Read Falam Chin SUAHLANNAK 2 Bible Online

SUAHLANNAK 2 - Falam Chin bible

SUAHLANNAK 2

¹Cuih caanah Levi mi pakhat in a phunpi nunau pakhat a ṭhi.

²A nupi cu fa a vun ih fapa a hring. Fapa mawizet a si tikha a nu in a hmuh tikah thla thum sung a thup.

³Asinain a thuh thei nawn lo tikah phaipheng ih tuahmi bawm pakhat a lak ih tidai lut thei lo dingin cingthling le khuaiseng a hnih. A sungah naute cu a hlum ih tivapi kap hrampi sang zetzet lakah a ret.

⁴Ziang a cang pei ti theih duh ah a u nu cun hlat nawn in a thlir.

⁵Cutikah Faro ih fanu tibual dingah tiva ah a ra ih a zawng-um nunau pawl cu tivakap ahcun lam an leng. Faro ih fanu in hrampi lakih bawm cu a hmuh tikah la dingah a zawng-um nu a fial.

⁶Faro ih fanu in bawm cu a on tikah naute cu ṭap rero ih a um kha a hmu. A zaangfahzet ih, “Hebru naute a si hi!” a ti.

⁷Cutikah cuih a u nu cun, “Hi naute a lo zohsaktu dingah Hebru nunau pakhat ka va ko pei maw?” tiah a sut.

⁸Cule Faro ih fanu in, “Va ko aw,” a ti. A va feh ih amah ih nu rori a va ko.

⁹Cutikah Faro ih fanu cun, “Hi naute hi i rak zohsak awla na zoh man cu ka lo pe ding,” tiah a ti. Curuangah cuih naute cu a nu in a lak ih ṭhatein a zoh.

¹⁰Naute cu a hung upat deuh tikah a nu cun Faro ih fanu hnenah a hei fehpi ih Faro ih fanu cun amah ih fapa-ah a tuah. “Tidai sungin ka suahmi a si,” a ti ih a hminah Moses[1] a sak.

¹¹Tawkfang a hung rei hnu, Moses a upat deuh tikah a miphun pawl a va leng. Cutiih a va len tikah a miphun pawl cu Izipt mi pawl in hranhram ih hnaṭuan khung an ṭuanter kha a hmu. Cuih tlunah a phunpi Hebru mi pakhat Izipt mi pa ih a vuak kha a hmu.

¹²A kiangkap a zoh ih zohman a hmuh lo tikah Izipt mipa cu a that ih a ruak cu vunnel sungah a thup.

¹³A thaisun ah a phunpi pawl hnenih a va feh sal tikah Hebru mi pahnih an sual-awk rero kha a hmu. Cutikah a mawh deuhtu pa ih hnenah, “Ziangah so na phunpi cu na thawi?” tiah a ti.

¹⁴Cutikah anih cun, “Zoin so kan tlunih uktu le thuṭhentu dingah a lo tuah? Izipt pa na thah vekin a thah i tum maw si?” tiah a ti. Cutikah Moses cu a thin a phang ih, “Ka thil tuahmi hi midang in an thei zo a sihi!” tiah a ti.

¹⁵Cumi thu cu Faro ih a theih tikah Moses cu thah a tum. Asinain Moses cu a tlan ih Midian ramih um dingin a feh. Midian ram a thlen tikah tikhur pakhat kiangah a cawl.

¹⁶Midian ramih puithiam Jethro [2] in fanu pasarih a nei. A fanu pawl cu tikhur ah an ra ih, an pa ih tuu le me hrangah tidai an khai ih an ṭilva tidai innak kuang sungah an thlet.

¹⁷Culaifang ah tuukhal pawl an ra ih an ra dawi hai. Sikhalsehla Moses in nunau pawl cu a ṭan ih an ṭilva cu tidai a peksak.

¹⁸Cule an pa hnenih an va kir tikah an pa cun, “Ziangtin so tuihsun bul tuanih nan tlun thei?” tiah a sut.

¹⁹“Izipt pa in tuukhal pawl hnenin in run ruangah a si,” tiah an ti. “Kan hrangah tidai hman in khai sak ih ṭilva pawl tla a tul a si,” an ti.

²⁰Cutikah an pa cun, “Khuiah so a um? Ziangah so cupa cu nan taanta? Va ko uhla kan hnenah rawl ra ei seh,” tiah a fanu pawl cu a fial.

²¹Cuticun Moses cu Midian ramah cun a um ih Jethro in a fanu Zipporah cu Moses ih nupi dingah a pek.

²²Zipporah in fapa a nei ih, “Tluang ramah ramdang mi ka si,” a ti ih a hminah Gershom[3] a sak.

²³Kum tampi hnuah Izipt siangpahrang cu a thi. Asinain Israel mi pawl cu sal an tuarnak ruangah an aihram ih an raak an kio lai thotho. Cuti an aihramnak aw cu Pathian hnenah a thleng ih,

²⁴an raak an kionak aw cu Pathian in a thei. Cun Abraham, Isaak le Jakob hnenih a thukammi khal a ciing.

²⁵Israel mi pawl an sal tuarnak cu Pathian in a hmu ih an parah seherhnak a nei.