Read Falam Chin SUAHLANNAK 39 Bible Online

SUAHLANNAK 39 - Falam Chin bible

SUAHLANNAK 39

¹Puithiam pawl in hmun thiang sungah hnaṭuan caanih an hruh dingah tuuhmul in mepian, sendup le a senmi hnipuan sunglawi an tuah. Moses hnenih BAWIPA ih thupek vekin Aaron hrang khalah hnipuan thianghlim an tuah.

²Ṭaangthlaih angki thianghlim cu sui, mepian, sendup le a senmi tuuhmul le phiarmi puan mankhung thawn an tuah.

³Sui cu a tlep a tlep i a phel hnuah mepian, sendup le a senmi pat lakah mawizetih ṭelhcih theih dingin paatete in an aat sal.

⁴Cuih ṭaangthlaih angki sihnak ah liangbah hri an tuah ih a sir ah an sih veve.

⁵Mawizet ih tahmi taikhap cu acuih liangbah hri pahnih thawn an peh-aw. Moses hnenih BAWIPA ih thupek vekin hi taikhap khal hi sui, mepian, sendup le a senmi tuuhmul le phiarmi puan mankhung a si.

⁶A senmi lungmankhung an taat ih a kimvel ihsin sui in an khap. Lung parih mi hmin an kher ṭheu vekin Jakob fapa hleihnih pawl ih hmin cu cuih lungmankhung parah cun an kher.

⁷Moses hnenih BAWIPA ih thupeknak bangtuk in, Israel miphun hleihnih pawl theihsaalnak lungmankhung ih cang dingin liangbah hri pawl parah cun cuih lungmankhung pawl cu an ben.

⁸Ṭaangthlaih angki vekin mawizet ih ṭelhmi ṭaangben tla cu an tuah. Sui, mepian, sendup le a senmi tuuhmul le phiarmi puan mankhung in an tuah.

⁹A tung le a vang an can-aw ih bil hnih ah an bil; zungpi bok pakua a saumi le a kaumi a si.

¹⁰Cuih ṭaangben parah lungmankhung tlar li an ben: tlar khatnak ah a sen, a mepian le a sendupmi lungmankhung an ben.

¹¹Tlar hnihnak ah a taangphaw, a pawl le daimon lungvar an ben.

¹²Tlar thumnak ah sendup, a sen le a engmi lungmankhung an ben.

¹³Tlar linak ah tangphaw, sendup le a varmi lungmankhung an ben. Hi lungmankhung pawl cu an kimvel in sui in an vel.

¹⁴Lungmankhung hleihnih an ben ih a parah Jakob fapa hleihnih pawl hmin kher in an ngan. Hmin khermi vekin an kher ih lungmankhung pakhat parah Israel miphun pakhat hmin ciar an kher fingfing.

¹⁵Ṭaangben hrangah hrihrual bangtuk in a hrual-awmi sui hlir in sui ṭhi an tuah.

¹⁶Sui tlangkap pahnih le sui kual pahnih an tuah ih sui kual pahnih cu ṭaangben ih tlunlam kiil veve-ah an ben.

¹⁷Cuih sui kual pahnih ah sui hri pahnih an khit ih,

¹⁸sui hri khatlam zim pahnih cu sui tlangkap pahnih ah an khih. Cuticun ṭaangthlaih angki ih hmailam liangbah parah sui tlangkap pahnih cu an thlaih.

¹⁹A dang sui kual pahnih an tuah ih ṭaangben hnuailam kiil veve ah a sunglam zim ṭaangthlaih angki sangtu-ah an sih.

²⁰Sui kual pahnih an tuah lala ih ṭaangthlaih angki hmailam liangbah hnuailam ah an khit ih ṭhazet ih tahmi taikhap tlunlam ah an sih.

²¹Ṭaangben parih sui kual pahnih cu ṭaangthlaih angki ih sui kual pawl thawn mepian hrihrual in an ṭawnkom ih cuhrangah ṭaangben cu taikhap ih tlunah seep puakpo lo-in, Moses hnenih BAWIPA ih thupek vek cekci in ṭaangben cu a bek thlepthli.

