Read Falam Chin SUAHLANNAK 38 Bible Online

SUAHLANNAK 38 - Falam Chin bible

SUAHLANNAK 38

¹Bezalel in mei-ur thawinak hrangah biakṭheng cu lawithing in a don. A tung le a vang dong nga veve an si. A saanlam cu dong thum a si.

²A parih bunmi thingzum cu a kil kil li ah a bun ih biakṭheng thawn an peh-aw ṭheh. A zatein dar in a tuam.

³Cuih biakṭheng hrangih thilri pawl: khengkhuar, cawhleek, kheng, thil awh-nak le beel pawl tla cu dar in a tuah ṭheh.

⁴Khohriik vekin darpheng a tuah ih biakṭheng a saanlam ih hrek a thlennak dingah acuih darpheng cu biakṭheng ih zim hnuai ah a ret.

⁵Biakṭheng putnak hrangah darkual pali a tuah ih zawnfung pawl hrolhnak ah acuih darkual pawl cu darpheng ih kiil li ah a bun.

⁶Zawnfung pawl cu lawithing in a tuah ih dar in a tuam.

⁷Cule biakṭheng putnak ah a siir pahnih ih a ummi darkual ahcun zawnfung pawl cu a hrolh. Biakṭheng cu thingpheng in a tuah ih a sung a kuatter.

⁸BAWIPA umnak Puanthlam sung luhnak kotka-ih hna a ṭuantu nunau pawl ih neihmi dar thlalang pawl ihsin kut kholhnak darkheng le dar tawdam pawl a tuah.

⁹Puanthlam kulhnak a tuah tikah thlanglam kap kulhnak cu kaih sawmnga a saumi puan mankhung, a phiarih phiarmi in a tuah.

¹⁰Ṭhuam kul le a tawdam kul pawl cu dar in a tuah ih ṭhuamtlang pawl le ṭhuamtlang khihnak kual pawl cu ngun in a tuah.

¹¹Saklam kapih kulhnak khal cu kaih sawmnga a saumi puanzar in a tuah ih puanzar thlainak ṭhuam kul le a tawdam kul cu dar in a tuah; cule ṭhuamtlang le ṭhuamtlang kaihnak kual pawl cu ngun in a tuah.

¹²Nitlaknak lam kulhnakah kaih kul hluannga a sau mi puanzar a hmang ih puanzar thlainak ah ṭhuam pahra le a tawdam pahra a tuah; ṭhuamtlang le ṭhuamtlang kaihnak kual pawl cu ngun in a tuah.

¹³Nisuahnak lamah luhnak kotka a um ih kulhnak puanzar a hmanmi cu kaih kul hluannga thotho a sau.

¹⁴Luhnak kotka ihsin khatlam kapih puanzar cu kaih sarih le a hrek a kau ih ṭhuam pathum le tawdam pathum an um.

¹⁵Kotka ihsin khatlam kap khal cuvek thotho in a tuah; cuhrangah a kulhnak kotka ihsin vorhlam le kehlamah puanzar kaih sarih le a hrek veve a kau ih, ṭhuam pathum le tawdam pathum veve a tuah a si.

¹⁶Puanthlam kulhnak hrangih hmanmi puanzar hmuahhmuah cu a phiarih phiarmi puan mankhung hlir in a tuah.

¹⁷Ṭhuam tawdam pawl cu dar in a tuah ih ṭhuam parih a ummi ṭhuamtlang kaihnak kual pawl le ṭhuamtlang pawl le ṭhuam lu tuamnak pawl cu ngun in a tuah. A kulhnak hrangih hmanmi ṭhuam hmuahhmuah cu ngunih tuahmi ṭhuamtlang in a kai ṭheh.

¹⁸A kulhnak kotka-ih puanzar pawl cu coihcinmawi ih ṭelhmi a si ih mepian, sendup le a senmi tuuhmul le puan mankhung, a phiarih phiarmi in a tuah. Cuih puanzar cu a kulhnak hrangih hmanmi puanzar dang vek thotho in, kaih hra a sau ih kaih hnih le a hrek a hlai.

¹⁹Hi puanzar cu darih tuahmi tawdam pali ih bunmi ṭhuam pali ah a thlaih. Ṭhuamtlang kaihnak kual, ṭhuam luzim khuhnak le ṭhuamtlang pawl cu ngun in a tuah.

²⁰Puanthlam hrangah siseh, a kulhnak hrangah siseh, puanzar awh-nak kual hmuahhmuah cu dar in a tuah ṭheh a si.

²¹Thukham ngannak lungpheng pahnih an retnak Puanthlam sungih an hmanmi thilri pawl cu cazin an tuah ih a hnuailam bangtuk a si. Cuih cazin tuah ding cu Moses in a fial ih puithiam Aaron ih fapa Ithamar kuthnuai ih hnaṭuantu Levi mi pawl in an tuah.

²²Judah miphun Hur ih tupa Bezalel, Uri ih fapa cun Moses hnenih BAWIPA ih thupek vekin thil hmuahhmuah cu a tuah ṭheh.

²³Bezalel bawmtu, Dan miphun Ahisamak ih fapa Oholiab cu lungkher lamih zungthiam, pungsan suai thiam le mepian, sendup, a senmi tuuhmul le puan ṭha mankhung pawl tahthiamtu a si.

²⁴Hmun thianghlim hrangih a cemmi sui hmuahhmuah, BAWIPA hnenih an pekmi sui cu biakinn cuai thlainak ih thlai tikah pawng thawnghnih za le sawmkua le pawng nga a rit.

²⁵Israel mi pawl in mipum siar caanih an pekmi ngun hmuahhmuah cu biakinn cuai thlainak ih thlai tikah pawng thawngsarih zanga le sawmnga a rit.

²⁶Himi cu Israel pawl in mipum ih an siarmi mi pakhat in, mah-ih pek ding zat ciar an pekmi komkhawmin biakinn cuai khainakih an khaimi zat a si. Mipum siar tikah kum kul le a tlunlam cu an zatein minung thawngzaruk thawngthum zanga le sawmnga an si.

²⁷Ngun an pekmi zate sung ihsin hmunthiang hrangah siseh, puanzar hrangah siseh, ṭhuam tawdam an tuahmi hmuahhmuah hrangah pawng thawngsarih le zanga an hmang. Pawng thawngsarih le zanga cu tawdam zakhat hrang a si ruangah ngun pawng sawmsarih le pawng nga cu tawdam pakhat hrangah an hmang a si.

²⁸A taanglaimi ngun pawng sawmnga thawn ṭhuam hrangih ngunkual, ṭhuam luzim tuamnak le ṭhuamtlang pawl a tuah a si.

²⁹BAWIPA hnenih an pekmi dar cu a zatein pawng thawngnga zathum le pawng hra a rit.

³⁰Cuih dar cun Puanthlam sungih luhnak kotka ṭhuam pawl ih tawdam pawl, biakṭheng le khohriik vekih tuahmi darpheng le biakṭheng hrangih thilri hmuahhmuah an tuah.

³¹Cuih tlunah Puanthlam kulhnak ṭhuam ih tawdam, kotka ṭhuam ih tawdam le Puanthlam hrangah siseh, a kulhnak hrangah siseh, puan awh-nak kual hmuahhmuah cu hi dar in an tuah a si.