Read Falam Chin SUAHLANNAK 9 Bible Online

SUAHLANNAK 9 - Falam Chin bible

SUAHLANNAK 9

¹Cun BAWIPA in Moses hnenah, “Faro hnenah feh awla a hnenah, ‘Hebru mi ih Pathian BAWIPA in, hiti in a ti: Keimah in biak theinak dingah ka minung pawl cu thlah aw.

²Na thlah duh lo ih na hren thotho hai a si ahcun,

³napi in ka lo hrem ding ih na ṭilva - na rang pawl, na laak pawl, na kalauk pawl, na cawrual, na tuurual le na me pawl - tlunah natnak ṭha lo a tlung ding.

⁴Israel mi pawl ih ṭilva le Izipt mi pawl ih ṭilva cu ka thleidang pei ih Israel mi pawl ih ṭilva cu pakhat hman an thi lo ding.

⁵BAWIPA in tikcu a tin zo ih thaisun rori-ah a thlengter ding a si,’ tiin va ti aw,” tiah a ti.

⁶BAWIPA ih a sim vekin a thaisun ah natnak ṭha lo cu a thleng ngaingai ih Izipt mi pawl ih ṭilva hmuahhmuah cu an puul ṭheh. Asinain Israel mi pawl ih ṭilva cu pakhat hman an thi lo.

⁷Faro in cuih thuhla cu a zingzoi ih Israel mi pawl ih ṭilva cu pakhat hman an thi lo ti cu a thei. Sikhalsehla Faro ih thinlung cu a hak thotho ih Israel mi pawl ih feh ding cu a duh hrimhrim lo.

⁸Cuih hnuah BAWIPA in Moses le Aaron hnenah, “Tappi-ih vutcam ṭhuam hnihthum in lak uhla Faro ih hmaiah acuih vutcam cu Moses in van ah theh seh.

⁹Izipt ramsung hmuahhmuah ah leidip bangtuk in a ṭhen-aw thluh ding ih khuazakip ah khuaihli hma a suakter ding ih minung le ramsa pawl cu an hma hluahhlo ding,” tiah a ti.

¹⁰Cuticun vutcam cu tappi ihsin an lak ih Faro ih hmaiah cun an va ding. Moses in vutcam cu van ah a theh ih minung le ramsa parah khuaihli a cang ih an hma hluahhlo.

¹¹Izipt ramih dawithiam pawl cu Moses hmaiah an ra suak thei lo; ziangahtile a dang Izipt pawl vek thotho in annih khal khuaihli hma an tuar thluh ve.

¹²Asinain Faro ih thinlung cu BAWIPA in a hahter thotho. Moses hnenah BAWIPA ih a sim cia bangtuk in Israel mi pawl cu a fehter duh cuang lo.

¹³Cun BAWIPA in Moses hnenah, “Zingthlapit tein feh awla Faro va tong aw. Cule a hnenah, ‘Hebru mi pawl ih Pathian, BAWIPA in na hnenah: Ka minung pawl ih in biak theinak dingah thlah aw.

¹⁴Tuih ṭum cu nangmah pumpak tlun le na kuthnuai bawi pawl le na milai pawl par hrimhrim ah leilung tlunah keimah bangtuk zohman an um lo ti nan theihnak dingah nasa zetin ka lo hrem ding.

¹⁵Nangmah le na minung pawl parah ka kut hawi in natnak thlenter ningla nang cu siatsuah thluh relrel na si zo ding.

¹⁶Sikhalsehla leilung tlun hmuahhmuah ah ka hminthannak a zai theinak dingah ka cahnak ka lo hmuh ih na nunnak ka lo zuah hrih a si.

¹⁷Asinain nangmah cu ka minung pawl ih tlunah na puarthau thotho ih na thlah duh hai lo.

¹⁸Ngaihnik, thaisun tuih tikcu ah Izipt ram thuanthu-ih a um dah lomi rial napi in ka tlakter ding.

¹⁹Cu a si hrangah, ṭilva siseh, thildang hmuahhmuah siseh, a lengih a ummi hmuahhmuah khum thluh dingin thu pe aw. A lengih a um mi minung le ṭilva tlunah rial cu a tla ding ih innsungih khum lomi pohpoh cu an thi ṭheh ding a si,’ tin va sim aw,” tiah a ti.

²⁰BAWIPA ih ṭongmi cu an theih tikah Faro ih kuthnuai bawi pawl a hrek cu an thin a phangzet ih an sal pawl le an ṭilva pawl cu inn ah an khum.

²¹Asinain a hrekkhat cun BAWIPA ih ṭongmi cu zianghman ah an siar lo ih an sal pawl le an ṭilva pawl cu innlengah an taan thluh.

²²Cule BAWIPA in Moses hnenah, “Na kut vanah thlir awla Izipt ramsung hmuahhmuah ih minung siseh, ṭilva siseh, lo sungih rawlkung tlun tiangin rial a tla ding a si,” tiah a ti.

²³Cule Moses cun a kianghrol cu van ah a thlir ih, BAWIPA in nimthlakau le khuari le rial thawn leilung cu a burh ciamco. BAWIPA in rial cu Izipt ramah a tlakter a si.

²⁴A nasa ngaingai mi rial a si ih nimthlakau cu khuazakip ah a hrawh aw zohzo. Izipt ram a thok ihsin cumi cu a roh bikmi thlisia a si.

²⁵Izipt ramsung khuazakip ah innlengih a ummi pohpoh, minung siseh ṭilva siseh, rial cun a siatsuah thluh. Lo sungih rawlkung hmuahhmuah an tlu thluh ih hramlakih thingkung hmuahhmuah an kiak ṭheh.

²⁶Goshen ram Israel mi-ih umnak lawnglawng a him; rial pakhat hman a tla lo.

²⁷Cutikah Faro in Moses le Aaron cu a ko ih, “Tuih ṭum cu keimah ka sual ih BAWIPA cu a dik a si. Keimah le ka minung pawl kan mawh.

²⁸BAWIPA hnenah thla cam hram uh. Hi khawri le rial cu kan khop zo. Nan suak hrimhrim ding, tiah ka lo kam. Rei nan um ding hman a ṭul nawn lo,” tiah a ti.

²⁹Moses in Faro hnenah, “Hi khawpi sung ihsin ka suah vete in BAWIPA hnenah ka baan ka phar ding. Cutikah khawri a reh pei ih rial khal a tla nawn lo ding. Cuticun leilung hi BAWIPA ih ta a si ti na thei ding.

³⁰Sikhalsehla nangmah le na kuthnuai bawi pawl in BAWIPA Pathian cu nan ṭih hrih lo ti ka thei a si,” tiah a ti.

³¹Rial in khumla kung le barli sangvut pawl cu a deng siat ṭheh. Ziangahtile khumla cu a cuut laifang a si ih barli sangvut khal a rah laifang a si.

³²Asinain sangvut le fangtlor cu an siat lo. Ziangahtile an cuut a tlai deuh.

³³Moses cu Faro taan in khawpi sung ihsin a suak. Cule BAWIPA hnenah a baan phar in thla a cam ih cuvete in khuari le rial tla cu an reh ih ruah khal a han.

³⁴Faro in ruah a han ih rial a tla nawn lo ih khuari khal a reh ti a hmuh tikah a sual sal ih a kuthnuai bawi pawl ih hnenah a ṭang lala.

³⁵Moses hnen ihsin BAWIPA ih a sim cia vek thothoin Faro ih thinlung cu a ruh sinsin ih Israel mi pawl cu a thlah duh lo.