Read Falam Chin JOB 14 Bible Online

JOB 14 - Falam Chin bible

JOB 14

¹Nunau sung suak milai hmuahhmuah, An nun a tawi ih zonzaih an tuar.

²Pangpar bangin an ṭhang ih an ziam sal; Phenthlam bangin an hloralta, Rei an awh lo.

³Pathian, na mitsiir hmanin i zoh duh ding maw? Ka thu ṭhen dingah na hmaiah i suahpi ngai ding maw?

⁴A thiang lomi milai sung ihsin a thiangmi a suak thei ding maw? A suak thei dah lo ding.

⁵A nun ding kum zat cu khiah cia a si ih, A thla zat tla ruah cia in a um. Na lairel ciami an si ih thleng theih an si nawn lo.

⁶Hmundang hoisan awla amah lawng taanta mai aw; A nunnak harsatnak ni cu a nuampi thei tawkin nuampi seh.

⁷Hau ciami thingkung hrang hmanah ruahsannak a um; A cerh ding ih a nung sal ding, A hram note a ṭhang vivo ding.

⁸A hram pawl an tar ih, a bul cu leilung ah rop hmansehla,

⁹Tidai a ngah cun a cerh ding ih thing note bangin a kho sal ding.

¹⁰Asinain milai a thih ahcun a cem thla a si. A thih hnu khuiah so a um?

¹¹A car mi tiva bangin le a kang mi tipi bangin,

¹²Minung a thih cun a tho nawn lo, Van hmuah a hlohral ṭheh hlanlo an ṭhang sal nawn lo ding; An ihnak ihsin an tho nawn lo ding.

¹³Mithi khua Sheol ah i thup cila ka va duh so; Na thinheng a reh hlan lo i thup aw. Cule nangmah in a tikcu khiak awla, i theih salnak caan ret aw.

¹⁴Milai a thih cun a nung sal thei ding maw? Asinain tikcu ṭha ka hngak ding, Atu-ih harsatnak caan a liam tiang ka hngak ding.

¹⁵Cutikah i ko dingih kei in ka lo awi ding, Na kutih sersiammi kei in ka parih na lungawinak ka hmu ding.

¹⁶Ka ke kar cu na zoh hliah ding, Asinain ka sualnak cu na zingzoi rero lo ding.

¹⁷Ka mawhnak cu i ngaidam ding ih a tompi in na hlon hlo ding; ṭhat lonak ka tuahmi hmuahhmuah na hnawtfai ṭheh ding a si.

¹⁸Tlang pawl an cim ṭhehnak tikcu a thleng ding, Lungto tumpi pawl tla phong ṭheh an si ding.

¹⁹Tidai in lungto a ei ṭheh, Lihong in leilung a fehpi ṭheh; Cuvekin milai ih nunsung ruahsannak hmuahhmuah na feh hlo ṭheh a si.

²⁰Milai cu kumkhuadaih in na neh ih an hloral ṭheh; A thih tikah a hmel na thleng ih na dawihlo.

²¹A fapa pawl in hminṭhatnak an ngah, Asinain a thei nawn lo; An hmin a siat tik khalah a thei cuang lo.

²²A taksa ruangpi a nat lawng a thei, A thinlung harsatnak lawng a tuar.