Read Falam Chin SUAHLANNAK 27 Bible Online

SUAHLANNAK 27 - Falam Chin bible

SUAHLANNAK 27

¹“Biakṭheng cu lawithing in nan don pei ih a saulam le a kauhlam a can awmi a si pei. Pi sarih le hrek a saumi le a kaumi, pi li le hrek a saangmi a si pei.

²A kil li ah thingzum pali nan bun pei ih a biakṭheng thawn an peh-aw thluh ding. A zatein daar in nan tuam pei.

³Biakṭheng ih sahriak le vutcam laknak ah, cawhleek, kheng, thil awh-nak le beel pawl nan tuah pei ih biakṭheng thilri cu a zatein daar in nan tuah thluh pei.

⁴Cule biakṭheng hrang thotho ah daar in sur nan tuah pei. Cuih daar sur kil li ah darkual pali nan thlaih pei ih,

⁵biakṭheng a saannak ih hrek tiang a thlennak dingah darkual cu biakṭheng ih zim hnuai ah nan thlaih pei.

⁶Biakṭheng hrangah lawithing in zawnfung pawl nan tuah pei ih daar in nan tuam pei.

⁷Biakṭheng nan zawn tikah biakṭheng siirih a ummi darkual ah zawnfung pawl cu nan hrolh ṭheu pei.

⁸Biakṭheng cu a sungah thingpheng in a kua nan tuah pei. Tlang parih ka lo hmuhmi innruang vekin nan tuah thluh pei.

⁹“Hi ka umnak Puanthlam hrangah tualrawn nan tuah pei. Thlanglam kapah kaih 50 sau puanṭha mankhungih phiarmi puanzar nan tuah pei.

¹⁰A cuih puanzar cu daar tawdam a neimi darṭhuam ṭhuam kul ah nan thlai pei ih acuih ṭhuam pawl ih parah a bannak le ngunih tuahmi a tlangkham pawl an um pei.

¹¹Cuvek thothoin saklam kapih puanzar cu kaih sawmnga saumi a si pei ih daar tawdam a neimi darṭhuam ṭhuam kul ah nan thlai pei. A cuih ṭhuam pawl ih parah a bannak le ngunih tuahmi a tlangkham pawl an um pei.

¹²Nitlaknaklam, a kauhlam kulhnak dingah cun kaih kul hluannga a saumi puanzar in ṭhuam pahra le tawdam pahra thawn nan tuah pei.

¹³Nisuahnaklam, sangka a umnak lamih a kulhnak cu kaih kul hluannga a kau pei.

¹⁴A luhnak ihsin khatlam kapih puanzar cu kaih sarih le a hrek a kaumi, ṭhuam pathum le a tawdam pathum nan tuah pei.

¹⁵Cule a dang khatlam kapih zaarmi puanzar khal kaih sarih le a hrek kaumi, ṭhuam pathum le a tawdam pathum in a si ve pei.

¹⁶A luhnak sangka puanzar cu mepian, a sen le a sendup, tuuhmul le coihcinmawi puan mankhung, kaih hra sau in nan tuah pei. Cuih puanzar cu tawdam pali ihsin a dingmi ṭhuam pali parah nan thlai pei.

¹⁷A kulhnak hrangih ṭhuam hmuahhmuah cu ngunih tuahmi ṭhuam tlang in a peh thluh pei ih ṭhuamtlang bannak pawl cu ngunih tuahmi an si pei. Ṭhuam tawdam pawl cu daarih tuahmi an si pei.

¹⁸Hi kulhnak cu kaih sawmnga sau, kaih kul hluannga kau le kaih hnih le hrek sang a si pei. Puanzar pawl cu patphiar ih tahmi puan mankhung an si pei. Ṭhuam tawdam pawl cu daarih tuahmi an si pei.

¹⁹Pathian umnak Puanthlam sungih hmanmi thilri hmuahhmuah, ziangih hman an si khalle, Puanthlam le a kulhnakih thil bannak hmuahhmuah tiangin daar in tuahmi an si thluh pei.

²⁰“Israel mi pawl kha an olif hriak ṭha bik rak keng dingin thu pe awla, cule mei-inn cu cat loin a vang ringring thei ding.

²¹Pathian in a minung pawl a tonnak Puanthlam sung, Thukam Kuang an retnak hmai zawnih puanzar lenglamah acuih mei-inn cu Aaron le a fapa pawl in an ret pei. Cutawkah BAWIPA ih hmaika-ah zanlam ihsin zinglam tiang mei-inn cu an vangter pei. Hi thupekmi cu Israel mi pawl le an tesinfa pawl in a kumkhua-in an thlun dingmi a si.