Read Falam Chin JOB 29 Bible Online

JOB 29 - Falam Chin bible

JOB 29

¹Job cu hiti in a ṭong sal:

²Ka nunnak hi a hram in thok thei sal sehla, Pathian in i rak zoh camcin lai vek khan!

³Pathian ih mei-inn cu ka lu parah a tleu ih, Khawthim sung ka feh tikah tleunak i pek.

⁴Culai ahcun ka rak neinung zet ih Pathian ih pawlkomnak ruangah ka innsang cu a him.

⁵Ziangkimtithei Pathian ka hnenah a rak um ih, Ka faate pawl khal ka kiangkap ah kimtein an um.

⁶Ka caw le ka me pawl in hnawi tampi in pek; Lungkhol lak khalah ka olif kung an kho thei.

⁷Khawsung upa pawl an ton awknak khawpi kotka ih ka to ve tikah,

⁸In hmuh vete in mino pawl cu an kiang, Upa pawl tla in upatnak langter in an ding.

⁹An hotu pawl an ṭong nawn lo, An hmurka huh mi an bang.

¹⁰An lakih mi upa pawl tla an dai khepkhep. An lei a caang nawn lo.

¹¹I hmutu le ka thu i theitu pawl hmuahhmuah in, Ka hnaṭuanmi ruangah in porh zet.

¹²Mifarah an au tikah ka bawm, Ngakṭah zonzai zohman bawmtu nei lo ka zoh hai.

¹³Awloksong vansaanglam mi pawl in in thangṭhat zet, Nuhmei pawl tla himnak le thinlung nomnak ka hawl sak.

¹⁴Dingfelnak cu hnipuan bangin ka hruk ih, Dingthluk lairelnak cu puanfual le lupawng bangin ka hruk.

¹⁵Mitcaw pawl hrangah an mit can-ai ka si; Ke-awl pawl hrang khalah an ke can-ai ka si.

¹⁶Farah zonzai hrangah pa ka si ih Ka theih lo mikhual pawl harsatnak an ton tikah ka ṭan hai.

¹⁷Zaangfahnak nei lo thuneitu pawl ka siatsuah ih, An hremmi pawl ka luatter hai.

¹⁸Kum reipi nung dingah le Ka inn sungah thlangamte ih thi dingah ka ruat aw ringring.

¹⁹A hrihram in tidai a ngahtu le A hnge in daitla a dong ringringtu thingkung vek ka rak si.

²⁰Zokhal in in lawm, i relsiatu zohman an um lo; Ka thazaang a ṭum suk lo.

²¹Midang hnen ruahnak ka pek tikah Daite in ka thu cu an ngai.

²²Ka sim ṭheh tikah kam khat hman, El ding le beet ding an nei lo. Ka ṭongmi cu an sungah ruahti bangin a pil.

²³Zokhal in ka ṭong ngai ding an hiar zet, Lothlo pawl in ṭoruah an duh zet bangin.

²⁴An thin a nau tikah ka mithmai ṭha ka langter; Hni suamso ih ka um tikah an thin a nuam sal.

²⁵Hotu hna ka ṭuan ih thurel ṭulmi ka relcat; Siangpahrang in a ralkap pawl a ho vekin ka ho; An riah a siat asile ka hnem hai a si.