Read Falam Chin JOB 17 Bible Online

JOB 17 - Falam Chin bible

JOB 17

¹Ka nunnak a cem zik thlang; Ka thaw hman ka thaw thei nawn lo. Thlan in i rak hngak.

²I hmuhsuamtu pawl in in kulh ṭheh, Cupawl cu cat loin ka zoh hai.

³Maw Pathian, ka thuhrennak ah, keimah hi i co hram aw; Kei i ṭantu ding zoso a um cuang?

⁴Thuruah thiamnak neilo dingin an thinlung na phit ṭheh; Curuangah nehtu siter hram hlah aw.

⁵Khuahlan ṭongṭhimnak ah, ‘Mi pakhat in tangka duh ah a rualpi a phiar asile, a faate an mit a caw ding’ ti a um.

⁶Cuih ṭongṭhimnak cu ka parah an thlenter; Ka hnenah mi an ra ih ka hmaiah cil in phui.

⁷Ka riahsia in ka mit khal a mal thluh zik thlang; Ka kut le ka ke pawl cu phenthlam vekin an ṭawl.

⁸Ka fel tiih a ruat-awmi pawl an khawruah a har ih, An zatein Pathian thei lo tiah in hnong ṭheh.

⁹Upat tlak ka si tiih a ruat-awmi pawl in, Kan dik a si, tiah an zum sinsin.

¹⁰Sikhalsehla an zatein ka hmaiah ra ding hnik hai sehla, An lakah mifim pakhatte hman ka hmu lo ding.

¹¹Ka nunnak ni cu a liam vivo; Ka tumtah mi pawl an hlo deuhdeuh; Ka saduhthah pawl an cem.

¹²Asinain ka rualpi pawl cun zan khi sun an ti; Khua a vang zik thlang an ti, Asinain kei cu khawthim sung thotho ah ka um.

¹³Ka ruahsanmi cu mithi khua Sheol lawng a si; Cutawkah khuathim sungah ka ihphah ka phah ding.

¹⁴Khawhrum cu ‘Ka pa,’ ka ti dingih, I eitu tholung pawl cu, ‘Ka nu’ culole ‘ka farnu,’ ka ti ding.

¹⁵Cuti asile ka beiseinak cu khuiah so a um? Ka ruahsanmi i hmuhsaktu zotal an um maw?

¹⁶Mithi khua Sheol ka feh tikah Ruahsannak in i thlun thei lo ding.