Read Falam Chin SUAHLANNAK 17 Bible Online

SUAHLANNAK 17 - Falam Chin bible

SUAHLANNAK 17

¹Israel mi pawl cu an zatein Sin an timi nelrawn ramṭhing ihsin an pok ih BAWIPA ih thupek bangtuk in hmunkhat in hmunkhatah an riak vivo. Voikhat cu Refidim ah an riak ih cutawk hmunah an hrangah tidai a um lo.

²Moses thawn an to-aw ih Israel mi pawl in, “Tidai in ding in pe-aw he,” an ti. Cutikah Moses in, “Ziangah so keimah cu in tawh? Zianghrangah BAWIPA cu nan hniksak?” tiah a ti.

³Asinain mipi pawl cu an ti a haal tuk ruangah Moses parah an phunzai thotho. “Ziangah so Izipt ram ihsin in suahpi? Kan ṭilva le kan tefa pawl thawn tihal in thi thluh hai seh ti in duh ruangah maw a si?” tiah an ti.

⁴Cule Moses cu nasazetin BAWIPA hnenah thla a cam ih, “Himi pawl hi ziangtinso ka ti ding? Keimah lehlam lungto in a deen in tum zuakzo thlang a si,” tiah a ti.

⁵Cutikah BAWIPA in Moses hnenah, “Israel mi hruaitu lakin a hrekkhat rak hruai awla, mi burpi ih hmaiah rak feh sung uh. Nail tiva na vuaknak na kianghrol kha keng awla feh aw.

⁶Sinai tlang ih lungpi parah na hmaiah ka rak ding ding. Lungpi cu vua awla misenpi hrangah in ding tidai a suak ding,” tiah a ti. BAWIPA ih a ti bangtuk in Israel mi hruaitu pawl ih hmaiah cun Moses in a tuah.

⁷Cuih hmun cu, “Massah,” le “Meribah,”[20] tiah an ko; ziangahtile Israel mi pawl an to-aw ih BAWIPA cu hniksak tahrat in, “BAWIPA kan hnenah a um maw, um lo so?” tiah an tinak hmun a si.

⁸Israel mi pawl cu Refidim ah Amalek mi pawl in an ra do.

⁹Cutikah Moses in Joshua hnenah, “Kanmah lakin mi hrekkhat hril awla, Amalek pawl va do dingah thaisun ah feh aw. Kei cu tlang parah ka ding pei ih Pathian ih i pek mi kianghrol hi ka thlir ding,” tiah a ti.

¹⁰Moses ih fial bangtuk in Joshua in a tuah ih Amalek pawl do dingah a feh; cule Moses, Aaron le Hur cu tlang parah an kai.

¹¹Moses in a baan a thlir sung pohpoh cu Israel mi pawl in an ral an neh vivo; asinain a baan a ṭhum tikah cun Amalek mi pawl in an rak neh deuh ṭheu.

¹²Cun Moses cu a baang zet; a baan tla a zawng ih Aaron le Hur in lungto an lak ih a hnuai ah an ret, acuih parah Moses cu a to ih annih pahnih cu a kapah dingin a baan pawl cu an kai ih an thlir sak. Zanlam nitlak tiang a baan cu an thlir sak ringring.

¹³Curuangah Amalek pawl cu Joshua in a neh ṭheh a si.

¹⁴Cun BAWIPA in Moses hnenah, “Ciin ringringmi a sinak dingah hi ralnehnak thu hi cabu sungah ngan aw; cun Joshua khal sim aw. Cule Amalek mi pawl cu hloral tata dingin ka tuah ding a si,” tiah a ti.

¹⁵Cutawkah Moses in biakṭheng a don ih, “BAWIPA cu ka Thantar a si,” tiah hmin a sak.

¹⁶Cule Moses in, “BAWIPA ih thantaar khaisaang uh. Ziangahtile BAWIPA in Amalek mi pawl cu sankhat hnu sankhat a do ringring ding,” tiah a ti.