Read Falam Chin SUAHLANNAK 28 Bible Online

SUAHLANNAK 28 - Falam Chin bible

SUAHLANNAK 28

¹“Ka hrangih puithiam an ṭuannak dingah Israel mi lakin na u Aaron le a fapa Nadab, Abihu, Eleazar le Ithamar pawl cu na hnenah ko aw.

²Na u Aaron kha mawinak le zohso a co theinak dingin hnipuan thianghlim na tuahsak pei.

³Thiamnak ka pekmi zungthiam pawl ko awla ka hrangih puithiam thianghlim hna a ṭuan theinak dingah Aaron ih hnipuan pawl tuahter aw.

⁴An tuah dingmi a hnipuan pawl cu ṭaangben [26] pakhat, ṭaangthlaih [27] pakhat, angki fual pakhat, coihcinmawi ṭelhmi angki leng pakhat, lupawng pakhat le taikhap pakhat an si ding. Na u Aaron le a fapa pawl in ka hrangih puithiam an ṭuannak dingah kutzungthiam pawl in cuih hnipuan thiang pawl cu an tuah pei.

⁵Cutiih an tuah tikah sui siseh, mepian le a sendup mi le a sen mi tuuhmul le puan mankhung pawl tla siseh an hmang pei.

⁶“Ṭaangthlaih angki cu, sui le mepian, a sen le sendup tuuhmul le phiarmi puan mankhung le coihcinmawi puan in an tuah pei.

⁷A liangah ṭemnak dingah hri pahnih a um pei ih, a siir veve-ah ṭemcih a si pei.

⁸Mawizet ih tahmi taikhap cu a ṭemnak hri pahnih thawn an peh aw pei ih an tuah daan khal a bangrep thluh ding. Taikhap cu sui le mepian, sendup le a senmi tuuhmul le phiarmi puan mankhung thotho in tuahmi a si pei.

⁹Lungmankhung a senmi pahnih la awla a parah Jakob ih fapa hleihnih hmin kher in nan ngan pei.

¹⁰An kum vekin a sangsangin lungmankhung sen pakhat ah hmin ruk, a dang parah a dang hmin ruk nan kher pei.

¹¹Lungmankhung lamih kutzungthiam mi le hmin khennak a tuah thiamtu pawl ih bomnak thawn Jakob ih fapa hleihnih hmin pawl cu lung mankhung pahnih parah cun nan kher pei ih lungmankhung pawl cu sui in a tlang nan khap pei.

¹²Israel mi phun hleihnih theih ringringnak dingah sunghruk angki ih liangbat hri pawl ih parah cun lungmankhung pawl cu nan ben pei. Cuticun an hmin pawl cu Aaron in a liang parah a keng ringring pei ih BAWIPA in anmah tla cu a ciing ringring ding.

¹³Sui tlangkap pahnih le,

¹⁴hridai vekih merhmi sui hrihrual pahnih tuah uhla, sui hrihrual cu sui tlangkap ah nan ngerh pei.

¹⁵“Cun Pathian duhnak theihtheinak dingah ṭaangben nan tuah pei. Sunghruk angki vek thotho in ṭhateih ṭelhmi a si pei. Sui le mepian sendup le a senmi tuuhmul le phiarmi puan mankhung in nan tuah pei.

¹⁶Zungpibok pakua kau le bok kua sau, a tung le a vang a can awmi a si pei ih bil hnih ih bilmi a si pei.

¹⁷A parah lungmankhung tlar li-in nan ben pei; tlar khatnak ah a sen, mepian le sendup nan ben pei.

¹⁸Tlar hnihnak ah tangphaw, a pawlmi le daimon lungvar mankhung;

¹⁹tlar thumnak ah sendup, a sen le a engmi lungmankhung;

²⁰tlar linak ah tangphaw, sendup le a varmi lungmankhung nan ben pei. Hi lungmankhung pawl cu sui in a kimvel in nan tuam pei.

²¹Lungmankhung hleihnih nan ret pei ih, Jakob fapa pawl ih hmin an parah nan khen ciar pei. Cuih an hmin pawl cu fiangtein nan khen pei ih pakhat parah Israel phun ih hmin pakhat ciar nan ngan pei.

²²Ṭaangben hrangah hrihrual bangtuk in a hrual awmi sui hlir in suiṭhi nan tuah pei ih,

²³Ṭaangben tlunlam kil veve ih ben dingah suikual pahnih nan tuah pei.

²⁴Cuih sui hrihrual pahnih cu suikual pahnih parah nan khit pei.

