Read Falam Chin JOB 15 Bible Online

JOB 15 - Falam Chin bible

JOB 15

¹Job, na ṭongmi hi thulolak lawnglawng a si. Nisuah ihsin a rami thli bangtuk lawng a si.

³Na ṭong vekin mifim zohman an ṭong lo ding; Tican nei lo ṭong cun zohman in anmah ṭannak ah an hmang lo ding.

⁴Pathian ṭihzah lo dingin mi thapetu na si, A hnenih thlacam duh lo dingin na tuah hai a si.

⁵Na ṭhat lonak in na hmur a zirh; Na hrilmi cu depdetnak lei a si.

⁶Kei ih lo hnon a ṭul lo; Na ṭongkam in sual a lo puh ih a lo hnong zo a si.

⁷A suak hmaisa bikmi ah na ruat aw maw si? Pathian in tlang pawl a siam laiah na rak um zo maw si?

⁸Pathian ih tumtahnak na rak thei cia maw si? Milai fimnak hi nangmah lawngih neih ah maw na ruat?

⁹Na theih mi hi kan theih lomi zianghman a um lo. Na theihthiammi kan theihthiam lomi ziangso a um?

¹⁰Kan fimnak hi ṭuakpaar cia upa, Na pa hnakih upa sawn hnen ihsin kan zirmi a si.

¹¹Pathian in hlemnak thu a lo ruah, Hmurka neemte ṭong hi na hrangah zianghman a ṭangkai lo maw? Ziangah so na pom duh thotho lo?

¹²Na ti hlehle ih na thinheng in in zoh ciamco.

¹³Pathian parah na ning a hang ih a thang na siat ciamco. Na hmur in ṭongsia a suak ciamco.

¹⁴A thianghlim milai an um thei ngai ding maw? Pathian hmaiah miding an um ngai pei maw?

¹⁵Pathian in a vancungmi hman a zum lo ih, A hmaiah anmah hman an thiang lo.

¹⁶A borhhlawh mi milai, felnak zianghman nei lo, Tidai in vekih siatnak lawng a intu milai cu, ziangtlukin so a thianghlim lo sinsin ding?

¹⁷Curuangah Job, ka theih ve mi hi ngaihnik! Ka hmuhmi na hnenah ka phuang ding.

¹⁸Mifim pawl in an pale hnen ihsin An zirmi fimnak thutak in zirh, An thuhmi zianghman a um lo.

¹⁹An ram sungah ramdang mi zohman an rak um lo ih, Pathian hnenin a hruaisualtu ding milai zohman an um lo a si.

²⁰Miṭha lo le misual in a nunsung hmuahhmuah ah harsatnak a tong. Zaangfah nei lo hrangah hremnak cu retsak cia in a um.

²¹Ṭihphannak aw cu a hna sungah cat loin a thang. Ka him a si, a ti laifangah rukru in an ram.

²²Thimnak sungin luat thei dingah ruahsannak a nei lo, Khuitawk hmun in simaw ralnam in a rak hngak.

²³A ruaksa ei dingah langta pawl in an thlir. Ka hmailam cu a thimzet, ti a thei.

²⁴A cakzet mi siangpahrang in mi a do bangin, Siatsuahnak in do dingah a bawh ringring.

²⁵Ziangkimtithei a dodaltu le, Pathian hnenih a kuttum a hawi rerotu milai ih nunnak lamzin cu cu bangtuk in a si.

²⁶Mi puarthau le mi luhlul in, Thinlung ruhzet in a ralphaw cu a khai ih Pathian do dingah hmaiah a nor ciamco.

²⁸Khua tampi a nehtu le Innram pawl a luahtu cu amah a si. Asinain raldonak a um tikah cun cuih khua le inn pawl cu a siat ṭheh ding.

²⁹Kum rei a lian lo ding, A neihmi pawl rei an awh lo ding, A phenthlam tiang in a hlo ding.

³⁰Thimnak sungin a luat lo ding; A hnge meisa in a kaang ṭhehmi, A par thlisia in a nuai ṭhehmi thingkung bangtuk a si ding.

³¹A aat hraat ih siatnak lawng a rinsan ahcun, A comi cu siatnak lawng a si ding.

³²A tikcu a kim hlanah a vuai ding, Thinghnge bangin a ro ding ih a hring sal nawn lo ding.

³³A hmin hlan ih a rah a ṭil ṭhehmi Sabit kuang vek a si ding, A par a ṭilmi Olif kung vek a si ding.

³⁴Pathian thei lo pawl cun tesinfa an nei lo ding, Nawhthuh tangka in an sak mi inn cu meisa in a kang ṭheh ding.

³⁵Annih cu mi siatsuah a tumtu le ṭhatlonak a tuahtu an si; An thinlung cu mi bumnak lawngin a khat.