Read Falam Chin SUAHLANNAK 13 Bible Online

SUAHLANNAK 13 - Falam Chin bible

SUAHLANNAK 13

¹BAWIPA in Moses hnenah,

²“Fapatir hmuahhmuah cu keimah hnenah nan pek ding. Israel mi lakih fapatir pohpoh cu ka ta an si; ṭilva lak khalah a pa fatir cu ka ta an si,” tiah a ti.

³Moses in Israel mi hnenah, “Izipt ram, salih nan tannak ram ihsin nan suah ni, tuihsun hi ciing ringring uh; ziangahtile BAWIPA in a baan thacak in a lo suah ni a si. Thilnu telmi sang nan ei hrimhrim lo pei.

⁴Abib [12] thla, tuihsun ah Izipt ram in nan suak a si hi!

⁵BAWIPA in Kanaan mi, Hit mi, Amor mi, Hiv mi le Jebus mi tla-ih umnak ram cu nan hnenih pe dingin nan pu le nan pa hnenah Amah ih hmin saal in thu a rak kam zo. Cuih ram cu cawhnawi le khuaitizu a luannak ram a si. Curuangah cuih ram nan thlen tikah Abib thla tengteng ah thilnu tel lo sang puai tuah cu nan hngilh lo pei.

⁶Ni sarih sung cu thilnu tel lo sang nan ei pei ih a ni sarihnak ah BAWIPA hrangah puai nan tuah pei.

⁷Ni sarih sung cu thilnu tel lo sang nan ei pei. Thilnu telmi sang siseh, thilnu siseh nan ramsung hrimhrim ah nan umter lo pei.

⁸‘Hi hmuahhmuah kan tuahnak cu Izipt ram ihsin kan suah tikah kanmah hrangah BAWIPA ih thil tuahmi hngilh lonak a si,’ tiah cuih ni-ah nan faale pawl hnenah nan sim pei.

⁹Hiti nan tuahnak cu dunglam thu a lo theih tertu, nan kutah siseh, nan cal ah siseh hminsinnak bangtuk a si ding ih, cuti lawngin BAWIPA ih daan cu a sim le a rel nan dai lo ding; ziangahtile a cahnak huham thawn BAWIPA in Izipt ram ihsin a lo suah hai a si.

¹⁰Kum khat hnu kum khat a camah feltein nan tuah ringring pei.

¹¹“BAWIPA in Kanaan mi pawl ih ramah a lo thlenter hai ding; ziangahtile Amah ih hmin saal in nan pu le nan pa hnenah thu a rak kam zo. Cuih ram cu nan hnenih a lo pek tikah,

¹²nan fapatir hmuahhmuah cu BAWIPA hnenah nan hlan ding. Nan ṭilva-ih hrin hmaisa bik fatir a pa tla BAWIPA ih ta an si.

¹³Asinain laak fatir a pa cu tuu faate in nan tlen pei; nan tlen duh lo asile a hngawng nan khiak pei. Nan fapatir pohpoh cu nan tlen sal pei.

¹⁴Nehhnu ah nan fapa in, ‘Hitiih nan tuah mi hi a tican ziangso a si?’ tiih a lo sut asile, ‘BAWIPA in kan saltaannak Izipt ram ihsin a cahnak huham thawn in rak suah a si.

¹⁵Faro a thinlung a hak ih Izipt ram ihsin in suah duh lo tikah, Izipt ramih fapatir hmuahhmuah, milai fapa siseh, ramsa fa siseh BAWIPA in a rak that ṭheh. Curuangah fapatir pohpoh cu BAWIPA hnenih hlan an sinak a si; asinain ka fapatir cu ka tlen sal a si,’ tiah nan ti pei.

¹⁶Hitiih nan tuahnak cu dunglamih thu a lo theihtertu, nan kutah siseh, nan cal ah siseh hminsinnak bangtuk a si ding; ziangahtile Izipt ramsung ihsin BAWIPA in a cahnak huham thawn in suah a si,” tiah a ti.

¹⁷Faro in Israel mi pawl a fehter tikah, Filistia tipikap ih a fehmi lamzin cu a tawi bik asinain BAWIPA in hi lamzin cun a hruai hai lo. Ziangahtile Pathian in, “Ral an do dingmi pawl an hmuh tikah an thinlung thleng aw in Izipt ramih an kirsal ding cu ka duh lo,” tiah a ti.

¹⁸Cuih lamzin ai-ah, nelrawn ramṭhing zin ihsin Tipi Sen [13] lamah BAWIPA in a heelpi a si. Israel mi pawl cu ral do dingah timtuah cia in Izipt ihsin an suak.

¹⁹Moses in Josef ih ruh khal a keng; ziangahtile amah Josef in Israel mi pawl cu siatcam in thu a kamter ciami an si. An hnenah, “Pathian in a lo runsuak hai ding a si. Cutikah hitawk ihsin nan suah tikah ka ruh nan keng pei,” tiah Josef in a rak ti.

²⁰Sukkoth ihsin Israel mi pawl cu an pok ih nelrawn kiangte Etham ah an riak.

²¹Sun ah an lamzin hmuhtu dingah mero zual in BAWIPA cu an hmaiah a feh. Zan a si tikah tleunak pe dingah le a sun a zanih an feh theinak dingah meisa zual in BAWIPA cu an hmaiah a feh.

²²Israel mi hmaiah cat loin sunah mero zual a um ih zanah meisa zual a um.