Read Falam Chin SUAHLANNAK 24 Bible Online

SUAHLANNAK 24 - Falam Chin bible

SUAHLANNAK 24

¹BAWIPA in Moses hnenah, “Tlang parah Aaron, Nadab le Abihu le Israel mi hruaitu sawmsarih thawn ka hnenah ra uhla a hlat nawn in nan lu kunin in ra bia uh.

²Moses nangmah lawng ka kiangah na ra pei. Midang pawl cu in ra naih hlah hai seh; misenpi pawl cu tlangpar hmanah an ra kai lo pei,” tiah a ti.

³Moses cu misenpi hnenah a feh ih BAWIPA ih thupekmi le daan pekmi hmuahhmuah cu an hnenah a sim. Cutikah misenpi in, “BAWIPA ih simmi hmuahhmuah cu kan tuah ṭheh ding,” tiah hmun khatte-ah an ti.

⁴Cule BAWIPA ih thupekmi pawl Moses in a ngan ṭheh. A thaizing zingpitte-ah acuih tlang hramah Moses in biakṭheng a don ih Israel miphun hleihnih hrangah rolung hleihnih a phun.

⁵Cun mei-ur thawinak a pek ih BAWIPA ih hnenah thawinak pekmi cawcang pawl a thattu Israel mino pawl cu pawlkom thawinak tuah dingah Moses in a fehter.

⁶Moses in caw thisen a hrek cu a lak ih kheng sungah a ret ih a hrek cu biakṭheng parah a theh.

⁷Cun thukam cazual cu a lak ih zapi theih in misenpi hnenah a siar. Misenpi in, “BAWIPA ih thupekmi hmuahhmuah cu kan tuah ṭheh ding ih a thu kan ngai ding,” tiah an ti.

⁸Cutikah Moses in kheng sungih thisen cu a lak ih misenpi parah a theh ih, “Hi thisen cu BAWIPA in nanmah thawn thukamnak a tuah ih a thupekmi hmuahhmuah nemhngetnak thisen a si,” tiah a ti.

⁹Cule Moses, Aaron, Nadab, Abihu le Israel mi hruaitu sawm sarih cu tlang parah an feh ih,

¹⁰Israel mi pawl ih Pathian cu an hmu. A ke hnuai ahcun a thian tukah van fiim a bang kelkelmi mepian lungvarih phahmi lungphah bangtuk a um.

¹¹Israel mi hruaitu pawl in Pathian an hmu naón hlohralnak an tong lo; cutawkah hmun khatah an ei an in tlang.

¹²BAWIPA in Moses hnenah, “Tlang parah ka hnenah ra kai awla hitawk ih na ra um sungah Israel mi thuzirhnak dingih ka ngan ciami thukham le daan pawl cu lungpher in ka lo pe ding,” tiah a ti.

¹³Curuangah Moses le a bawmtu Joshua cu an tim an tuah hnuah Moses cu tlang thianghlim parah cun a hung kai.

¹⁴Cule Moses in, “Kan ra kirsal hlan lo hitawk ihsin in rak hngak uh. Aaron le Hur cu nan hnenah an um ih thupoi a um asile anmah nan rak tong pei,” tiah Israel mi hruaitu pawl hnenah a cahta.

¹⁵Moses cu tlang parah a hung kai ih tlang cu mero in a tuam leihleih ṭheh.

¹⁶BAWIPA ih sunlawinak cu tlang parah a rung thleng ih cu ruangah mero in tlang cu ni ruk sung a khuh. Ni sarih ni-ah Pathian in mero sung ihsin Moses cu a ko.

¹⁷Israel mi pawl hrangah cun BAWIPA ih sunlawinak cu tlangpar ih meisa a kaanghliau reromi a bang.

¹⁸Cuticun Moses cu tlangpar mero sungah ni sawmli le zan sawmli a um.