Read Falam Chin SUAHLANNAK 3 Bible Online

SUAHLANNAK 3 - Falam Chin bible

SUAHLANNAK 3

¹Moses cu Midian ramih puithiam a pu Jethro ih tuu le me pawl a khal ṭheu. Voikhat ah a ṭilva pawl cu nelrawn ramṭhing ah a fehpi ih Pathian tlang Sinai[4] timi ah a va thleng.

²Pathian ih vancungmi hrambur sungih meisa-alh in a hnenah a lang. Moses in a zoh ih hrambur cu a alh rero naón a kang lo, ti kha a hmu.

³Cutikah, “Mangbangza thil hi naih deuhin ka zohhnik pei. Ziangah so hrambur a kang lo?” tiah a ti.

⁴Moses ih a naih vivo cu BAWIPA in a hmuh tikah hrambur sung ihsin, “Moses, Moses!” tiah a ko. Moses in, “BAWIPA, hinah ka um,” tiah a ti.

⁵Cutikah Pathian in, “Rak naih nawn hlah. Na kedam phuak aw, ziangahtile na dinnak hmun cu hmun thianghlim a si.

⁶Keimah cu na pu le na pa ih Pathian ka si. Abraham ih Pathian, Isaak ih Pathian le Jakob ih Pathian ka si,” tiah a ti. Cuvete in Moses cu a hmai a hup; ziangahtile Pathian cu a zoh ngam lo.

⁷Cun BAWIPA in, “Ka milai pawl Izipt ih hrem an tuar cu fiangtein ka hmu zo. Salkhawngtu pawl kutsung ihsin luat dingih an aihramnak tla ka thei zo. An tuarnak hmuahhmuah khal ka thei a si.

⁸Curuangah Izipt mi pawl ih kut sungin a suahtu ding le cuih ram ihsin suak tahratih ramṭha le ramkau-ih thlenpitu dingah ka rung thleng zo a si. Cuih ram cu cawhnawi le khuaitizu a luannak ram, atu ahcun Kanaan mi, Hit mi, Amor mi, Periz mi, Hiv mi le Jebus mi pawl an umnak ram a si.

⁹Israel mi pawl ih ṭah-ainak aw cu ka hnen a thleng ih Izipt mi pawl in ziangtluk in an neh-nen hai, ti khal ka hmu a si.

¹⁰Curuangah ka milai Israel mi pawl Izipt ram sung ihsin suah dingah nangmah cu Faro hnenah ka lo thlah ding,” tiah a ti.

¹¹Cutikah Moses in Pathian hnenah, “Keimah cu zoso ka si ih Izipt ram ihsin Israel mi suakter dingah Faro hnenih ka va feh ding cu?” tiah a ti.

¹²Pathian in, “Na hnenah Keimah ka um ding ih a lo thlahtu Keimah ka sinak a langtertu cu himi hi a si ding: Izipt ram ihsin Israel mi pawl na suahpi tikah, hi tlang parah hin in bia ding a si,” tiah a ti.

¹³Cun Moses in Pathian hnenah, “Israel mi hnenah ka feh ih ‘Nan pu le nan pa ih Pathian in nan hnenah i thlah a si,’ ka ti tikah, ‘A hmin zoso a si?’ in ti asile ziangtinso ka sim ding?” tiah a ti.

¹⁴Cutikah Pathian in, “Keimah cu KEIMAH ka si. KEIMAH [5] a si mi in nan hnenah i thlah a si, tiin Israel mi hnenah na sim pei,” tiah Moses hnenah a ti.

¹⁵Cule Pathian in Moses hnenah hiti in a ti sal. “BAWIPA, nan pu le nan pa ih Pathian, Abraham ih Pathian, Isaak ih Pathian le Jakob ih Pathian in nan hnenah i thlah a si tiin Israel mi pawl hnenah na sim pei. Hihi a kumkhua-in ka hmin a si ih hmailam san minung hmuahhmuah khal in hiti in in ko ding.

¹⁶Va feh awla Israel hruaitu pawl ko khawm awla an hnenah, BAWIPA, nan pu le nan pa ih Pathian, Abraham, Isaak le Jakob ih Pathian cu ka hnenah a lang ih hiti in nanmah sim dingah i fial a si! ‘Nan hnenah ka ra zo ih Izipt mi pawl in nan tlunih an tuahmi cu ka hmu zo.

¹⁷Curuangah hrem nan tuarnak Izipt ram ihsin lo suah ding le Kanaan mi, Hit mi, Amor mi, Periz mi, Hiv mi le Jebus mi pawl ih umnak ram lo thlenpi dingah ka ruatcat zo a si. Cuih ram cu cawhnawi le khuaitizu a luannak ram a si,’ tiah na ti pei.

¹⁸Na simmi thu cu an lo ngai ding. Cun Israel mi hruaitu pawl thawn Izipt siangpahrang hnenah nan feh pei ih a hnenah, ‘Hebru mi pawl ih Pathian, BAWIPA in in tong zo. Curuangah ni thum sung nelrawn ramṭhingah kan feh ih BAWIPA kan Pathian hnenih thawinak kan pek theinak dingah in thlah hram aw,’ tiah nan dil pei.

¹⁹Sikhalsehla kut cakih a hneek dah ti lo ahcun Izipt siangpahrang cun a lo thlah lo ding, ti cu ka thei ko.

²⁰Ka cahnak ka hmang pei ih ka tuah dingmi mangbangza pawl in Izipt mi pawl cu ka hrem ding. Cuih hnuah a lo thlah ding a si.

²¹“Cuih tlunah ka milai pawl cu Izipt mi pawl ih upat tlak in ka tuah pei ih Izipt ram ihsin nan suah tikah nan kut lawngin nan suak lo ding.

²²Israel nunau hmuahhmuah in an innsungih a ummi Izipt nunau hnenin siseh, an innhnenih Izipt mi hnenin siseh, hnipuan le hlawnthil, sui le ngun an dil pei ih, nan fanu le nan fapa pawl in an hruk pei. Cutiin Izipt mi pawl cu an thilri hmuahhmuah nan laksak thluh ding a si,” tiah a ti.