Read Falam Chin SUAHLANNAK 40 Bible Online

SUAHLANNAK 40 - Falam Chin bible

SUAHLANNAK 40

¹BAWIPA in Moses hnenah,

²“Thla hmaisa bikih ni khat ni-ah BAWIPA ih Umnak Puanthlam cu nan din pei.

³Cuih thlam sungih Thukam Kuang sungah Thukham Pahra cu nan ret pei ih thingkuang cu puanzar phenah nan ret pei.

⁴Cabuai khal nan ret pei ih a thilri pawl khal a parah na ret pei. Meivannak fung ret uhla a parah mei nan vang pei.

⁵Thukam Kuang ih hmaizawn ah zihmui rimthaw urnak sui ih tuahmi biakṭheng cu nan ret pei ih luhnak sangka ah puanzar nan thlai pei.

⁶Cule Puanthlam ih hmaiah mei-ur thawinak biakṭheng cu nan ret pei.

⁷A cuih biakṭheng le Puanthlam karlakah kut kholhnak kheng nan ret pei ih a sungah tidai khal nan ret pei.

⁸A kulhnak pawl cu nan bun thluh pei ih luhnak kotka ah puanzar khal nan thlai pei.

⁹“Cun hriak nan lak pei ih, Pathian Umnak Puanthlam le a sungih a ummi hmuahhmuah nan culh pei. Cubangtuk in Puanthlam le a thilri hmuahhmuah cu Pathian hnenah nan hlan pei ih inn thianghlim ah a cang ding.

¹⁰Mei-ur thawinak biakṭheng le a thilri pawl khal hriak nan culh pei. Cubangtuk in Pathian hnenah nan hlan pei ih a thianghlim zetmi biakṭheng a si ding.

¹¹Kut kholhnak le a tawdam khal hriak nan culh pei ih cubangtuk in Pathian hnenah nan pek pei.

¹²“Aaron le a fapa pawl cu Puanthlam sangka ah ra hai sehla tidai in kholh-aw hai seh.

¹³Aaron cu hnipuan thianghlim pawl hrukter uhla ka hrangih puithiam hna a ṭuan theinak dingah hriak culh in thianghlimter uh.

¹⁴A fapa pawl khal a kiangah ra hai sehla angki hrukter uh.

¹⁵An pa hriak nan culh vek thothoin a fapa pawl khal hriak culh uh; cuticun ka hrangah puithiam hna an ṭuan ding. Hriak culhmi an si ruangah kumkhua in puithiam hna an ṭuan ding a si,” tiah a ti.

¹⁶BAWIPA ih thupek vekin Moses in a tuah.

¹⁷Cuhrangah Izipt ram an taan hnu kum hnihnak, thla hmaisa bikih ni khat ni-ah BAWIPA ih Umnak Puanthlam cu an dingter.

¹⁸Amah Moses rori in a dingter a si. Moses in ṭhuam tawdam pawl cu a ret ih ṭhuam pawl cu a phun; phartlang pawl khal a bun ih phar pawl khal a song ṭheh.

¹⁹A khuh pawl cu a pharh ih BAWIPA ih thupek vekin Puanthlam cu a khuh.

²⁰Cun thukham ngannak lungpheng pawl cu a lak ih Thukam Kuang sungah a ret. Zawnfung pawl cu thingkuang parih thlaihmi a kual sungah a hrolh ih thingkuang cu a sin.

²¹Pathian umnak Puanthlam sungah Thukham Kuang cu a ret ih lang lo dingin puanzar in a phenter. BAWIPA ih thupek bangtuk in thukham ngannak lungpheng pawl retnak kuang cu puanzar in hitivek in a phenter a si.

²²Puanthlam sungah cun cabuai khal a ret; thlam sung saklam kap deuhah puanzar lengah a ret ih,

²³BAWIPA ih thupek vekin BAWIPA ih hrangih hunmi sang cu cabuai parah a ret.

²⁴Thlam sung thotho ahcun thlanglam kap cabuai ih siir zawn ah meivannak fung a ret.

²⁵BAWIPA ih thupek vekin BAWIPA ih hmai ahcun meivannak parih van dingmi mei-inn pawl a ret.

²⁶Sui ih tuahmi zihmui rimthaw urnak biakṭheng cu puanzar hmai zawn ah a ret.

²⁷Cuih biakṭheng parah BAWIPA ih thupek bangtuk in zihmui rimthaw cu mei in a ur.

²⁸Puanthlam sung luhnak sangka ah puan a zaar.

²⁹Mei-ur thawinak hrangih biakṭheng cu sangka hmaiah a ret. Cuih biakṭheng parah pekmi rawl a ret ih mei-ur thawinak khal a tuah ih BAWIPA ih thupek vekin sa pawl cu cem koin a kangter thluh.

³⁰Cuih biakṭheng le Puanthlam karlakah kut kholhnak kheng a ret ih kholh awknak dingah tidai khal a ret.

³¹Cuih tidai cun Moses, Aaron le Aaron ih fapa pawl in an kut le an ke an kholh.

³²BAWIPA ih Puanthlam sungih an luh tikah siseh, biakṭheng ih an feh tikah siseh, BAWIPA ih thupek vekin an kholh-aw hmaisa ṭheu.

³³Puanthlam le biakṭheng kimvelih kulhnak hruang tla cu Moses in a tuah ṭheh ih kulhnak kotka khalah puan a zaar. Cuticun Moses in hnaṭuan hmuahhmuah cu a ṭheh.

³⁴Puanthlam cu mero in a tuam ih BAWIPA ih sunlawinak tleu in a khat.

³⁵Cutiin BAWIPA ih sunlawinak tleu in a khah ruangah a sungah Moses a lut thei lo.

³⁶Hmunkhat ihsin hmun dangih Israel mi pawl an ṭhawn tikah Pathian umnak Puanthlam ihsin mero a kian tik lawnglawngah an ṭhawn ṭheu.

³⁷Mero a kiang lo asile hmun dangah an ṭhawn lo.

³⁸Ramṭhing lakih an vahvaih sung hmuahhmuahah BAWIPA an hnenah a um ti langternak ah Puanthlam tlunah sunah mero an hmu ih zanah mei a vang ringring ti an hmu.