²²Ṭaangthlaih angki hnuai ih hrukmi angki fualpi cu mepianmi tuuhmul hlir in an tuah.

²³Angki fualpi-ah lu hrolhnak ong pakhat an tuah. Cuih ong kimvel cu an hruk tikah tlek lo dingin a tlang an khul.

²⁴Cuih angki hnuailam zim cu mepian, sendup le a senmi tuuhmul le puan mankhung pawl in tale rah cuangin an ṭelh.

²⁵Sui hlir in khingte an tuah ih tale rah karlak hnuailam zim kimvelah khingte cu an thlaih.

²⁶Moses hnenih BAWIPA ih thupek vekin puithiam hna an ṭuan ih an hrukmi angki fualpi ih thuailam zim kimvelah tale rah zuk ṭelhmi le khingte thlaihmi an um.

²⁷Aaron le a fapa pawl hrangah puan mankhungih tahmi angki pawl an tuah;

²⁸cule lupawng le lukhum tla puan mankhung in an tuah ih, bawngbi tawi pawl cu phiarmi puan mankhung in an tuah.

²⁹Tai ṭemnak cu Moses hnenih BAWIPA ih thupeknak vekin phiarmi puan mankhung le mepian, sendup le a senmi tuuhmul thawn an tuah ih mawizetin an ṭelh.

³⁰Sui hlir in calben thianghlim an tuah ih cakhennak parih cangan bangin a parah, “BAWIPA hnenih pekmi,” tiah an khen.

³¹Moses hnenih BAWIPA ih thupekmi vekin cuih calben pheng cu an lupawng parah an ṭemcih.

³²BAWIPA ih umnak inn Puanthlam cu an ṭheh. Moses hnenih BAWIPA ih thupek vekin Israel pawl in an tuah ṭheh.

³³BAWIPA ih umnak inn Puanthlam le a thilri pawl, puan awhnak, phar le phartlang, a ṭhuam le a ṭhuam tawdam pawl;

³⁴a par khuh hrangah tuucang phaw a senih buhmi, a khuh sintu-ah saphaw ṭha le a khaptu dingih puanṭha mankhung pawl;

³⁵lungpheng pahnih an retnak Thukam Kuang le a sin le a zawnfung pawl;

³⁶cabuai le cabuai ih thilri le Pathian hrangih hunmi sang;

³⁷sui hlirih tuahmi meivannak fung, a meivannak, meivanmi a tlar ih ret ding pawl, a thilri dangdang le meivannak hrangih siti pawl,

³⁸sui ih tuahmi biakṭheng, hriak culhnak hrangih siti, zihmui rimthaw, thlam sung luhnak sangka puanzar,

³⁹darih tuahmi biakṭheng, khohriik vek darpheng, a zawnfung pawl le a thilri hmuahhmuah, kut kholhnak kheng le a tawdam;

⁴⁰kulhnak hrangah puanzar, kulhnak ṭhuam le ṭhuam tawdam pawl, kulh luhnak puanzar, a hridai pawl le puanthlam hrangih thil bah-nak pawl, Pathian Umnak Puanthlam sungih hnaṭuan tikah a ṭulmi thilri hmuahhmuah;

⁴¹hmunthiang sungih hnaṭuan tikah puithiam pawl ih hrukmi hnipuan sunglawi, puithiam hna an ṭuan tikah Aaron le a fapa pawl ih hruk dingmi hnipuan thianghlim pawl cu Moses hnenah an rak keng.

⁴²Moses hnenih BAWIPA ih thupek vekin Israel mi pawl in hnaṭuan cu an ṭheh.

⁴³An tuahmi hmuahhmuah cu Moses in ṭhatein a zoh ih BAWIPA ih thupek vekin an tuah ṭha a si, tiah a hmu. Cuhrangah cupawl cu Moses in thluasuah a pek.