Read Falam Chin ESTHER 6 Bible Online

ESTHER 6 - Falam Chin bible

ESTHER 6

¹Cuih zan cu siangpahrang bawipa a itthat thei lo; curuangah a ram uk sungih hnaṭuanmi thu hminsinnak cabu kha a siarter.

²An siarmi sungah cun siangpahrang innkhaan pawl a kiltu tilpermi pahnih Bigthana le Teresh in siangpahrang cu an phiar ih a thah an tum; asinain cumicu Mordekai in a thei ih a phuang, ti thu a tel.

³Cutikah siangpahrang in, “Hi bangtuk thil ṭha a tuah ruangah Mordekai cu hminṭhatnak laksawng ziangtal kan pe maw?” tiah a sut. A hnen-um pawl in, “A hrangah zianghman tuahmi a um lo,” tiah an ti.

⁴Cule siangpahrang in, “Atu-ah ka inn ahhin ka kuthnuai bawi pakhat tal an um maw?” tiah a sut. Culai ahcun, Haman cu Siangpahrang hnen ihsin Mordekai thahnak thu dil dingah siangpahrang inntual ah a ra thleng ve; Mordekai thlainak ah tiah thlaithahnak cu a tuah thluh zo.

⁵Cule a hnen-um pawl cun, “Haman a um; nangmah ton a lo duh a si,” tiah Siangpahrang cu an ti. Siangpahrang bawipa cun, “Rung lutseh,” a ti.

⁶Haman cu a vung lut ih, siangpahrang in a hnenah, “Upatnak ka pek duhzetmi pakhat a um. A hrangah ziangso ka tuah ding?” tiah a sut. Cutikah Haman cun, “Siangpahrang in hitluk lawmmam ih upatnak a pek duhmi cu zo a si pei? Keimah ti lo zoso a um cuang ding,” tiah a thinlung tein a ruat.

⁷Curuangah siangpahrang hnen ahcun, “Bawipa, upatnak na pek duhzet mipa hrangah cun na siangpahrang thuam le nangmah ih to ṭheumi rang le na sui lukhuh lak suakter aw.

⁹Cule na kuthnuai bawi pawl lakih upa bik pakhat in cupa cu na thilthuam pawl cun thuamter sehla na rang parah toter in khawsung in rang cu hruaisak seh. Cule na kuthnuai bawipa cun an feh phah ahcun, ‘Siangpahrang bawipa in upatnak pek a duhmi parah upatnak a pek zia hi zohhnik uh,’ tiah au phah seh,” tiah a ti.

¹⁰Cutikah siangpahrang in Haman hnenah cun, “Zamrang in feh awla ka thilthuam le ka rang cu va la awla Judah mi Mordekai va pe aw. Atuih na sim vekcun Mordekai hrangah tuah thluh aw. Siangpahrang inn kotka kiangah Mordekai cu a um ding,” a ti.

¹¹Haman in siangpahrang thuam le rang cu a va lak ih thuam cu Mordekai a hrukter. Rang parah Mordekai cu a toter ih Haman in khawsung ahcun rang cu a hruaisak ih an feh phah ahcun, “Siangpahrang bawipa in upatnak pek a duhmi parah upatnak a pek zia hi zohhnik uh,” tiah a au phah vivo.

¹²Mordekai cu siangpahrang inn kotka ahcun a kir ih Haman cu ningzak in innah ningzak hmaihup phah in a tin.

¹³Cuih thuhla hmuahhmuah cu a nupi le a rualpi pawl hnenah a sim thluh. Cutikah a nupi le mifimzet a rualpi pawl in a hnenah, “Mordekai in a lo laan deuh zo a si cu! Anih cu Judah mi a si ih ziangti hmanin na ti thei nawn lo ding. A lo neh tengteng ding a si,” tiah an ti.

¹⁴Cutiih an ṭong rero lai ahcun siangpahrang inn ih tilpermi pawl an ra ih Haman cu Esther ih zanriah do-nakah zamrangin an feh pi.