Read Falam Chin SUAHLANNAK 34 Bible Online

SUAHLANNAK 34 - Falam Chin bible

SUAHLANNAK 34

¹BAWIPA in Moses hnenah, “A hmaisaih lungpheng bangtuk in, lungpheng pahnih tuah sal awla na khuai seksek thluhmi lungpheng parih ka ngan bangtuk in ka ngan sal ding.

²Thaizing ah timtuah cia awla Sinai Tlang parah hung kai in tlangzim ah i hung tong aw.

³Zohman na hnenah hung feh hlah hai seh; tlang parah zohman um hlah hai seh; tuu le caw khal Sinai Tlang kiangkap ah tlang hlah hai seh,” tiah a ti.

⁴Curuangah Moses in a hmaisaih lungpheng pahnih bangtuk in lungpheng pahnih a thar in a tuah sal ih BAWIPA ih fial vekin Sinai Tlang parah lungpheng pahnih kengin zingpitah a hung feh.

⁵Cule BAWIPA cu mero in a rung ṭum; Moses kiangah a rung ding ih BAWIPA timi a hmin cu a phuang.

⁶BAWIPA cu Moses ih hmaika ihsin a lan ih, “Pathian BAWIPA cu lainatnak le zaangfahnak in a khatmi Pathian ka si. Ka thin a sau ih rin a tlakmi le duhdawtnak a nei ringringtu ka si.

⁷A hngetmi ka duhdawtnak cu san thawng tampi tiang ka kimter ih an mawhnak, an siatnak le an sualnak tla ka ngaidam. Sikhalsehla an pale pawl ih sualmawhnak ruangah an faale pawl le an tesinfa pawl cu santhum sanli tiang ka hrem hai a si,” tiah a ti.

⁸Cutikah Moses cu zamrangte in leilung dai in a lu a kun ih BAWIPA cu a biak.

⁹Cule Moses in, “BAWIPA, ka parah na lung a awi a si ahcun in fehpi ve hram aw. Hi Israel mi pawl hi mi lungruh ngaingai an si; asinain kan siatnak le kan sualnak cu in ngaidam awla nangmah ih minung ngaingai ah in co hram aw,” tiah a dil.

¹⁰BAWIPA in Moses hnenah, “Nanmah thawn thukamnak ka tuah ding. Israel mi pawl ih mithmuh ah leilung tlun miphun hmuahhmuah hnenah tuah dah keel lomi thilmak ka tuah ding a si. BAWIPA ih thil a tuah theizia cu nanmah thawn a ummi hmuahhmuah in an hmu ding; ziangahtile nan hrangah a rapthlakza ngaingaimi thil ka tuah ding a si.

¹¹Tuihsun ih ka lo pek dingmi thukham pawl cu ṭhatein nan thlun pei. Nan hmaiih nan feh vivo tikah Amor mi, Kanaan mi, Hit mi, Periz mi, Hiv mi le Jebus mi pawl cu ka dawi hlo ṭheh hai ding.

¹²Hi Kanaan ramih a rak ummi minung pawl thawn pawlkom awknak thukam nan tuah lonak dingah fimkhur zetin um uh; ziangahtile himi pawl thawn pawlkom awknak thukam nan tuah a si ahcun nanmah siatsuahtu thang bangtuk a si ding.

¹³Cuhnakin anmah ih biakṭheng pawl khi bal thluh sawn uh; an lungto thianghlim pawl khi khuai ṭheh uhla, Asherah milem pawl khal hau ṭheh sawn uh.

¹⁴“Khawzing nan bia lo pei; ziangahtile BAWIPA ih hmin cu ‘Thiik hmang,’ a si; Keimah cu thiik nei Pathian ka si.

¹⁵Hi ramih minung pawl thawn thukamnak zianghman tuah hlah uh; zianghrangah tile taksa zuar pawl bangin an khawzing pawl an biak ih, raithawinak an pek tikah nannih khal an lo leem ding ih an raithawinak rawl tla nan ei pang ding.

¹⁶An fanu pawl tla nan fapa pawl hrangah nan ṭhi pang pei ih cuih nunau pawl cun taksa zuartu bangtuk in an khawzing hrangah hna an ṭuan ding ruangah nan fapa pawl cu an hruai sual pang ding ih an khawzing pawl ih hnaṭuantu riangri-ah an canter pang ding.

¹⁷“Nanmah hrangah thir pawl khi eer tahratin milem ah nan tuah lo pei.

