Read Falam Chin SUAHLANNAK 8 Bible Online

SUAHLANNAK 8 - Falam Chin bible

SUAHLANNAK 8

¹BAWIPA in Moses hnenah, “Faro hnenah feh awla, BAWIPA ih thu cu hiti in a si, ‘Ka minung pawl in in biak theinak dingah na thlah pei.

²Ngaihnik, na thlah duh lo a si ahcun na ram cu butlak in ka hrem ding.

³Tiva cu butlak in a khat ṭheh ding. Tiva in an suak ding ih na siangpahrang inn le na ihnak khaan, na ihkhun par le na kuthnuai bawi pawl le na minung pawl ih inn tiangin an lut ding. Na tappi le na beel sung tiangin an thleng thluh ding.

⁴Na minung, na kuthnuai bawi pawl le nangmah ih par tiangah an ra dawp ding,’ a ti va ti aw,” tiah a ti.

⁵BAWIPA in Moses hnenah, “Aaron hnenah, ‘Tivapi tlunah siseh, tihriat tlunah siseh, tili tlunah siseh, na kianghrol thlir awla, Izipt ram sungah butlak suakter aw,’ tiin sim aw,” tiah a ti.

⁶A ti bangtuk in Aaron in a kianghrol cu tidai tlunah a thlir ih butlak an suak ngaingai ih Izipt ram cu an khat sohso ṭheh.

⁷Sikhalsehla dawithiam pawl khal in an dawi in butlak cu an ram ah an suakter ve.

⁸Cutikah Faro in Moses le Aaron cu a ko ih, “Keimah le ka minung pawl ih hnen in butlak pawl a laakhlo theinak dingah BAWIPA hnenah thla cam hram uh. BAWIPA hnenih thawinak pe thei dingin nan minung pawl cu ka thlah ding,” tiah a ti.

⁹Cule Moses in Faro hnenah, “Butlak pawl cu nan inn hmuahhmuah sung ihsin an tlan thluh ih Nail tiva sung lawnglawngih an umnak dingah ziangtikah so nangmah, na kuthnuai bawi pawl le na minung pawl hrangih thla ka cam ding; a tikcu i sim aw,” tiah a ti.

¹⁰Faro in, “Thaisun ah cam aw,” tiah a ti. Cutikah Moses in, “BAWIPA kan Pathian bangtuk Pathian dang a um lo a si, ti na theihnak dingah na tivek ngaingai in a cang ding.

¹¹Butlak in nangmah siseh, nan inn pawl siseh, na kuthnuai bawi pawl le na minung pawl siseh, an lo taan dingih Nail tiva sung lawnglawngah an um ding,” tiah a ti.

¹²Cule Moses le Aaron cu Faro hnen ihsin an suak ih Faro hnenih a thlentermi butlak thu-ah Moses in BAWIPA hnenah thla a cam.

¹³Moses ih a dil vekin BAWIPA in a kimter ih innsungih a ummi butlak le hmuansung le lo sungih a ummi butlak an thi ṭheh.

¹⁴Izipt mi pawl in butlak cu a bur tumpipi ah an peng ih an ram cu butlak rimsia nam in a khat.

¹⁵Faro in butlak pawl an thi ṭheh thlang ti a hmuh tikah a thinlung cu a hak sal lala. BAWIPA ih simcia vekin Moses le Aaron ih thu cu a ngai duh lo.

¹⁶Moses hnenah BAWIPA in, “Aaron hnenah, ‘Na kianghrol in leilung vua awla, Izipt ramsung hmuahhmuahih leivut cu fikfa-ah an cang ding,’ tiin sim aw,” tiah a ti.

¹⁷Cubangtuk in an tuah. Aaron in a kianghrol cu a lak ih leilung a vuak. Cutikah leivut cu fikfa-ah a cang ih milai le ramsa parah an fu hluarhlo ciamco. Izipt ramsungih leivut hmuahhmuah cu fikfa-ah an cang ṭheh.

