw uh. Tuihsun cu Bawipa ih hrangah ni thianghlim a si, riahsia in um hlah uh. BAWIPA ih lungawinak a lo pekmi cu nan cahnak a si,” tiah an ti.

¹¹Levi mi pawl in senpi pawl cu daite-ih um dingah an leem ih, ni thianghlim a si ruangah riahsia ih um lo dingin an sim.

¹²Curuangah senpi pawl cu inn ah an tlung ih lungawi zetin an ei an in ih an rualpi pawl thawn an hlawm-aw; an hnenih an lehsakmi Daan ih tican an theih fiang ruangah aipuang zetin an um.

¹³A thaisun ah an hrin ciarih hotu pawl cu puithiam pawl le Levi mi pawl thawn Daan ih tican ngaingai zir dingah Ezra hnenah an feh.

¹⁴Moses hmang in Israel mi hnenih BAWIPA in a pekmi Daan sungah cun Puanthlam Puai sung cu a laangte ih deu tuah tahratin cuih deu sungih um dingah Israel mi hnenih thupekmi a um kha an hmu.

¹⁵Curuangah Jerusalem le khuadang hmuahhmuah ah hiti in thu an pek: “Tlangpar ah feh uhla Daan sungih thupekmi a um vekin, deu saknak ah olif hnge, far hnge, lenhmui hnge, tum hnah pawl le hnah-nei thing dangdang tla va la uh,” an ti.

¹⁶Senpi pawl cu an feh ih deu saknak ah thinghnge pawl an lak ih an inn tlunih diphun rawn parah, an tual le Biakinn tual ah siseh, Tidai Kotka le Efraim Kotka kiangih senpi tlannak mualrawn tla ah siseh, deu cu an sak ciamco.

¹⁷Saltaannak in a ra kirmi hmuahhmuah in deu cu an sak ih a sungah cun an um. Himi cu Nun ih fapa Joshua san hnu ahcun an tuah hmaisa bikmi a si. An zatein lungawi aipuang in an um.

¹⁸An puai tuah ni khat ni in a netnak ni tiang nitinte Pathian ih Daan cu an siar. Ni sarih sung puai an tuah ih, Daan pekmi sungih a um vekin niriatnak ni ah an puai an ṭiak.