Read Falam Chin SUAHLANNAK 19 Bible Online

SUAHLANNAK 19 - Falam Chin bible

SUAHLANNAK 19

¹Israel mi pawl cu Izipt ram ihsin an suah hnu thlathumnak ni khat ni-ah Sinai nelrawn ah an thleng.

²Refidim ihsin an pok ih Sinai nelrawn an thlen tikah Sinai tlang hmaizawn ah an riak.

³Cule Moses cu Pathian tong dingah tlang parah a kai. Tlangpar ihsin BAWIPA in Moses cu a ko ih a hnenah, “Jakob ih tesinfa pawl Israel mi hnenah hiti in sim aw,

⁴‘Izipt mi pawl parih ka tuahmi cu nan hmu zo a si ih nannih cu muvanlai in a thla parih a fano a thiar bangtuk in ka hnenah ka lo thiar, ti khal nan hmu zo. Cuticun hitawk ka hnenah ka lo thlenpi hai a si.

⁵Atu ka thu nan ngai ih ka thukham nan thlun asile nannih cu keimah ih minung nan si ding. Leilung pumpi hi ka ta a si, asinain nannih cu keimah ih hrilmi, ka minung hleice nan si ding.

⁶Nannih cu keimah hrangih pekmi miphun thiang, puithiam hnaṭuannak sungah keimah i riantu miphun nan si ding,’ tiin Israel mi pawl hnenah sim aw,” tiah a ti.

⁷Curuangah Moses cu a feh ih Israel mi hruaitu pawl a ko khawm ih BAWIPA ih thupekmi hmuahhmuah cu an hnenah a sim.

⁸Cutikah misenpi in, “BAWIPA ih sim bangtuk in kan tuah thluh ding,” tiah hmunkhatah an let tlang. Moses in Israel mi pawl ih thulehnak cu BAWIPA hnenah a va sim sal.

⁹Cutikah BAWIPA in Moses hnenah, “Nangmah ih hnenih thu ka sim tikah mipi pawl in an theih ih an lo zum ringringnak dingah na hnenah mero sahzet sungin ka ra ding a si,” tiah a ti. Cule mipi pawl ih thulehnak cu Moses in BAWIPA ih hnenah a va sim sal.

¹⁰BAWIPA in Moses hnenah, “Mipi pawl hnenah feh awla, BAWIPA bia dingah tuihsun le thaisun an tim tuah-aw hai seh. An hnipuan an sawp pei ih,

¹¹tipsun ahcun timtuah ciain an um pei. Cuih ni-ah mi zate ih hmuh dingin Sinai Tlang ah ka rung ṭum ding.

¹²Sinai tlang a kimvel in mipi pawl hrangah ramri na tuah pei ih, ‘Tlang parih nan kai lonak dingah le a hram tla nan tham lonak dingah ralring uh. Mi pakhatkhat in a tham asile cu pa cu thah a si ding.

¹³Amah cu zohmanih tham loin lungto ih den that a si ding, a si lole thal in kah that a si ding. Minung a si khalle ṭilva a si khalle thah a si ding,’ tiin sim aw. Tuucang ki an tum tik lawngah mipi pawl cu tlang ah an kai pei,” tiah a ti.

¹⁴Cutikah Moses cu tlangpar ihsin a ṭum ih, Pathian bia dingah mipi pawl cu an tim a tuahter. An hnipuan an sawp ih,

¹⁵Moses in, “Tipsun cu timtuah ciain um uh; nunau hnen khalah it hlah uh,” tiah a ti.

¹⁶A ni thumnak ni zinglamah cun tlang parah khua a ri ih nimthla a kau zukzo. Mero sahzet a um ih tuucangki ringzet ih tummi a thang. Riahbuk ih a ummi hmuahhmuah cu an thinphang in an khur.

¹⁷Cutikah Moses in mipi pawl cu Pathian tong dingah an riahbuk ihsin a suahpi hai ih tlang hramah cun an ding.

¹⁸Sinai tlang hmuahhmuah cu meikhu in a tuam ṭheh. Ziangahtile BAWIPA cu tlang parah meisa in a rung. Meikhu cu cahmang meikhu vekin a kai ih Sinai tlang cu a pumpi in a hnin durdo.[23]

¹⁹Tuucang ki tummi cu a thang sinsin. Moses a ṭong tikah Pathian in khuari in a run let.

²⁰BAWIPA cu Sinai tlang parih a rung ṭum tikah BAWIPA in Moses cu tlangzim parah a ko ih a kawh vekin a hung feh.

²¹Cutikah BAWIPA in Moses hnenah, “Vung feh awla keimah ra zoh duh ah ramri tla an lan lonak dingah mipi pawl ralrinnak vung pe aw. Culo ahcun mi tampi an thi ding a si.

²²Ka hnenih a rami puithiam pawl hman an thianfaiter-awk a ṭul; culole ka cawh hai ding a si,” tiah a ti.

²³Cule Moses in BAWIPA ih hnenah, “Mipi pawl cu an hung thei lo ding. Ziangahtile hi tlang cu a ri tuah uhla tlang thiangah ret uh, tiah ralrinnak Nangmah in pe zo a si,” tiah a ti.

²⁴BAWIPA in, “Vung feh awla na hnenah Aaron hun hruai aw. Asinain puithiam pawl le mipi pawl cun ramri lan hrimhrim hlah hai seh. Culo ahcun ka hrem hai ding a si,” tiah a ti.

²⁵Curuangah Moses cu a vung ṭum ih misenpi hnenah a vung sim.