Read Falam Chin JOB 20 Bible Online

JOB 20 - Falam Chin bible

JOB 20

¹Job, ka riah i siatter; Na thu let loin ka um thei nawn lo.

³Na ṭong cia mi pawl hi hmuhsuam nak ṭong an si; Asinain ziangvek in ka lo sawn ding, ti ka thei, theihthiamnak ka nei.

⁴Na theih vekin, hlanlaipi leilung parih minung an um hramthok ihsin,

⁵Miṭha lo lungawinak cu tikcu tawite lawng a si.

⁶Ṭhangso in van tiang hmansehla, A lu in vanrang dai hmansehla,

⁷Leivut vek thli in a semhlo ding; A rak thei ciatu pawl in ‘Khuiah so a si’ an ti rero ding.

⁸Zanmang bangin a hlo ding; Mang ih hmuh mi bangin ziangtik hmanah hmuh sal a um nawn lo ding.

⁹A hmutu mit in an hmu lo ding; A um ṭheunak hmun in a hlo ding.

¹⁰Farah zonzai hnen ihsin a ruk mi thilri pawl cu, A fapa pawl in an lennak sungin an pek kir ding.

¹¹A nonal ih a cakvakmi a ruang cu, Rei lote-ah leivut ah a cang ding.

¹²Thil ṭha lo cu a thlum zetin a thei; Curuangah a hrekkhat a ka sungah a hmawm.

¹³A lei hnuai ah reipi a ret, A thlummi kha a phui siang lo.

¹⁴Asinain cuih rawl a eimi cu a pumpi sungah a kha; Thihsii vekin a kha a si.

¹⁵Mi ṭha lo in a rukmi thilri cu a luak sal ṭheh; Pathian in a long sal, a pumpi sung ta hman a phorh sal ṭheh.

¹⁶Mi ṭha lo ih a dolh mi cu thihsii a si; Rul hraang ih tur bangin mi a that.

¹⁷Tiva bangin olif siti a luangmi cu a hmu lo ding; Cawhnawi le khuaitizu a luangmi khal a hmu lo ding.

¹⁸Hna a ṭuan sanmi hmuahhmuah ei loin a hlon a ṭul ding; A lennak thilri pawl nuam in a hmang man lo ding.

¹⁹Ziangahtile farah pawl a namsuk ih zianghman ah a siar hai lo. Mi inn sak cia pawl tla a long.

²⁰A duhhamnak cu cem ti a nei lo; Curuangah a sunloih mi thilri hman hum theimi zianghman a nei lo.

²¹A in a ei ih a hlah mi zianghman a um lo; A lennak cu a rei hlanah a cem.

²²Hlawhtling zetin a um laifangah, Vansan malmaknak a ra thleng; Harsatnak le riahsiatnak nasa zetin a hnenah a thleng a si.

²³A duhzat in ei ko seh! Pathian thinhengnak cu a hnenah meisa bangin a alh ding ih ruah bangin a parah a sur ding.

²⁴Tlan a tum ih thir ralnam in a luat hmanah, Dar conkiang in a ngah ih a thin a sun ngah.

²⁵Conkiang cu a pum ah a phun aw, Cuih conkiang cu an suah ngah; A tleumi a zik hriam ihsin thisen for khat hnu for khat a tla; Cutikah a thinlung cu tuksumnak in a khat.

²⁶A khawl ciami thilri hmuahhmuah cu siatsuah an si; Milai ih muah lomi meisa in amah le a innsang an kaang ṭheh.

²⁷Hi pa sualnak cu van in a langter; Amah do dingah leilung cu a tho.

²⁸Pathian thinhengnak cu tilik bangin a ra ding ih, A lennak hmuahhmuah a zatein a siatsuah ding.

²⁹Mi ṭha lo pawl ih tonmi cu cu bangtuk a si; An hrangah Pathian ih lairel ciami a si.