¹⁸“Thilnu tel lo Sang Puai cu nan tuah ringring pei. Thu ka lo pek zo bangtuk in Abib[31] thla ah thilnu tel lo sang cu ni sarih sung nan ei pei; ziangahtile cuih thla ah Izipt ram in nan suak a si.

¹⁹“Minung siseh ṭilva siseh fatir pohpoh cu ka ta an si; nan caw siseh nan tuu siseh an hrin hmaisa bik a pa pohpoh cu ka ta an si.

²⁰Sikhalsehla laakih fatir pohpoh cu a ai-ah tuu pakhat pekin nan tlen sal pei. Nan tlen lo asile a hngawng nan merh kiak pei. Nan fapatir pohpoh cu nan tlen pei. “Zokhal sisehla thawinak pe loin kut lawngin ka hmaiah a ra thei lo pei.

²¹“Niruk sung hna nan ṭuan pei ih lo rih caan le rawlkhawm caan a si khalle ni sarih ni-ah cun hna nan ṭuan lo pei.

²²“Nan sangvut pawl a cu ih nan khawm thok tikah Thlaithar Puai tuah uhla kum a cem zawng ih rawl nan khawm tikah Rawlkhawm Puai nan tuah pei.

²³“Nan mipa hmuahhmuah cu kum khatah voithum BAWIPA Israel ih Pathian Keimah in ra bia pei.

²⁴Nan hmai ihsin miphun dang pawl ka dawi ṭheh ih nan ram ka kauhter ṭheh hnuah cun BAWIPA nan Pathian keimah ih hmaiah kum khatah voithum puai tuah dingih nan rat sungah zohman in nan ram cu neh an tum lo ding.

²⁵“Ka hrangih thawinak ṭilva nan pek tikah thilnu telmi sang cu nan hmang hrimhrim lo pei. Lantak Puai nan tuah ih ṭilva nan thahmi sa cu a thaizing tiang nan ret lo pei.

²⁶“Nan lo sung rawl nan khawm hmaisa bikmi sung ihsin a ṭha bik cu BAWIPA ih innah nan rak keng pei. “Tuu note cu a nuih hnawiti in nan suang lo pei,” tiah a ti.

²⁷BAWIPA in Moses hnenah, “Hi ka simmi pawl hi ngan aw; ziangahtile nangmah le Israel mi hnenih thukam ka tuahmi cu hi ka hmurka ihsin a suakmi ka ṭong pawl ruangih ka tuahmi a si,” tiah a ti.

²⁸Curuangah Moses cu ni sawmli le zan sawmli, rawl ei lo le tidai in loin BAWIPA ih hnenah a um. Thukamnak ih ṭongkam - Thukham Pahra sungih a ummi, Pathian ṭong pawl cu lungpheng parah Moses in a ngan ṭheh.

²⁹Moses cu lungpheng pahnih parih nganmi Thukham Pahra kengin a rung ṭum tikah, BAWIPA thawn an biak-awk rero ruangah, a hmai cu a tleu ṭheh; asinain amah cun a thei-aw lo.

³⁰Aaron le Israel mi pawl in Moses cu an rak zoh ih a mithmai tle kha an hmuh tikah an ṭih ih an naih ngam lo.

³¹Sikhalsehla Moses in a ko hai ih Aaron le Israel mi hruaitu pawl cu a hnenah an feh sal. Cule Moses cun an hnenah thu a sim.

³²Cuih hnuah Israel mi pawl cu a hnenah an ra ṭheh. Cutikah Sinai Tlang parah BAWIPA in a pekmi thukham hmuahhmuah cu Moses in Israel mi hnenah a pek.

³³Cun thusim a ṭheh tikah Moses cun hmaikhuhnak puan paate in a hmai a khuh aw.

³⁴BAWIPA thawn bia-aw dingin BAWIPA ih umnak Puanthlam sungih a luh tinte in a hmaikhuh cu a ong ih thlam sung ihsin a ra suah sal tikah a khuh aw sal ṭheu. Thlam sung ihsin a ra suah tikah BAWIPA ih thupek hmuahhmuah cu Israel mi hnenah a sim sin ṭheu.

³⁵Cutikah Moses ih mithmai cu tleu zetin an hmu. Thusim a ṭheh tikah a hmaikhuh cun a khuh aw sal ṭheu ih, BAWIPA thawn bia-aw dingin Puanthlam sungih a luh sal hlan lo a hmai cu a khuh aw ringring.