Read Falam Chin SUAHLANNAK 18 Bible Online

SUAHLANNAK 18 - Falam Chin bible

SUAHLANNAK 18

¹Midian ramih puithiam, Moses ih pu Jethro in Moses le a minung Israel mi pawl hrangah Pathian ih a tuahmi hmuahhmuah le Izipt ram ihsin BAWIPA ih a suahternak thu tla cu a rak thei ṭheh.

²Cutikah Moses ih nupi, a pu hnenih a kuatmi, Zipporah cu Jethro in Moses hnenah a ratpi.

³Jethro in Zipporah ih fapa pahnih, Gershom le Eliezer khal a rak hruai. Moses in, “Tluang ramah ramdang mi ka si,” tiin a fapa pakhat cu a hmin ah Gershom[21] a sak ih,

⁴a pahnihnak cu, “Ka pa ih Pathian cu i bawmtu a si ih Faro ih ralnam ihsin i run a si,” a ti ih a hminah Eliezer[22] a sak.

⁵Jethro cu Zipporah le a fapa pahnih thawn Pathian tlang thiang kiangih Moses a riahnak ramṭhing ahcun an ra.

⁶Cun Moses hnenah a pu in, “Keimah na pu Jethro cu na nupi le na fapa pahnih thawn kan ra a si,” tiah thu a hei than.

⁷Cutikah Moses cu amah hmuak dingah a feh ih a ton tikah a hmaiah a kun ih a hnam. Cule an harhdam le dam lo thuhla an sut-awk hnuah Moses ih riahbuk sungah an lut.

⁸Moses cun Israel mi pawl ih ruangah BAWIPA in Faro le Izipt mi pawl parih a tuahmi hmuahhmuah cu Jethro hnenah a sim ṭheh. Lamzin ih harsatnak an tonmi le BAWIPA ih a runnak thu tla a sim ṭheh.

⁹Cutiih Izipt mi kutsung ihsin a runsuaknak ruangih BAWIPA ih ṭhatnak thu a theih tikah Jethro cu a lung a awi ngaingai ih,

¹⁰“Faro le Izipt mi pawl hnen ihsin a lo runtu BAWIPA cu thangṭhat uh. Izipt mi pawl hnuai ih saltuarnak ihsin a minung a runsuaktu BAWIPA cu thangṭhat uh.

¹¹BAWIPA cu khawzing dang hmuahhmuah hnakin a tum sawn a si ti ka thei; ziangahtile Izipt mi pawl in Israel mi pawl ih parah huatnak thawn hna an ṭuan laiah hi thil hmuahhmuah hi a tuah a si,” tiah a ti.

¹²Cule Jethro in Pathian hnenah raithawinak le mei-ur thawinak a pek ih, Aaron le Israel mi hruaitu pawl cu Moses ih pu Jethro thawn BAWIPA ih hmaiah rawl an hil tlang a si.

¹³A thaisun ah Moses cu a minung pawl ih thuṭhen dingah a to ih, a hmaiah mipi pawl cu zing ihsin zanlam tiang an ding.

¹⁴Moses ih pu Jethro in cumi a hmuh tikah Moses hnenah, “Mipi pawl hrangih thiltuah na tummi hi ziangso a si? Ziangah so nangmah lawng hiti in na to ih midang hmuahhmuah cu na kimvelah zing ihsin zanlam tiang an din ringring?” tiah a ti.

¹⁵Cutikah Moses in, “Hitiih ka tuah cu a ṭul hrimhrim a si. Ziangahtile Pathian ih duhmi ziangso a si ti theih duh ah mipi pawl cu ka hnenah an ra.

¹⁶Mi pahnih thu an el awk tikah ka hnenah an ra ih cutikah zoso a mawh, zoso a mawh lo tiin thu cu ka relcat sak ih an hnenah Pathian thukham le daan pawl cu ka sim,” tiah a ti.

¹⁷Cutikah Jethro in, “Na thil tidaan hi a dik lo.

¹⁸Nangmah le nangmah na siatsuah-aw ding ih hi mipi pawl khal na siatsuah ding a si. Na thil timi hi a tam tuk. Nangmah pakhat lawngin na ti cawk lo ding.

¹⁹Curuangah ka thu i ngai aw. Ruahnak ṭha ka lo pe ding ih na hnenah Pathian a um ding. Nang cu Pathian hnenah misenpi ih palai na si pei ih an thu cu a hnenah na thlen ding.

²⁰Cun Pathian thukham le daan pawl cu an hnenah na zirh ding ih an nundaan ding le an tuah dingmi cu na simfiang ding.

²¹Asinain thilti theinak a neimi mi hrekkhat hril awla cu pawl cu Israel mi hruaitu dingah ret aw. A thawngthawng, a zaza, sawmnga le pahra-ih hruaitu tla an si ding. Anmah cu Pathian ṭihzahtu le rinsan tlakmi an si pei ih nawhthuh pek theih lomi an si pei.

²²Cumi pawl cu a kumkhua in mipi pawl ih thuṭhentu si hai seh. Thuhar deuhdeuh cu na hnenah an thlen pei. Asinain thu nepnawi pawl cu anmah tein rel hai seh. Cutiin na tuah asile na thilrit an lo phurh bawm ah a cang ih na nuam deuh ding a si.

²³Pathian ih duhnak a si bangin cutiin na tuah asile nangmah le nangmah na siatsuah-aw lo ding ih mipi ih thu cu relcat sak ṭheh an si ding ruangah an innah thawsuakin an kir ding a si,” tiah a ti.

²⁴Moses in Jethro ih thu cu a ngai ih a tivek cun a tuah.

²⁵Israel mi sung ihsin thil titheinak a neimi pawl a hril ih misenpi hruaitu dingah a ret hai. A thawngthawng, a zaza, sawmnga nga le pahra hra-ih hruaitu an si.

²⁶An nunsungah cat loin misenpi ih thuṭhentu an ṭuan. Thu harsa pawl cu Moses hnenah an thlen. Asinain thu nepnawi pawl cu anmah tein an rel.

²⁷Cuih hnuah Moses in a pu cu cibai a buk ih Jethro cu a ramah a tlung.