Read Falam Chin JOB 24 Bible Online

JOB 24 - Falam Chin bible

JOB 24

¹Ziangah so Pathian in thuṭhennak ni a khiah lo? Amah a riantu pawl in thudik an conak dingah!

²Milai in ram tam deuh ngah duh ah ramri lungphun an ṭhawn; Tuu an rak fir ih anmah ih tuu lakah an ret.

³Ngakṭah farah pawl ih laak tla an fir; A leiba a kuan ṭheh hlan lo nuhmei nu ih cawcang an hren.

⁴Mi zonzai pawl an palcih hai ih, Mi tlasam pawl cu anmah ṭih ah an relh.

⁵Curuangah mifarah pawl cu hramlak laak bangin ramcaar ah rawl an hawl; Khuitawk hmanah an faate hrangah rawl an ngah thei lo.

⁶Midang lo sungah rawl an lak; Mi ṭha lo pawl ih sabit hmuanah sabit rah an khawm.

⁷Zan ah puan loin lawngte in an it, An taksa hlumtu zianghman a um lo.

⁸Tlang par ih ruah in a ciah hai; Beunak a um lo ruangah lungpi phenah an bek.

⁹Mi ṭha lo pawl in pa nei lo nauta pawl salah an zuat; Mifarah ih faate pawl cu leiba ai ah an lak.

¹⁰Mi zonzai pawl hnipuan nei loin khawleng ah an feh; Fangteel an phur rero naón an ril a rawng thotho.

¹¹Siti dingah olif an rial, Sabitti dingah sabit rah an rial; Asinain an ti a haal thotho.

¹²Khawpi sungah hriamhma pu mi le A thi cuahco mi pawl an au rero; Asinain an thlacamnak cu Pathian in Zianghman ah a siar lo.

¹³Annih cu tleunak duh lotu an si; A theih khal an thei lo ih a lamzin an thlun duh lo.

¹⁴Zinglam khawfingcatah mithattu cu farah le mitlasam that dingah a pok, Cule zanah mi thil a fir.

¹⁵Uire pa cu khawthimah mi a hngak, ‘Zohman in in hmu lo ding’ a ti; Theih ṭih ah a hmai a khuh-aw.

¹⁶Fifir in zan ah inn an bauh, Asinain sun ahcun inn ah an relh; Tleunak cu an hrial.

¹⁷Sun vang cu an ṭih; Asinain zan khawthim cu an ngam. [Zofar][11]

¹⁸Mi ṭha lo cu tilian in a fenhlo; A ram neihmi cu Pathian ih siatcam mi ram a si; A sabit hmuan ih hnaṭuan dingah an feh nawn lo.

¹⁹Vur cu a satnak le a caarnak hmun ahcun a ziam vekin, Misual cu a nungmi umnak ram in an hlo a si.

²⁰Zohman in an thei lo, amah ih nu hman in a ciing nawn lo; Tholung in an ei ih zanthing tlu bangin a rop ṭheh.

²¹Ziangahtile nuhmei a tisiat, Fa nei lo a cingmi nunau parah, Zaangfahnak zianghman a nei lo.

²²Pathian in a huham in micak pawl a siatsuah, A caangvai ih miṭha lo an thi.

²³Pathian in himnak hmunah a umter, Asinain a mit in a thlingthla ringring.

²⁴Caan tawi sung cu mi hlawhtling zet a si; Asinain rei lote-ah hrampi bangin a vuai sal; Ah ciami fangkung bangin.

²⁵Ka simmi vekin a si lo, tiah a el theitu nan um maw? Ka ṭongmi hi a dik lo, tiah a langter theitu nan um maw?