Read Falam Chin JOB 28 Bible Online

JOB 28 - Falam Chin bible

JOB 28

¹[14] Ngun an laihnak khur a um; Sui an thianternak hmun a um.

²Milai in thir cu leilung sungin an lai, Dar cu lungto sungin an titter.

³Milai cu a thuk bik thimnak hmun tiang an thleng; Leilung sung a thuknak ah an lut, Thimnak sungah lungto an hawl.

⁴Milai umnak ihsin a hlatzet ah Milai ke ih pal dah lonak hmunah lungmankhung an lai leikua sungah; Cutawkah anmah lawng hna an ṭuan, Khur sungah hri in an thlai aw.

⁵Leilung parah thlairawl a kho; Asinain cuih leilung sung cu Meisa kaang vekin an ling an so ih an let aw hluahhlo.

⁶Leilung ih lungto sungah mepian lungmankhung a um; A leivut lakah sui an hmu.

⁷Cuih khur sung fehnak lamzin cu khaupi in a thei lo; Langta hman a tlunah a zam dah lo.

⁸Kiosa siseh, sahrang dang siseh, Cuih lamzin cu an zawh dah lo.

⁹Milai in a hak bikmi lungto an lai; Tlang hman a hram in an lailet ṭheh.

¹⁰Lungto lakih kua an laih tikah Lungto mankhung an hmu.

¹¹Tiva hna tla an hmusuak ih Leilung sungih thuh mi thil an phorh suak.

¹²Asinain fimnak cu khuiah so ton a theih ding? Theihthiamnak cu khuiah so zir a thei ding?

¹³Fimnak taktak cu minung umnak hi leilung ahhin a um lo; A man ngaingai cu zohman in an thei lo.

¹⁴A thuukmi tifinriat le a thuukmi tipithuanthum in, ‘Hinah fimnak a um lo,’ an ti.

¹⁵Fimnak cu sui in lei a theih lo; Ngun khal in lei a theih lo.

¹⁶Sui ṭha bik le lungmankhung pawl khal in a man an tluk lo.

¹⁷A man cu sui hnakin a tam sawn; Sui kheng le thlalang ṭha bik man hnakin a tam sawn.

¹⁸Fimnak man ngaingai cu lungvar mankhung, lungsen mankhung le Lung sendup mankhung man hnakin a tam sawn.

¹⁹A ṭha bikmi lung-aihre mankhung le sui ṭha bik thawn khal fimnak cu ṭhim theih ding a si lo.

²⁰Khuiah so fimnak hram cu a si? Khuiah so theihthiamnak cu a um?

²¹Leitlun ih a nungmi minung le ramsa in an hmu dah lo; Van ih a zammi vate khal in an hmu dah lo.

²²Thihnak le siatsuahnak hman in, “A thluathlam ih relmi lawng kan thei,” an ti.

²³Pathian lawngin lamzin a thei; Amah lawngin fimnak lamzin le a hmun cu a thei.

²⁴Ziangahtile amah in leilung deng tiang a hmu ih, Vanrang hnuai thil hmuahhmuah khal a hmu ṭheh a si.

²⁵Pathian in thli cu hmual a neihter ih, Tifinriat hrangih ramri a rak tuah tikah,

²⁶Ruah a surnak ding hmun a ruat cia ih, Khawri le ṭeektla hrang lamzin a rak sial tikah,

²⁷Culai ah Pathian in fimnak cu a hmu ih man a neihzia a hniksak. Cule a lungkim in a hngetter.

²⁸Pathian in milai hnenah, “Fimnak neih nan duh asile Pathian ṭihzah uh; Theihthiamnak neih nan duh asile a ṭha lomi hrial uh,” a ti.