²⁵A cuih sui hrihrual ih khatlam zim pahnih cu lungmankhung benmi parah nan khit pei. Cubangtuk in sunghruk angki ih hmailam liangbah parah nan hei khit pei.

²⁶Cun sui kual pahnih nan tuah pei ih ṭaangben ih thuailam kiil, ṭaangthlaih sangtu a sunglam zimah nan sih veve pei.

²⁷Sui kual dang pahnih nan tuah hrih pei ih ṭaangthlaih angki ih hmailam liangbah thuailam ah nan hun khit pei ih ṭhazet ih tahmi, taikhap ih tlunah nan vun sih pei.

²⁸Ṭaangben ih kual pawl cu ṭaangthlaih angki ih kual pawl thawn mepian hrihrual in nan ṭawnkom pei ih cuticun ṭaangben cu taikhap ih tlunah seep puakpo loin a bek thlepthli ding.

²⁹“Aaron kha Hmun Thianghlim ih a luh tikah Israel miphun pawl ih hmin cu a ṭaang parih a ummi thurelcatnak ṭaangben parah a kher aw ding a si ruangah BAWIPA keimah in anmah kha ka ciing ringring ding. Cuih ṭaangben cu Aaron ih lung zawn ah a um ding.

³⁰Urim le Thummim [28] timi lung thianghlim kha thurelnak ṭaangben ih sungah nan ret pei ih Aaron kha BAWIPA ih hmaika ih a luh tikah a ṭaangah an um ding. Cuvek caanah a ṭaangben kha a hruk ringring pei ih cutiin Israel mi phun hrangih ka duh sakmi kha a thei thei ding a si.

³¹“Sunghruk angki lengih hrukmi angki fualpi cu tuuhmul mepian hlir in nan tuah pei.

³²Angki fualpi ih laifangah lu hrolhnak dingah a ong nan tuah pei. Cuih ongih kimvel cu savun angki nan tuah bangtuk in tlek lo dingin a tlang nan khul pei.

³³Cuih angki ih thuailam zim cu tuuhmul mepian, sendup le a sen in tale rah cuangin nan ṭelh pei. Angki ih kimvel ah cubangtuk in nan ṭelh pei ih nan ṭelhmi ih karlakah sui khingte nan thlaih pei.

³⁴Cubangtuk in angki fualpi ih thuailam zim kimvel a zatein tale rah zuk ṭelhmi le sui khingte thlaihmi an um ṭheh ding.

³⁵Aaron cu puithiam hna a ṭuan tinte in cuih angki cu a hruk ringring pei. BAWIPA ih hmaika, hmun thianghlim sungih a luh le a suah tinte in khingte awn selso cu theih a si ding ih Aaron cu thihter a si lo ding.

³⁶“Sui hlirih tuahmi calben nan tuah pei ih a parah, ‘BAWIPA ih hrangih a thiangmi,’ tiin nan kher pei.

³⁷Cuih calben cu lupawng hmailamah mepian hridai in nan thlaih pei.

³⁸Aaron in a cal ah a ben pei ih, cubangtuk in Israel mi pawl in BAWIPA hnenih an pekmi parah soiselnak a um lo ding. An pekmi pawl kha BAWIPA ih saantlak a sinak dingah acuih calben cu Aaron in a cal ah a ben ringring pei.

³⁹“Pat mankhung thawn Aaron angki le a lupawng nan tah pei ih a taikhap cu coihcinmawi puan mankhung in nan tah pei.

⁴⁰“Aaron ih fapa pawl hrangah mawinak le zohso an conak dingin angki, taaiṭemnak le lukhum pawl tla nan tuah sak pei.

⁴¹Cuih hnipuan pawl cu Aaron le a fapa pawl nan hrukter pei. Cuṭheh in ka hnaṭuantu puithiam si dingah pumpeknak le Pathian hnenih hlannak thawn hriak nan culh hai pei ih cuticun puithiam ah an cang pei.

⁴²An taksa lang lo dingah an taai le an kawng hup thei dingin bawngbi tawi nan ṭhit sak pei.

⁴³Aaron le a fapa pawl in puithiam hna ṭuan dingin Hmun Thianghlim sungih an luh ah siseh, tonkhawmnak thlam sungih biakṭheng an pan tikah siseh, an zahmawh a langlonak dingah le thihter an si lonak dingah cuih bawngbi tawite cu an hruk ṭheu pei. Himi hi Aaron le a tesinfa pawl ih hrangah an thlun ringring dingmi daan a si.