Read Falam Chin SUAHLANNAK 36 Bible Online

SUAHLANNAK 36 - Falam Chin bible

SUAHLANNAK 36

¹“Bezalel, Oholiab le BAWIPA in zungthiamnak le thilti theinak a pek mi pawl cun BAWIPA ih inn hrangih a ṭul mi hmuahhmuah sak dingah a theitu pawl an si ruangah BAWIPA ih thupekmi vek cekci in an tuah thluh pei,” tiah a ti.

²BAWIPA in zungthiamnak a pek zomi pawl Bezalel, Oholiab le a dang zungthiam pawl le hnaṭuan bawm duhtu pawl cu Moses in a ko ih hnaṭuan thok dingin a fial.

³Israel pawl in Puanthlam thianghlim saknak dingih thawhlawm an pekmi thilri hmuahhmuah cu an hnenah Moses in a pek ṭheh. Cuih tlunah Israel pawl cun zingtinte in an thawhlawm cu Moses hnenah an rak keng.

⁴Cutikah Puanthlam thianghlim sak hna a phunphun a ṭuantu zungthiam pawl cu an hnaṭuanmi taanta in an ra ih,

⁵Moses hnenah, “BAWIPA in ṭuan ding in fialmi pawl hrangih thilri a ṭulmi hnakih tam deuh an pe zo a si,” tiah an sim.

⁶Curuangah Moses in misenpi hnenah thu a than ih, “Nunau siseh mipa siseh, Puanthlam thianghlim saknak dingah zohman in thawhlawm nan pe nawn lo pei,” tiah a ti. Cuih hnu cun Israel pawl in zianghman an rak keng nawn lo.

⁷An rak ken ciami cu an tuah ding hmuahhmuah an tuah ṭheh hmanah a cem dah lo ding.

⁸Hnaṭuantu pawl lakih zungthiam bik pawl in Pathian umnak Puanthlam cu an sak. Puanṭha mankhung mepian, sendup le a senmi puan, cherub timi ramsa lem pawl cuangin coihcinmawi ṭelhmi puan zuun hra in an sak.

⁹Puan pawl cu a saulam kaih 14 le a kauhlam kaih 2 ciar an si.

¹⁰Zuun nga cu an peh ih, a dang zuun nga khal an peh.

¹¹Cutiih pehmi puan tlunta bikih zim veve-ah mepian puan in a beu pawl an tuah.

¹²Puan pehmi pakhatnak ah beu sawmnga an tuah ih, a pahnihnak puan pehmi khalah beu sawmnga an tuah ve.

¹³Thlam cu umnak pakhat ih cang dingah puan awh-nak suikual sawmnga in an tuah ih cumi in puan thuah hnih cu an peh.

¹⁴Cun Puanthlam khuhnakah mehmul in puan zuun hleikhat an tah.

¹⁵Zuun khatah kaih 15 a sau ih kaih 2 a kau. Puan cu an tia aw ṭheh.

¹⁶Puan zuun nga kha zuun khatah an peh ih, a dang zuun ruk khal an peh thotho.

¹⁷An pehmi pakhatnak puanzimah puanbeu sawmnga an tuah ih pahnihnak puanzim khalah puanbeu sawmnga thotho an tuah.

¹⁸Thlam pakhat ih cang dingin puan awh-nak darkual sawmnga an tuah ih, puan thap hnih cu cuih darkual cun an peh.

¹⁹Thlam khuhnak dingah a senih buhmi tuucang phaw le acuih parih khuh dingah saphaw ṭha an tuah.

²⁰Puanthlam ih phar cu a tung zawng in an song ih lawithing in an tuah.

²¹Phar pawl cu tlep khatah dong hra a sau ih dong khat le hrek ciar a kau.

²²Phar tlepkhat le tlepkhat pehkomnak ah a kap ciar kha an khuar. Phar a zatein cuticun an tuah thluh.

²³Thlanglam phar hrangah tlep kul an tuah ih,

²⁴phar tawdamah ngunih tuahmi tawdam sawmli an tuah. An khuarnak zawn ihsin a hun dotu-ah phar tlepkhat ah tawdam pahnih fingfing an ret.

²⁵Saklam phar hrang khalah phar tlep kul an tuah ih,

²⁶phar tlep khatah tawdam pahnih fingfing in ngun tawdam sawmli an tuah.

²⁷Nitlaknak lam, thlam ih dunglam phar hrangah, phar tlep ruk le,

²⁸thlam ih dunglam kil pahnih hrangah phar tlep hnih an tuah.

²⁹Hi a kilih phar tlep hnih cu a tawdam ihsin a luzimih a ummi kual tiangin an peh-aw thluh. Phar kil pahnih ih phar tlep pahnih pawl cu a cutiih tuah thluhmi an si.

³⁰Cuhrangah phar tlep riat an um ih tlepkhat ah tawdam pahnih ciar in ngun tawdam hleiruk an um.

³¹Cule lawithing in phartlang an tuah ih, saklam phar hrangah phartlang panga,

³²thlanglam phar hrangah phartlang panga le nitlaknak lam thlam ih dunglam phar hrangah phartlang panga an tuah.

³³Phar laifang zawnih an bunmi phartlang cu kil khat ihsin kil khat tiang a saumi a si.

³⁴Phar siseh phartlang siseh, sui in an khuut ih phar parih an bunmi sui kual sungah phartlang pawl cu an hrolh.

³⁵Puanzar cu mepian, sendup, a senmi tuuhmul le phiarmi puan mankhung, cherub timi ramsa lem pawl cuangin coihcinmawi ṭelhmi puan pawl in an tuah.

³⁶Puanzar thlainak ah lawithing in ṭhuam pali an tuah ih cuih ṭhuam pawl cu sui in an khuut ih suikual pawl a parah an bun. Ṭhuam pawl dotu-ah ngun tawdam pali an tuah.

³⁷Puanthlam sung luhnak puanzar cu mepian, sendup, a senmi tuuhmul le phiarmi puan mankhung coihcinmawi ṭelhmi puan in an tuah.

³⁸Ṭhuam panga an tuah ih cuih parah a kual pawl an bun. Ṭhuam le a zim pawl cu sui in an khuut. Cuih ṭhuam pawl hrangah dar thawn tuahmi tawdam panga an tuah.