Read Falam Chin JOB 11 Bible Online

JOB 11 - Falam Chin bible

JOB 11

¹Hi thulolak ṭong hi zotal in kan let lo ding maw? Mi ṭongtam ti men in thiam an co ding mawsi?

³Job, kan lo let thei lo ah mawsi na ruat? Na puarthau ṭong hin in vuakdai dingah mawsi na zum?

⁴‘Ka ṭongmi le ka ruahmi hi a dik, Pathian hmaiah ka thianghlim,’ na ti.

⁵Pathian in lo let ve sehla ka va duh so!

⁶Fimnak ah hin thuah tampi a umzia, Minung thluak ih theih thei lomi thil tampi a umzia, Na hnenah run phuang hnik sehla, Thungaite ih ti ahcun Pathian cun na tuar ding zat hnakih deem deuh in a lo hrem sokhaw!

⁷Pathian ih natsatzia hi a ramri na thei thei pei maw? Ziangkimtithei ih huham maksakzia hi a suum na tah thei pei maw?

⁸A huham cu van hnakin a sang, Nang in ziangso na ti thei? Mithi khua Sheol hnakin a thuk, Nang in ziangso na theih thei?

⁹Pathian natsatnak cu leilung pumpi hnakin a tum deuh ih, Tipi thuanthum hnakin a kau sawn a si.

¹⁰Pathian in lo kai tahratin thawng ah lo thlak sehla, Thuṭhennak zungah lo fehpi sehla, zoso a kham thei ding?

¹¹Mi ṭha lo pawl zo an si ti cu Pathian in a thei ṭheh; A ṭha lomi an hnaṭuannak tla a hmu ṭheh.

¹²Mi-aa pawl an fim sal thei pei maw? Hramlak laak kha a ngam cia in a suak dah pei maw?

¹³Job, na thinlung diktein ret aw, Na baan pharin Pathian lam hoi aw.

¹⁴Na innih ṭhatlonak le na kutih sualnak pawl cu hlon ṭheh aw.

¹⁵Cutiin mithmai baal loin um awla, Ral ṭha zet le hngetkhoh zetin nung aw.

¹⁶Cutiin na zonzaihnak cu an reh vivo ding ih, A luanglan mi tilik na theih nawn lo vekin na ciing nawn lo ding.

¹⁷Cutiin na nunnak cu sun nitleu hnakin a tleu sawn ding ih, A thimzet na timi na nunnak cu zing khawvang bangin a vang ding.

¹⁸Thlangam zet le nunnuam zetin na um ding; Pathian in a lo hum dingih colhnak a lo pe ding.

¹⁹Na zau huahho ding ih ṭihmi ziang hman na nei lo ding, Mi tampi in bomnak an lo dil ding.

²⁰Asinain miṭha lo pawl cu riahsia in khua an cuan ding ih, Luatnak lamzin an hmu lo ding. A neta bik an thawthawt kha, ruahsannak an neihsun a si ding.