Read Falam Chin JOB 13 Bible Online

JOB 13 - Falam Chin bible

JOB 13

¹Nan ṭongmi hmuahhmuah cu ka mit ih ka hmuh ciami le ka hna ih ka theih cia hlir an si. Ka theithiam lomi a um lo. Nanmah theih zat poh ka thei ko. Nanmah hnak in ka nau cuang lo.

³Asinain nannih thawn thu kan el aw lo; Ziangkimtithei, Pathian thawn kan el aw a si. Ka thu cu Pathian thawn el awk ka duh.

⁴Nan thutheih lozia hi thuphan in nan khuh; Zohman a damter thei lotu sibawi vek nan si.

⁵Ṭong lotein um sawn uhla, Mi in mifim ah an lo ruat ding.

⁶Ka ṭongmi ngai hrih uhla Ka thu feh daan ruat hnik uh.

⁷Ziangah so thuphan hlir nan rel? Nan thuphan hi Pathian hrangah a ṭhahnem ding nan ti mawsi?

⁸Pathian nan ṭan tum ngai mawsi? Thuṭhennak hmunah a hnen ṭangin in el tum maw?

⁹Pathian in lo zingzoi ngai sehla Thil ṭha pakhatte tal na parah a hmu ding maw? Milai nan bum thei vekin Pathian bum thei nan tum maw si?

¹⁰A thupte ih mi thleidannak nan neih a si ahcun, Amah in a lo phuang ding ih nun a lo sim ding.

¹¹A huham in a lo phangter ih, A ṭih nunnak na tlunah a tla lo ding maw?

¹²Nan ṭongṭhimnak pawl cu vutcam vek an si; Nan thu-el thiamnak pawl cu tlak vek lawng an si.

¹³Daite in rak um hrih uh, ka ṭong ve ding; A piannaknak ah piang seh!

¹⁴Ṭihphannak hmun ka thleng, Ka nunnak ka ui nawn lo.

¹⁵Beiseinak ka nei nawn lo, Pathian in i that leh ko ding; Sikhalsehla ka thuhla cu a hnenah, a hmai rori ah ka thlenpi ding.

¹⁶Ka ralṭhatnak hin i hum thei meen ding, Ziangahtile miṭha loin Pathian an tong ngam dah keel lo.

¹⁷Ka simfiangnak ṭong hi ngai uh, Ka thusimmi hi nan hna ah lut seh.

¹⁸Ka thuhla cu ka ngaihtuah kim zo, Thiam in coter ding, ziangahtile ka thu a dik a si, ti ka thei.

¹⁹Maw Pathian, ra tahrat in sual i puh ngaingai ding maw? Cutiin asile kei cu daiziar in ka um ding ih ka thi sawn ding.

²⁰Thil pahnih lo dil duhmi ka nei; Na lungkim awla na hnen ihsin ka relh lo ding.

²¹I hremnak cu bang thlang awla, Na ṭihnunnak in ka thin i phangter nawn hlah.

²²Maw Pathian, nang ṭong hmaisa awla ka lo let ding. Culole kei ka ṭong hmaisa ding ih i let aw.

²³Ka mawhnak le daan ka buarnak ziangzat so an si? Ka sualnak le ka tlaksamnak pawl i sim hnik?

²⁴Ziangruangah so na hmai na thuh? Ziangruangah so ral vekih i zoh?

²⁵A thin phang seh i ti maw si? Kei cu zianghman ka si ual lo, Hnahrawp ka si ko lo maw? Fangkungro pakhat na do rero vek a si ko!

²⁶A mawi lo zetmi sualnak tla i puh ciamco, Ka no lai ih ka rak tuah mi thil sual pawl tla.

²⁷Thir cikcin in ka ke na ṭeem; Ka ke kar na zoh hliah ih Ka keneh tiangin na zingzoi ṭheh.

²⁸Curuangah thingrop bangin ka tlu ih, A muatmi hnipuan bangin ka zaam ṭheh.