Read Falam Chin SUAHLANNAK 30 Bible Online

SUAHLANNAK 30 - Falam Chin bible

SUAHLANNAK 30

¹“Zihmui rimthaw urnak ah lawithing in biakṭheng nan don pei.

²Dong khat sau, dong khat kau, a tung a vang a can-aw ih dong hnih saangmi a si pei. Thingzum nan bunmi pawl cu biakṭheng thawn an peh-aw thluh pei.

³A par le a kil pali le thingzum bunmi pawl cu sui in nan khuut thluh pei ih a kimvel cu sui in nan khap pei.

⁴A putnak zawnfung pawl kaitu-ah suikual pahnih nan tuah pei ih a zim hnuai, a siirlam pahnih ah nan bun pei.

⁵Hi zawnfung pawl cu lawithing in nan tuah pei ih sui in nan khuut pei.

⁶Sin a neimi Thukam Kuang hmaiih a thlai awmi puanzaarih hmaiah biakṭheng cu nan ret pei. Cutawkah ka lo tong hai ding a si.

⁷Aaron in meivanmi a zoh tikah acuih biakṭheng parah zingtinte in zihmui rimthaw a ur pei.

⁸Zanlam ih meivanmi a thleng tik khalah zihmui rimthaw cu a ur pei. Hi zihmui rimthaw nan pekmi cu sankhat hnu sankhat cat loin nan tuah ringring pei.

⁹Hi biakṭheng parah thlenter lo dingih khammi zihmui siseh, mei-ur thawinakih hmanmi ṭilva le thawinakih hmanmi rawl tla siseh, nan ret lo pei ih inmi-thawinakih hmanmi tidai khal nan burh lo pei.

¹⁰Kum khatah voikhat, Aaron in thingzum bunmi pawl ih parah sual ngaidamnak hrangah thawinakih hmanmi sathi thawn acuih biakṭheng cu a thianghlimter pei. Himi khal hi sankhat hnu sankhat tuah ringring a si pei. BAWIPA hnenih pekmi a thianghlim zetmi biakṭheng a si ding,” tiah a ti.

¹¹BAWIPA in Moses hnenah,

¹²“Israel mi pawl mipum nan siar tikah BAWIPA hnenah mi hmuahhmuah in an nunnak tlennak man an pek ciar pei; ziangahtile mipum siar laiah an hnenih siatsuahnak a thlen lonak dingah a si.

¹³Mipum siarnak cazin sungih a telmi hmuahhmuah in hmunthiang cuaithlainak ih an khiahmi zat in an pek ciar pei. Himi cu BAWIPA hnenih thawinak a si bangtuk in mikip in an pek thluh pei.

¹⁴Kum kul le a tlunlam mi hmuahhmuah in mipum siarnak cazin sungih telhcih an si hrangah hi paisa cu BAWIPA ih hnenah an pek ciar pei.

¹⁵Nan nunnak man BAWIPA hnenih nan pek tikah milian le mifarah thleidannak um loin bangrep te in nan pek pei.

¹⁶Israel mi hnen in hi paisa cu nan khong pei ih Keimah umnak Puanthlam sungih hnaṭuannak ah nan hmang pei. BAWIPA in Israel mi pawl cu a ciin ringringnak dingah le nan nunnak hrangih pekmi-ah hi paisa cu a si ding,” tiah a ti.

¹⁷BAWIPA in Moses hnenah,

¹⁸“Kutke kholhnakah kheng pakhat dar in nan tuah pei ih a tawdam khal dar in nan tuah pei. Pumkhawmnak thlam le mei-ur thawinak biakṭheng karlakah acuih darkheng cu nan ret pei ih a sungah tidai nan ret pei.

¹⁹Aaron le a fapa pawl in an kut le an ke kholhnakah cuih tidai cu an hmang pei.

²⁰BAWIPA hnenih mei-ur thawinak pek dingah pumkhawmnak thlam sungih an luh tik le puithiam hnaṭuan in biakṭheng an naih tikah hi tidai thawn an kholh-aw a si ahcun an thi lo ding a si.

²¹An thih lonak dingah an kut le an ke pawl cu an kholh tengteng pei. Himi cu anmah le an tesinfa pawl tiangin a kumkhua-in an thlun ringring dingmi daan a si,” tiah a ti.

²²BAWIPA in Moses hnenah,

²³“Zihmui phun ṭha bik pawl: cingthling pawng kul, a rimhmuimi sinnamon thing thling pawng hra, a rim thawmi futi pawng hra,

²⁴lawi thingthling pawng kul, (biakinn cuai khainakih khaimi fekfek) le olif hriak khuat nga nan lak pei.

²⁵Himi pawl cu zihmui rawithiamtu ih rawimi bangin nan rawi pei ih culhnak ding hriakah nan hmang pei. Cumi cu a thianghlimmi culhnak ding hriak a si pei.

²⁶Hi hriak in Keimah umnak Puanthlam, thukam kuang,

²⁷sang retnak cabuai le a thilri pawl, meisa vannak fung le a thilri pawl, zihmui rimthaw urnak biakṭheng,

²⁸mei-ur thawinak biakṭheng le a thilri hmuahhmuah le kut kholhnak kheng le a tawdam pawl cu nan culh ṭheh pei.

²⁹Cubangtuk in thlam sungih thilri pawl cu Pathian hrangah nan thianghlimter pei ih a thianghlim ngaingaimi thil zarh ah an cang ding. Himi thilri pawl a daitu hmuahhmuah cu an thianghlim ve ding ih a zarhmi-ah an cang ve ding a si.

³⁰Cun Aaron le a fapa pawl cu hriak nan culh pei ih ka hrangih puithiam an ṭuan theinak dingah nan thianghlimter pei.

³¹Cule Israel mi pawl hnenah, ‘Hi culhnak ding hriak thiang cu nan hrangah sankhat hnu sankhat a thianghlimmi siti a si ding.

³²Mi menmen parah nan burh lo pei ih hi hriak thiang bangtuk in rimthawmi zihmui le hriak rawi in nan hmang lo pei. A thianghlimmi hriak a si bangtuk in a thiangmi a si tiin nan ruat pei.

³³Hi hriak bangtuk tuah a cawngtu le puithiam siar lo midang parih a hmangtu pohpoh cu a miphun sung ihsin hlon a si pei,’ tiin sim aw,” tiah a ti.

³⁴BAWIPA in Moses hnenah, “Zihmui rimthaw a phunphun: stakte, onikha, galbanum le a citmi frankinsens zihmui pawl ihsin a zatrep ciar in la aw.

³⁵Cupawl cu zihmui tuah thiamtu pawl ih an tuah vekin feltein rawi awla zihmui rimthaw-ah tuah aw. Cumi cu ci thawn rawi awla thiangfai ding le thianghlim dingah alter aw.

³⁶A hrek cu a vut ṭhazet ih cang dingin deng awla, a hrek cu ka lo tonnak ding hmun, Puanthlam sungih Thukam Kuang hmaiah thawinakah nan hmang pei. Hi zihmui rimthaw cu a thianghlim zetmi-ah nan ruat pei.

³⁷A cuih zihmui rimthaw bangtuk in nanmah hrangah tuah tahratin nan hmang lo pei. Hi zihmui rimthaw cu BAWIPA hnenih pek ciami thil thianghlim a si kha nan thei pei.

³⁸Mi pakhatkhat in acuih zihmui rimthaw bangtuk a tuah ih a hmang a si ahcun a miphun sung ihsin hlon tengteng a si pei,” tiah a ti.