Read Falam Chin ESTHER 1 Bible Online

ESTHER 1 - Falam Chin bible

ESTHER 1

¹Xerxes[1] cu siangpahrang a si ih Persia ram khawpi Susa ih a siangpahrang tokham ihsin India in Ethiopia [2] tiang ramṭhen za le kul hluansarih a uk.

³Siangpahrang a ṭuan kum thumnak ah a kuthnuai bawi pawl le a ramṭhen uktu bawi pawl hrangah rawl ei puai tumpi pakhat a tuah. Cuih puai ahcun Persia le Media ralkap pawl le ramṭhen uktu bawi le phun upa tampi an tel.

⁴A thilri neihzia le a lenzia cu mi ih zoh dingah thlaruk sung rori a hmuh.

⁵Cuih hnuah cun siangpahrang bawipa in Susa khawpi sungih a ummi mipa hmuahhmuah, milian siseh, mi farah siseh, an zate hrangah rawl ei puai a tuah. Siangpahrang inn tualah zarh khat sung puai cu a tuah.

⁶Tual cu pat puanzar a rang le mepian pawl in an ceimawi ih cuih puan pawl cu pat phangfem in lungrang ṭhuam parih ngunkual ah an khih. Tual cu lungrang, lungsen, lungvar, lung mepian le lunghring pawl in an phah ih cuih parah cun sui le ngun in tuahmi tokham tampi an hung.

⁷Sabitti cu sui khuat a phunphun in an pek. Siangpahrang a si bangtuk in sabitti cu tirhsiang zetin a pek a si.

⁸An sabitti in ding cu a zat leiteek an tuah lo. An duhzat ciar in in hai seh, tiah Siangpahrang in a hnaṭuantu pawl cu thu a pek.

⁹Culai ahcun Siangpahrang inn ah Siangpahrang bawinu Vashti in nunau hrangah rawl ei puai a rak tuah ve.

¹⁰Rawl ei puai a tuahnak ni sarih ni ah siangpahrang bawipa cu a sabitti in mi in a thinlung a puamter. Curuangah tilper mi amah riantu pasarih Mehuman, Biztha, Harbona, Bigtha, Abagtha, Zethar le Karkas a ko ih,

¹¹Siangpahrang bawinu Vashti cu a sui lukhuh khum tahrat in a hnenih ratpi dingah thu a pek. Siangpahrang bawinu cu mi mawi ngaingai a si ih a sawmmi le a kuthnuai bawi pawl ih hmaiah a nupi mawizia cu uarawknak thawn a hmuh hai.

¹²Asinain siangpahrang bawinu an va sim tikah siangpahrang bawipa ih thu cu a el ih a ra duh lo. Cutikah Siangpahrang bawipa cu a thin a heng ngaingai; a thinhengzia cu a so in a so.

¹³Cun thil thupi le thu harsa a um tikah siangpahrang bawipa in ruahnak petu pawl ih ruahnak cu a sut hmaisa ṭheu. Curuangah amah ruahnak petu pawl, ziangtuah le a ṭha ding ti a theitu pawl a sut.

¹⁴An ruahnak a suh bik ṭheumi pawl cu: Karshena, Shethar, Admatha, Tarshish, Meres, Marsena le Memukan an si. Hi bawi pasarih cu Persia le Media ramah bawi upa bik pawl an si ih Siangpahrang ton theinak neitu an si.

¹⁵Siangpahrang bawipa cun an hnenah, “Keimah siangpahrang Xerxes in ka hnen-um pawl ka thlah ih siangpahrang bawinu raseh, tiah thu ka pek. Asinain a ra duh lo. Curuangah a daan vekin ziangso ka tuah ding?” a ti.

¹⁶Cutikah Memukan in Siangpahrang bawipa le a kuthnuai bawi pawl hnenah cun, “Siangpahrang bawinu Vashti in Siangpahrang bawipa a hmuhsuam a si; Siangpahrang bawipa a hmuhsuam lawng si loin a kuthnuai ih a ummi bawi pawl le a ram sungih a ummi hmuahhmuah khal in hmuhsuam ṭheh ve a si.

¹⁷Siangpahrang bawinu ih nuncan hi an theih tikah na uknak sungih a ummi nunau hmuahhmuah in an pasal cu zianghman ah an siar nawn lo ding. Nunau hmuahhmuah in, ‘Siangpahrang bawipa Xerxes in siangpahrang bawinu Vashti a ko naón a feh duh lo,’ an ti thlang ding.

¹⁸Persia ram le Media ram sungih a ummi fala hmuahhmuah in siangpahrang bawinu ih nuncan cu tuihsun ni a tlak hlanah na kuthnuai bawi pawl hnenah an sim thluh ding. Cuticun na thu ngaih lonak le hnahnawhnak cu ziangtik hmanah a reh thei nawn lo ding a si.

¹⁹Curuangah Siangpahrang bawipa na lung a kim ahcun, ‘Siangpahrang bawipa cu ziangtik hmanah Vashti in a tong thei nawn lo ding,’ tiah Persia ram le Media ramsung daan cabu sungah nganter aw. Cule a ai-awhtu ah aṭha deuhmi siangpahrang bawinu dang hawl aw.

²⁰Hi tluk a tum le a kaumi na uknak ram sungah hin na thupekmi a than ṭheh tikah cun nunau hmuahhmuah in an pasal cu, milian an si khalle, mifarah an si khalle, an upat ciar ding a si,” tiah a ti.

²¹Cuih thu cu siangpahrang bawipa le a kuthnuai bawi pawl in an theih tikah an lung a kim ṭheh ih Memukan simmi vek cun siangpahrang bawipa in a tuah.

²²A ram sungah cun ca a kuat ṭheh ih innsang pakhat sungah an pasal cu thuneitu bik a si ding, tiah an peng le an ram ciarah an ṭong ciar in thu a than ṭheh.