Read Falam Chin SUAHLANNAK 10 Bible Online

SUAHLANNAK 10 - Falam Chin bible

SUAHLANNAK 10

¹BAWIPA in Moses hnenah, “Faro hnenah va feh aw. Hi bangtuk mangbangza ka tuahsuaknak dingah amah le a kuthnuai bawi pawl ih thinlung cu ka hakter zo.

²Anmah lakah hi bangtuk mangbangza ka tuah ih Izipt mi pawl kha hnihsuahsainak menih ka hman hi na tu le na fa hnenih na run sim dingah a si. BAWIPA ka si hi nan zatein nan thei leh ding,” tiah a ti.

³Cuhrangah Moses le Aaron cu Faro hnenah an feh ih a hnenah, “Hebru mi pawl ih Pathian, BAWIPA ih a simmi cu: ‘Ka hmaika-ah ziangtik tiangso lungnem tangdor duh loin na um ding? Keimah in biak theinak dingah ka minung pawl cu feh hai seh.

⁴Ka minung pawl thlah ding na el thotho a si ahcun thaisun ah na ramsung ah kharbok ka run thlah ding.

⁵Kharbok cu an tam tukah leilung malte hman lang loin an khuh mepmep ṭheh ding. Rial ih a siatsuah lomi thil hmuahhmuah an ei ding ih na ram sungih thingkung hmuahhmuah an ei ṭheh ding.

⁶Culawng si loin na siangpahrang inn, na kuthnuai bawi pawl ih inn le na minung pawl hmuahhmuahih inn khal an khat ṭheh ding a si. Na pu le na pa pawl le nan cithlahtu pawl hi ram an thlen pek ihsin thokin an ton dah keel lomi thil siava a si ding,’ a ti,” tiah an ti. Cule an her sal ih Faro hnen ihsin an suak.

⁷Cutikah Faro ih kuthnuai bawi pawl in, “Ziangtik tiangso hi pa in hnaihnawhnak in pek ding? BAWIPA an Pathian cu an biak theinak dingah mipa pawl cu feh ko hai seh. Ziangahtile Izipt ram a siat zo hi na hmu lo maw?” tiah Faro cu an ti.

⁸Cutikah Moses le Aaron cu an va ko sal ih Faro in an hnenah, “Nan va feh pei ih BAWIPA nan Pathian cu nan va biak a si pei cu! Asinain zo pawl so a feh ding?” a ti.

⁹Cule Moses in, “Kan zatein kan feh ding; kan fanau le kan nutar le kan patar pawl khal an tel ding. Kan fapa kan fanu, kan tuu le kan me le kan caw pawl thawn kan feh ding, ziangahtile BAWIPA hrangah thawinak puai kan tuah ding a si,” tiah a ti.

¹⁰Cutikah Faro in an hnenah, “A ṭha ko; BAWIPA in lo bawm seh. Sikhalsehla nan fanau le nan nunau pawl cu nan fehpi lo pei. Kan hrangih harsatnak suahter dingah in phiar rero a si ti cu a fiang.

¹¹Annih cu an feh lamlam zik lo! Mipa lawnglawng nan feh pei ih BAWIPA cu nan biak pei. Nan dilmi cu cumi a sisi,” tiah a ti. Cuthluh in Faro hnenin a dawi in an dawi hai.

¹²Cutikah BAWIPA in Moses hnenah, “Izipt ram sungih kharbok a thlennak dingah na baan cu phar aw. Thingkung hramkung a nungmi hmuahhmuah le rial ih a siatsuah lomi pohpoh cu an ei thluh ding a si,” tiah a ti.

¹³Curuangah Moses cun a kianghrol a thlir ih BAWIPA in nisuahnak lam ihsin thli a rak hranter ih sun nihlawh le zan khuavar a hrang. Zinglam ah thli cun kharbok pawl cu a rak hrancih ciamco.

¹⁴Izipt ram khuazakip ah an thleng ih a ram pumpuluk in an khat. Kharbok cu an tamtuk ih cubangtuk cu an hmu dah lo. Hmailam khalah cubangtuk cu an hmu nawn lo ding.

¹⁵Leiram lang loin an khuh ṭheh ih an khuh tukah a dum in a dum hmerhmer. Rial ih a siatsuah lomi thingkung hramkung le thingrah hmuahhmuah an ei ṭheh. Izipt ramsung hmuahhmuah ah thingkung le hramkung parah hnah hring pakhat hman a taang nawn lo.

¹⁶Cutikah Faro in Moses le Aaron cu zamrangte in a ko ih, “BAWIPA nan Pathian hmai le nanmah hmaiah ka sual zo a si.

¹⁷Curuangah atu voikhat cu ka sualnak i ngaithiam hram uhla hi in pekmi ṭihnungza hremnak hi ka hnen ihsin la sal dingah BAWIPA nan Pathian hnenah i dil sak hram uh,” tiah a ti.

¹⁸Cule Faro hnen ihsin Moses cu a suak ih BAWIPA ih hnenah thla a cam.

¹⁹Cutikah BAWIPA in nisuahnak lam thli cu nitlaknak lam thli cakzetah a vun thleng ih acuih thli cun kharbok pawl cu Tipi Sen [9] sungah a hran thlak thluh. Izipt ram pumpi ah kharbok pakhat hman a taang nawn lo.

²⁰Asinain Faro ih thinlung cu BAWIPA in a hakter thotho ih Israel mi pawl cu a fehter duh cuang lo.

²¹BAWIPA in Moses hnenah, “A sah ih tuk taakah pah luihlo tlak thimkhawzing in Izipt ram sung khuh ṭheh dingah na baan cu van ah phar aw,” tiah a ti.

²²Curuangah Moses in a baan cu van ah a phar ih Izipt ram cu thimkhawzing sahzetin ni thum sung a khuh thluh.

²³Cutiih khua a thim ruangah Izipt mi pawl cu pakhat le pakhat an hmu aw thei lo ih ni thum sung zohman lengah an suak thei lo. Asinain Israel mi umnak ram ahcun khua a vang ringring ko.

²⁴Faro in Moses a ko ih a hnenah, “BAWIPA biak dingah feh uh. Nan nunau pawl le nan nauhak pawl khal nan hnenah feh ko hai seh. Asinain nan tuu, nan me le nan caw pawl lawngte nan taanta pei,” tiah a ti.

²⁵Cule Moses in, “BAWIPA kan Pathian hnenah mei-ur thawinak le thawinak dang hrangih a ṭulmi ṭilva pawl cu nangmah in in ruahsak a ṭul ding.

²⁶Cuhrangah kan ṭilva pawl cu kan hnenah an feh thluh a ṭul a si; pakhat hman kan taanta lo pei. BAWIPA kan Pathian biaknak ih kan hman dingmi ṭilva cu kan hril ding ih a hmun kan va thlen hlanah cun kanmah khal in BAWIPA kan biaknak ah khuimi kan hmang pei ti kan thei ve hrih lo,” tiah a ti.

²⁷Asinain Faro ih thinlung cu BAWIPA in a hakter ruangah Israel mi pawl cu a fehter duh thotho lo.

²⁸Cutikah Faro in Moses hnenah, “Ka hmuh ban lonak ah tlanhlo aw. Ka lo hmuh sal nawn lonak dingah ralring aw, ziangahtile ka lo hmuh sal citcet ahcun cuih ni cu na thih ni a si ding,” tiah a ti.

²⁹Cule Moses in, “Na ti bangin si ko seh; ziangtik hmanah ka hmai i hmu nawn lo ding,” tiah a ti.