Read Falam Chin ESTHER 9 Bible Online

ESTHER 9 - Falam Chin bible

ESTHER 9

¹Cule Adar thla, ni hleithum ni cu a ra thleng. Cuih ni cu siangpahrang thuthan mi an tuah suak ni, Judah mi a huatu pawl in Judah mi parih diriam in thil ṭha lo tuah dingih an beisei ni a si. Asinain Judah mi sawn in an neh riangri.

²Cuih ramsung khua ih Judah mi umnak veng kipah Judah mi pawl siatsuah a duhtu pawl siatsuah dingah Judah mi pawl cu hmunkhat ah an ṭang. Mi hmuahhmuah in Judah mi pawl cu an ṭih, a dodal theitu ding zohman an um lo.

³Ramṭhen uktu bawi, ram uktu bawi, bawi dangdang le siangpahrang palai thlahmi pawl tla in Judah mi cu an bawm; ziangahtile Mordekai an ṭih.

⁴Siangpahrang inn ah Mordekai cu thuneitu a si ih a thuneihnak cu a ṭhang deuhdeuh ti cu Persia ram sungah theih thluhmi a si.

⁵Curuangah Judah mi pawl in an ral pawl cu an duhduh in an tuah. Ralnam in an sat, an that ih an siatsuah thluh a si.

⁶Susa Khawpi khalah Judah mi pawl in minung zanga an that.

⁷Judah mi a raltu Hammedatha ih fapa Haman ih fapa pahra pawl: Parshandatha, Dalfon, Asfatha, Poratha, Adalia, Aridatha, Parmashta, Arisai, Aridai le Vaizatha tla an that. Asinain zo ih thil hman an long lo.

¹¹Cuih ni ah Susa Khawpi ah mi ziangzat an that ti siangpahrang an sim.

¹²Cutikah siangpahrang in siangpahrang bawinu Esther hnenah, “Susa Khawpi lawnglawngah Judah mi pawl in minung zanga le Haman ih fapa pahra an that zo. Ramṭhen dangah ziangtlukin that na hai maw! Ziang so na duh hrih? Ka lo pe ding. Na duhmi i sim hrih awla ka lo pe ding,” tiah a ti.

¹³Esther cun, “Siangpahrang bawipa na lung a kim ahcun Judah mi pawl in tuih sunah Susa Khawpi ih an tuahmi vek hi thaisun khalah tuah hrih hai seh. Cule Haman ih fapa pahra ih ruak cu thlaithahnak parah thlai siseh,” a ti.

¹⁴Esther timi vekcun siangpahrang in thu a pek ih Susa ah thu an than. Haman ih fapa pahra ih ruak cu senpi hmuh ah an thlai.

¹⁵Cule Adar thla, ni hleili ni ah Judah mi pawl cu hmunkhat ah an khawm aw ih Susa Khawpi ah a dang minung zathum an that. Asinain zo ih thil hman an long lo.

¹⁶Ramṭhen kipah Judah mi pawl cu an tongkhawm aw ih an ṭang tlang. Anmah huatu an ral pawl cu minung thawng sawmsarih le thawngnga an that. Asinain thil an long lo.

¹⁷Cuih ni cu Adar thla, ni hleithum ni a si. A thaisun ni hleili ni cu thah awknak zianghman a um lo ih lungawi puai tuah ni ah an hmang.

¹⁸Asinain Susa Khawpi ih Judah mi pawl cun ni hleithum ni le ni hleili ni ah mi an that ih ni hleinga ni ah an colh hrangah ni hleinga ni cu puai ni ah an hmang.

¹⁹Curuangah khawte lam hla deuh ih a ummi Judah mi pawl cun Adar thla ni hleili ni cu lungawi puai tuah ni, rawl einak puai an tuah ni le pakhat le pakhat laksawng an pek awk ni ah an hmang.

²⁰Cun hi thil a cangmi pawl hmuahhmuah cu Mordekai in ca sungah a khum thluh. Persia ukmi ram sungih a ummi Judah mi hmuahhmuah hnenah ca a ngan ih,

²¹kumtinte Adar ni hleili ni le ni hleinga ni cu puai ni ih hmang ringring dingah thu a than.

²²Hi ni cu Judah mi pawl in an ral pawl an cemter ni an si. Hi thla riahsiatnak le vansaannak cu lungawinak le thinnomnak ih an canter thla a si. Hi ni hnih cu lungawinak puai, rawl eitlangnak puai le pakhat le pakhat laksawng an pek awk ni le mifarah pawl thil an ṭhen ni si dingah thu a than.

²³Curuangah Mordekai thuthan mi cu Judah mi pawl in an thlun ih an puai cu kumtin tuahmi puai ah a cangta.

²⁴Agag tesinfa Judah mi a raltu, Hammedatha ih fapa Haman in Judah mi pawl siatsuah duh ah le an ci ih hmih thluh duh ah “Purim,” timi camcawhfung a rak zuuk.

²⁵Sikhalsehla Esther cu siangpahrang hnenih a feh ruangah siangpahrang in thu a pek ih, Judah mi pawl hremnak ah a timi cu amah Haman in a tuar riangri; amah le a fapa pahra pawl cu thlaithahnak parah thlai an si.

²⁶Curuangah Judah mi pawl ih an tuah mi puai cu, “Purim,” an ti; Purim ti cu “Camcawhfung,” tican a si. Mordekai ih cakuat mi ruangah le an parih thil a cangmi pawl ruangah,

²⁷Judah mi pawl in anmah hrang, an tesinfa pawl hrang le Judah mi ih can a duhmi pawl hrangah, hi ni hnih cu kumtinte a tikcu caan ah, Mordekai ih thuthan mi vekin, ul ringring dingah daan an tuah a si.

²⁸Judah mi innsang ciar in, sankhat hnu sankhat, khuatin le ramtin ah cat nawn loin hi Purim puai cu an ulh ringring ding mi a si.

²⁹Cun Abihail ih fanu siangpahrang bawinu Esther in Mordekai ih a rak nganmi Purim thu ih cakuat mi hlei ah hmualneizet a dang cakuat cu Mordekai thawn a ngan a si.

³⁰Esther cakuat cu Judah mi hmuahhmuah hnenah le Persia ukmi ram, ramṭhen za le kul hluansarih ah an kuat thluh. Cuih cakuat sungah cun Judah mi pawl ih daihnak le humhimnak hrang thlaza camnak a telh ih,

³¹rawl ulhnak le riahsiatnak caan hrangih daan an neih vekin Purim puai ni pawl cu feltein an tesinfa san tiangin a tikcu caan ah hmang dingah thupeknak tla a telh. Himi cu Mordekai le Esther an pahnih ih thupekmi a si.

³²Esther ih thupekmi in Purim puai hman daan pawl cu a hngetter ih a thupekmi cu ca sungah an khum thluh.