Read Falam Chin SUAHLANNAK 7 Bible Online

SUAHLANNAK 7 - Falam Chin bible

SUAHLANNAK 7

¹Cutikah BAWIPA in Moses hnenah, “Zohhnik, Faro hnenah nangmah cu Pathian bangtuk ah ka lo tuah pei ih, na u Aaron cu a hnenah na profet bangtuk in thu a sim ding.

²Thu ka lo pekmi hmuahhmuah Aaron na sim pei ih, amah in Faro hnenah a ramsung ihsin Israel mi suakter dingin a sim pei.

³Sikhalsehla Faro ih thinlung cu ka hakter pei ih Izipt ram sungah mangbangza a phunphun ka tuah khalle,

⁴Faro in nan thu a ngai lo ding a si. Cutikah an ram cu napi in ka hrem pei ih Izipt mi pawl cu nasa zetin cawhkuan ka pe pei; cutiin ka minung Israel mi pawl cu a bur a bur in Izipt ram ihsin ka hruaisuak hai ding.

⁵An ram ihsin Israel mi ka hruaisuak ih an tlunih ka baan thacak ka hawi tik lawngah Izipt mi pawl in BAWIPA ngaingai ka si ti in thei ding,” tiah a ti.

⁶BAWIPA ih a fial bangtuk in Moses le Aaron in an tuah.

⁷Faro hnenih thu an va sim tikah Moses cu kum sawmriat a si ih Aaron cu kum sawmriat le kum thum a si.

⁸BAWIPA in Moses le Aaron hnenah,

⁹“Faro in, ‘Ziangngai nan si le si lo, mangbangza cu tuah hnik hmen uh,’ a lo ti asile, nang Moses in Aaron hnenah, ‘Na kianghrol la awla Faro hmaiah hlon aw; cule rulah cangter aw,’ na ti pei,” tiah a ti.

¹⁰Moses le Aaron cu Faro hnenah an feh ih BAWIPA ih thupek vekin an tuah. Faro le a kuthnuai bawi pawl ih hmaiah Aaron in a kianghrol cu a hlon ih rulah a cang ngaingai.

¹¹Cule Faro in a mifim pawl le a dawithiam pawl a ko ih an dawithiamnak in Aaron ih tuah vekin an tuah ve.

¹²An kianghrol cu an hlon ih rulah an canter ve. Asinain an rulpi pawl cu Aaron ih rul in a dolh thluh.

¹³Sikhalsehla BAWIPA ih a sim cia bangtuk in Faro ih thinlung cu a hak ngaingai ih Moses le Aaron ih thu cu a ngai duh hrimhrim lo.

¹⁴Cun BAWIPA in Moses hnenah, “Faro ih thinlung cu a hak ngaingai. Ka minung pawl cu a thlah duh lo a si.

¹⁵Faro cu zinglamih Nail tiva-ih a feh tikah va tong aw. Tivapi kap in rak hngak awla, rulih a cang dahmi kianghrol kha keng aw.

¹⁶Cule Faro hnenah, ‘Hebru mi pawl ih Pathian BAWIPA in na hnenah i thlah ih, ka minung pawl in ramṭhing ah in biak theinak dingah ka minung pawl cu thlah seh, a lo ti. Asinain atu tiang cu a thu na ngai lo.

¹⁷BAWIPA ih thu cu hiti in a si: BAWIPA ka sinak cu ka tuah dingmi thil in na thei ding. Zohhnik, hi kianghrol hin tivapi ih tidai cu ka vuak pei ih tidai cu thisen ah a cang ding.

¹⁸Nga hmuahhmuah an thi thluh ding ih tiva cu a nam tuk lawmmam ding ruangah Izipt mi pawl in tivapi ih tidai cu an in thei lo ding,’ tiah na va ti pei,” a ti.

¹⁹Cun BAWIPA in Moses hnenah, “Aaron kha, ‘Na kianghrol la awla Izipt ram sungih a ummi tiva siseh, tihriat siseh, tili siseh, tidai hmuahhmuahih tlunah na kianghrol cu thlir aw. Tidai cu thisen ah a cang ding ih Izipt ramsung khuazakip ah, tikuang sungih tidai le lungbeel sungih an khawlmi tidai tiangin thisen ah an cang thluh ding,’ tiah sim aw,” a ti.

²⁰BAWIPA ih a fial bangtuk in Moses le Aaron in an tuah. Faro le a kuthnuai bawi pawl ih hmai rori-ah Aaron in a kianghrol cu a thlir ih tivapi cu a thawi. Cuvete in tidai cu thisen ah a cang ṭheh.

²¹Tiva sungih nga hmuahhmuah an thi ṭheh; curuangah a nam ngaingai ih Izipt mi pawl in tiva ih tidai cu an in thei lo. Izipt ram cu thisen lawnglawngin a khat.

²²Cun Izipt ramih dawithiam pawl in an dawi in cubangtuk cu an tuah ve. Faro ih thinlung cu a hah keelin a hak thotho. BAWIPA ih a rak sim cia vekin Moses le Aaron ih thu cu a ngai hrimhrim lo.

²³Hi bangtuk mangbangza hman cu poisa loin Faro cu a siangpahrang innpi ah a kir.

²⁴Cule Izipt mi pawl cun tiva ih tidai an in thei nawn lo ruangah tiva kapah tikhur an lai ciamco.

²⁵BAWIPA in tiva a vuak hnuah ni sarih a rei.