Read Falam Chin SUAHLANNAK 26 Bible Online

SUAHLANNAK 26 - Falam Chin bible

SUAHLANNAK 26

¹“Ka umnak dingah Puanthlam, coihcinmawi puanṭha mankhung, mepian, sendup le a senmi puan zun hra in nan sak pei. Hi puan pawl cu cherub timi thlanei ramsa lem cuangin mawizetih ṭelhmi puan an si pei.

²Puan pawl cu a saulam kaih hleili le a kauhlam kaih hnih ciar an si pei.

³Zun nga cu nan pehkhawm pei ih a dang zun nga khal nan pehkhawm thotho pei.

⁴Cutiih nan pehkhawmmi puan tlunta bikih zimah mepian puan in a beu pawl nan tuah pei.

⁵Puan pehmi pakhatnak ah beu sawmnga nan tuah pei ih a pahnihnak puan pehmi khalah beu sawmnga in nan tuah pei.

⁶Puanthlam cu umnak pakhat ih cang dingin puan awknak kual sawmnga sui in nan tuah pei ih cumi thawn puan thuah hnih cu nan peh pei.

⁷“Hi Puanthlam khuhnakah mehmul in puan zun hleikhat nan tah pei.

⁸Zun khat cu kaih hleinga a sau pei ih kaih hnih a kau pei ih an zatein an tia-aw thluh pei.

⁹Zun nga kha zun khat cang dingin nan peh pei ih a dang zun ruk khal zunkhat kim ve dingin nan peh pei. A zun ruknak cu Puanthlam ih hmailamah bil hnih ah nan bil pei.

¹⁰Nan pehmi puan khatlam zimah puan beu sawmnga nan tuah pei ih a dang pehmi puanzim khalah beu sawmnga thotho nan tuah pei.

¹¹Puan awh-nak sawmnga dar in nan tuah pei ih Puanthlam pakhat ih cang dingin nan peh ciami puan pahnih cu cuih daar cun nan awk pei.

¹²Puanthlam parih a thlai aw mi puan a hrek cu Puanthlam ih dunglam ah a thlai aw ding.

¹³Puanthlam a sau zawng ih a thlai awmi puan hleimi kaih hrek veve cu Puanthlam khuhtu-ah a sir ah an thlai-aw pei.

¹⁴“Puanthlam khuhnak dingah a senih buhmi tuucang phaw le acuih par a lenglamih khuh dingah saphaw ṭha nan tuah pei.

¹⁵“Hi puanthlam ih phar cu a tung zawng in nan song pei ih lawithing in nan tuah pei.

¹⁶Phar cu tlepkhat ah dong hra a sau pei ih dong khat le hrek ciar an kau ding ih,

¹⁷a pehkomnak ah a kap ciar kha nan khuar pei. Phar a zatein cutiin nan tuah thluh pei.

¹⁸Hi phar pawl nan tuah tikah thlanglam phar hrangah tlep kul nan tuah pei ih,

¹⁹an tawdam cu ngunih tuahmi tawdam sawmli nan ret pei. Nan khuarnak zawn ihsin a hun dotu-ah phar pakhat ah ngun tawdam pahnih fingfing nan tuah pei.

²⁰Saklam phar hrangah tlep kul nan tuah pei ih,

²¹phar pakhat hrangah tawdam pahnih ciar in ngun tawdam sawmli nan tuah pei.

²²Nitlaknaklam, Puanthlam dunglam phar hrangah cun phar tlep ruk,

²³Thlam dunglam kil hrangah phar tlep hnih nan tuah pei.

²⁴Thlamkil pahnih ih phar pahnih cu a tawlam ihsin a luziik tiangin an peh-aw thluh pei. Phar kil pahnih ih phar tlep hnih cu a cutiih tuahmi an si thluh pei.

²⁵Cuhrangah phar tlep riat a um pei ih pakhat hnuai ah ngun tawdam pahnih ciar in ngun tawdam hleiruk an um pei.

²⁶“Lawithing in phartlang nan tuah pei ih siir khatah phartlang panga,

²⁷a dang siir khatah phartlang panga le dunglam nitlaknak lam sir ah phartlang panga nan tuah pei.

²⁸Phar laifang zawnih phartlang cu kil khat ihsin kil khat tiang a saumi a si pei.

²⁹Sui kual pawl nan tuah pei ih phar parah nan bun pei. Phartlang pawl cu acuih suikual sungah nan hrolh pei. Phar siseh, phartlang siseh, sui in nan khuut pei.

³⁰Tlang parih ka lo hmuhmi vekin puanthlam cu nan sak pei.

³¹“Coihcinmawi puan mankhung le mepian, a sen le a sendupmi tuuhmul in puanzar pawl cu nan tuah pei. A cuih puanzar pawl cu cherub timi thlanei ramsa lem mawizetih ṭelhmi an si pei.

³²Ngun tawdam pali ihsin a ding ih sui ih khuutmi lawiṭhuam pali parah suikual in puanzar pawl cu nan thlai pei.

³³Puanthlam khuhnak thawn a peh awmi puan awh-nak ihsin puanzar cu nan thlai pei. Cuih puanzar phenah lungpheng pahnih retnak Thukam Kuang cu nan ret pei. Puanzar cu Hmun Thiang le Hmun Thiang Bik dangtu a si ding.

³⁴Hmun Thiang Bikih a ummi Thukam Kuang cu a sin nan sin pei.

³⁵Puanzar ih lengah cabuai nan ret pei. Cuih cabuai cu saklam kapah nan ret pei ih meivannak fung cu thlanglam kapah cabuai ralden ah nan ret pei.

³⁶“Puanthlam ih hmailam khalah puanzar nan tuah pei ih mepian, a sen, le a sendupmi puan, coihcinmawi puan mankhung in nan tuah pei.

³⁷Cuih puanzar hrangah sui in khuutmi lawiṭhuam panga nan tuah pei ih sui ih tuahmi puan awh-nak in nan awk pei. Cuih lawiṭhuam hrangah daarih tuahmi tawdam panga nan tuah pei.