¹⁸Cutikah Izipt ramih dawithiam pawl in fikfa cu a tuah an tum ve naón an tuah thei lo. Khawzakip ah fikfa cu milai le ramsa parah an khat.

¹⁹An dawithiam pawl cun Faro hnenah, “Himi cu Pathian ih thiltinak a si,” tiah an ti. Sikhalsehla Faro ih thinlung cu a hak thotho ih, BAWIPA ih rak simcia vekin Moses le Aaron ih thu cu a ngai duh hrimhrim lo.

²⁰BAWIPA in Moses hnenah, “Tiva-ih Faro a feh tikah Faro tong dingin zingpitah va feh awla a hnenah, BAWIPA in, ‘Keimah in biak theinak dingah ka minung pawl thlah aw.

²¹Na thlah lo asile nangmah le na kuthnuai bawi pawl le na minung pawl parah le na inn sungah thothe ka khatter ding, tiah atu ihsin ka lo tiamcia. Izipt mi pawl ih inn siseh, an dinnak hmun leilung tiangin thothe a khat ṭheh ding a si.

²²Asinain cuih ni ahcun ka minung pawl ih umnak Goshen ram cu ka zuah ding; Keimah cu BAWIPA ka si ih hiti in thil a titu cu Keimah ka si kha na theihnak dingah Goshen ramah cun thothe pakhat hman a leeng lo ding.

²³Cuticun ka minung le na minung karlakah thleidannak ka tuah ding. Cuih mangbangza cu thaisun hrimhrim ah a thleng ding,’ a ti tiah va sim aw,” tiah a ti.

²⁴BAWIPA in mangbangza cu a tuah ngaingai ih thothe cu siarcawk loin Faro siangpahrang inn le a kuthnuai bawi pawl ih inn ah le Izipt ramsung hmuahhmuah ah an khat nohno. An ram cu thothe in a siatsuah ṭheh a si.

²⁵Cutikah Moses le Aaron cu Faro in a ko ih, “Feh uhla kan ram sungah hin nan Pathian hnenah thawinak cu pe ko uh,” tiah a ti.

²⁶Cule Moses in, “Cuticun a cang thiam lo ding; zianghrangah tile BAWIPA kan Pathian hnenih thawinak kan pekmi rannung cu Izipt mi pawl thinhengtertu a si ding. Izipt mi pawl mithmuh ah thawinak kan tuah ih kan rannung thahmi cu Izipt mi thinhengtertu ih a can ahcun lungto in in deng that ding a si.

²⁷Curuangah kan Pathian ih thu in pek bangtuk in BAWIPA hnenih thawinak pek dingah nelrawn ramṭhing ah ni thum sung kan feh a ṭul hrimhrim a si,” tiah a ti.

²⁸Faro in, “Hla tuk tiang nan feh lo ding a si ahcun BAWIPA nan Pathian hnenih thawinak pe dingah ramṭhing ah ka lo thlah ding. Keimah hrangah thla cam aw,” tiah a ti.

²⁹Cutikah Moses in, “Ka feh vete in BAWIPA hnenah thla ka cam pei ih thaisun ah thothe pawl cu na hnen le na kuthnuai bawi pawl ih hnen le na minung pawl hnen ihsin an hlo ṭheh ding. Asinain ka minung pawl in BAWIPA hnenih thawinak an pek theinak ding thu-ah in bum sal nawn hrimhrim hlah aw,” tiah a ti.

³⁰Faro hnen ihsin Moses cu a feh ih BAWIPA hnenah thla a cam.

³¹Cule Moses ih a dil vekin BAWIPA in a run kimter. Faro le a kuthnuai bawi pawl le a minung pawl hnen ihsin thothe cu pakhat hman taang loin an kiang reprep.

³²Asinain Faro ih thinlung cu a hak sal thotho ih Israel mi pawl cu a suahter duh hrimhrim lo.