Read Falam Chin SUAHLANNAK 5 Bible Online

SUAHLANNAK 5 - Falam Chin bible

SUAHLANNAK 5

¹Cule Moses le Aaron cu Faro hnenah an feh ih a hnenah, “Israel ih Pathian in, ‘Ka minung pawl cu nelrawn ramṭhing ah an feh ih keimah ih hrangah biaknak puai an tuah theinak dingah Izipt ram in suah hai seh,’ a lo ti,” tiah an ti.

²Cutikah Faro in, “BAWIPA cu zoso a si? Ziangah so BAWIPA ih thu cu ka ngai ding ih Israel cu ka fehter ding? BAWIPA cu kei ih ka theihmi a si lo. Curuangah Israel cu ka suahter lo ding,” tiah a ti.

³Cule annih in, “Hebru pawl ih Pathian cu kan hnenah a lang a si. BAWIPA kan Pathian hnenih thawinak kan va pek theinak dingah nelrawn ramṭhing ah ni thum sung va feh dingin in thlah hram aw. Cutiih kan tuah lo asile, doral in maw, natnak in maw, in that ding a si,” tiah an ti.

⁴Cutikah Izipt siangpahrang in Moses le Aaron hnenah, “Nan milai pawl hna ṭhateih ṭuan thiam lo dingin nan tawlrel cu ziang nan duhnak so a si? Hi sal pawl hi an hnaṭuannak ah fehter uh!

⁵Nan milai pawl hi kan ramsung minung ngaingai hnakin an tam sawn thlang. Cuih tlunah maw, an hna ṭuanlonak ding nan tumtah hrih!” tiah a ti.

⁶Cuih ni ah Faro in Izipt mi salkhawngtu le Israel mi hnaṭuantu pawl hotu hnenah thu a pek ih,

⁷“A hlan bangtuk in tlakrawh tuahnak ah hramro nan pe nawn lo pei; anmah tein hramro cu hawl hai seh.

⁸Asinain tlakrawh cu a hlanih an tuahzat thotho in tuah dingah nan fial pei; ṭhum hrimhrim hlah uh. An zaangzel ruangah an phunzai ih, ‘Pathian hnenah thawinak pe dingin kan feh pei,’ tiah an tinak hi a si.

⁹Tam sinsin le har sinsin in hna nan ṭuanter pei. Thuphan lawnglawng a ṭongtu pawl ih thu ngai loin an hnaṭuannak ah taima sawn hai seh,” tiah a ti.

¹⁰Cutikah salkhawngtu le hnaṭuan hotu pawl cu an minung pawl hnenah an feh ih, “Faro in, ‘Hramro ka lo pe nawn lo ding;

¹¹nan hmuh naknak ah nan hawl pei ih nan la pei; asinain tlakrawh cu nan tuah ṭheumi zat thotho nan tuah pei,’ a ti,” tiah an sim.

¹²Curuangah Israel mi pawl cu hramro hawl ah Izipt ram a suk le a so-ah an vak.

¹³Salkhawngtu pawl cun an nawtzok rero ih, “Hramro pek nan si laiih ni khatih nan tuah ṭheu zat thotho ni khatah nan tuah a ṭul a si,” an ti.

¹⁴Faro ih minung, salkhawngtu pawl in Israel hnaṭuan hotu pawl an hnaṭuanmi hmuahhmuahah ṭuanvo pekmi pawl cu, “Zianghrangah so a hlanih ni khat sungih nan tuah ṭheumi tlakrawh cu atu-ah nan tuah thei lo?” tiah an kawk ih an vuak ciamco hai.

¹⁵Cutikah Israel mi hnaṭuan hotu pawl cu Faro hnenah an feh ih, “Bawipa, zianghrangah so na siahhlawh pawl hiti ih in tuah?

¹⁶Atu-ah hramro in pe nawn lo; asinain bawipa, ‘Tlakrawh tuah uh’ in ti thotho fawn. Cuih tlunah bawipa, vuak tiangin kan tuar fawn. Na minung pawl ih mawh hrimhrim a si,” tiah an va phunzai.

¹⁷Cutikah Faro in, “Nanmah pawl hi mizee nan si; mi zaangzel phun hrimhrim nan si ruangah, ‘Kan feh pei ih BAWIPA hnenah thawinak kan pe ding,’ tiah nan ti ciamco.

¹⁸Curuangah atu rori nan hnaṭuan thok uh! Hramro malte hman pek nan si lo ding; asinain tlakrawh cu nan tuah dingzat thotho nan tuah hrimhrim pei,” tiah a ti.

¹⁹Israel mi hnaṭuan hotu pawl cun, “Nan tuah ṭheumi zat thotho nitinte in tlakrawh nan tuah pei,” tiah Faro in a ti thu an theih tikah kan harsa riai a sihi, ti an thei.

²⁰Faro hnen ihsin an suak ih anmah a rak hngaktu Moses le Aaron an ton tikah,

²¹an hnenah, “Nan thil tuahmi hi BAWIPA in hmu hramsehla, Faro le a kuthnuai bawi pawl ih in huatnak ding nan phiar ruangah BAWIPA in lo cawh hram seh. Kanmah pawl thahnak dingah hin an kut sungah namsau nan ret zo a si,” tiah an ti.

²²Cule Moses cu BAWIPA ih hnenah a feh sal ih, “BAWIPA, ziangah so hi Israel mi pawl parah harsatnak na thlenter? Ziangah so an hnenah keimah hi i thlah?

²³Nangmah ai-awh in Faro hnenih ka thlen vete in na minung pawl hi a tuahsiat ringring zo a si. Nang in le anmah runsuak ding zianghman na tuah fawn lo,” tiah a ti.