Read Falam Chin JOB 1 Bible Online

JOB 1 - Falam Chin bible

JOB 1

¹Uz[1] an timi ramah mi pakhat a rak um ih a hmin cu Job a si. Job cu Pathian betu le a rinsan zettu a si. Amah cu miṭhazet a si ih thil ṭha lo zianghman tuah a duh lo.

²Fapa pasarih le fanu pathum a neih ih tlunah,

³tuu thawng sarih, kalauk thawng thum, caw thawng khat le laak zanga a nei. Hnenum tampi tla a nei ih Nisuahnak lam hmuahhmuah ah milian bik a si.

⁴A fapa pawl cun a haha tein rawl ei puai an tuah ṭheu ih hmun khatah rawl an ei khawm ṭheu; an farnu pawl tla an sawm ṭheu.

⁵An puai a cem tikah a thaizing zingpitah Job cu a tho ih a faate pawl thianfaiternak ah thawinak a pe ṭheu. Tumtah hrimnak um loin Pathian an hmuhsuam ding ih an sual pang ding ti a phan ruangah cuticun a tuah ringring a si.

⁶BAWIPA ih hmaiah vanmi pawl an ra suah ni a thlen tikah Satan [2] khal cu an hnenah a tel ve.

⁷Cutikah BAWIPA in, “Khuilam inso na rat?” tiah Satan cu a sut. Satan in, “Leilung pumpuluk, suk le so ka vahnak in ka ra,” tiah a ti.

⁸BAWIPA in, “Ka siahhlawh Job khi na hmu maw? Leilung pumpuluk ah amah bangtuk miṭha le rinsantlak zohman an um lo. Keimah i bia ih thil ṭha lo zianghman a tuah lo,” tiah a ti.

⁹Cutikah Satan in, “Zianghman ngah hlah sehla a lo bia duh leem pei maw?

¹⁰Amah siseh, a innsang siseh, a neihmi hmuahhmuah tiangin na humhim ih na kilkhawi. Thil a tuahmi hmuahhmuah parah mal na sawm ih rannung na pekmi pawl an tamtuk ih an ramah a khat ṭheh a si.

¹¹A neihmi hmuahhmuah khi laksak ṭheh cila na hmaika rori ah a lo cam mai ding,” tiah a ti.

¹²BAWIPA in Satan hnenah, “Na ti bangtuk cun siseh. A neihmi hmuahhmuah na kut sungah a um. Amah Job lawngte na siatsuah lo pei,” tiah a ti. Cule Satan cu a feh.

¹³Voikhat ah Job ih faate pawl cu an upa bik pa ih inn ah rawl ei khawmnak puai an tuah laifangah,

¹⁴mi pakhat cu Job hnenah a ra tlan ih, “Caw thawn lei kan let rero ih laak pawl cu kan kiangkapah hrampi an piat rero laiah,

¹⁵rinlopi in Sabean[3] mi pawl in an ra siim ih kan rannung hmuahhmuah in long ṭheh. Keimah siar lo na hnenum hmuahhmuah an that ṭheh. Keimah lawnghi zualkotu ah ka tlan man a si,” tiah Job cu a ra sim.

¹⁶Cupa ih ṭong a cem hlanah hnenum dang pakhat a ra thleng ih “ṭeek in na tuurual le na tuukhal pawl a tlak ih an zatein an thi ṭheh. Keimah lawng hi zualkotu ah ka tlan man a si,” tiah Job cu a ra ti.

¹⁷A ṭong hman a cem hlanah hnenum dang pakhat a ra tlan lala ih, “Khaldean[4] mi damiah rual bu thum in in siim ih kalauk hmuahhmuah an lak thluh ih tlunah keimah siar lo na hnenum dang hmuahhmuah an that ṭheh. Keimah lawnghi zualkotu ah ka tlan man a si,” a ti.

¹⁸A ṭong hman a cem hlanah, hnenum dang pakhat a ra lala ih, “Na fanu le na fapa pawl cu na fapa upa bik inn ih rawl ei puai an tuah laifangah,

¹⁹nelrawn ihsin thlisia a ra hrangih an inn a nuaithluk ih a sung um minung hmuahhmuah an thi ṭheh. Keimah lawnghi zualkotu ah ka tlan man a si,” tiah Job cu a ti.

²⁰Cutikah Job cu a tho ih riahsia in a hnipuan a thlek ṭheh. A sam a meetkolh ṭheh ih leilung ah bok tahrat in,

²¹“Lawngfangkheh in ka suak ih lawngfangkheh in ka thi ding. BAWIPA in i pek ih atu-ah a lak sal. A hmin thangṭhat si ko seh,” tiah a ti.

²²A hnenah hibangtuk thil a thleng naón Job cun Pathian a mawhthluk lo ih Pathian hmaiah a sual lo.