Read Falam Chin JOB 30 Bible Online

JOB 30 - Falam Chin bible

JOB 30

¹Asinain atu-ah cun ka hnak ih mino deuh tla in, Hnihsuahsainak meen ah in hmang; An pa le pawl cu zianghman ih ṭhahnem lo, Ka tuu kiltu ka uico bawmtu hmanah ka duh lomi pawl an rak si.

²Tha nei lo micor pawl, ka hrangah zianghman ṭuan thei ding lo pawl kha!

³An farah, an ril a rawng tuk ih Zan khawthim ramṭhing tla ahcun Thinghram ro hman a nget rero ding pawl an si.

⁴Nelrawn hrambur an bawt ih an ei, Thawtnak zianghman nei lomi hmunphiah kung tla an ei.

⁵Mi hmuahhmuah in an hauh ih an dawihlo; Fifir nan hauh vek khin!

⁶Lungpuk le khaam ih an laih mi kua sungah an um.

⁷Hramlak ah ramsa bangin an ai, Hrambur thuai ah an ben aw.

⁸Mi ṭhahnem lo, zianghman ih siartlak lo rual, Ram sung ihsin dawihlomi an si.

⁹Atu ahcun an ra ih in ra hnihsan, Kei cu an puahcokmi lawng ka si.

¹⁰In ti daan cu luaksuakza a si; Ka hrangah cun mi ṭha tukah an ruat aw, Ra tahrat in ka hmaiah cil in ra phui.

¹¹Pathian in mi ṭawnṭai le bawmtu nei lo ih i tuah ruangah, An thinhengnak cu ka parah an burh ciamco.

¹²Miburpi in suupnak neiloin in do, In dawi ih tlanhloter in tum; Neta bik siatsuah ding an timtuah.

¹³Ka luatnak lamzin in in khan ih a siatsuah in tum; A rak khamtu zohman an um lo.

¹⁴Ka ṭankhuarnak hruang pawl an pahtlang ih, Ka parah an rung tla ciamco.

¹⁵Ṭihphannak in i neh, Ka hminthannak le huham ka neihmi cu thli vekin an hlo ṭheh. Ka lennak cu mero vekin a hlo.

¹⁶Atu cu thih ding lawng ka baak; Ka tuarnak a deem deuh ti a um dah cuang lo.

¹⁷Zan ah ka ruh hmuahhmuah in a na; I ṭam rerotu cu reh ti a um dah cuang lo.

¹⁸Pathian in ka angki hngawng in i kai ih, Ka hnipuan peeng ṭheh in i dirh.

¹⁹Ciarbeek sungah i hlon ih Hnawmhne le vutcam tluk ka si zo.

²⁰Pathian, ka lo ko naón i sawn dah lo; Thla ka cam khalle i umsan meen.

²¹Zaangfah nei loin i tisiat a si. Na tha neih tawp in i hrem.

²²Thli i sem hloter; Thlisia lakah nangmah in i hlon ciamco.

²³Milai zokhal ih ton ciar dingah relcat ciami, Thihnak ah i thlenpi tum a si, ti ka thei.

²⁴Zaangfahnak dil dah ti lo, zianghman a ti thei nawn lotu, A thinlung le a taksa a siat ṭheh zo mipa cu ziangah so na do duh rero?

²⁵Harsatnak a tongtu hnenah ka ṭap ih, Mi tlasam hrangah ka riah a sia, a si lo maw?

²⁶Lungawinak le tleunak ka ruahsan mi an si naón, Vansaannak le thimnak riangri an ra thleng.

²⁷Ka thinlung cu donharnak le natnak thawn a buai nasa, Nitinte tuarharnak in i tlun sinsin.

²⁸Natnak ka tuar ih ka dum ṭheh, Tleunak malte hman ka ngah lo; Misenpi hmaiah ding tahrat in bomnak ka dil.

²⁹Ka aw cu hramlak ih cinghnia le sumbuh ai bangin, Riahsia le lunglengza aw a si.

³⁰Ka vun hmuah a dum ṭheh; Khurhnat in ka na ih ka taksa cu meisa ling in a ling.

³¹Lungawinak hlasak thawm ka rak theihnak hmunah, Atu cu riahsiatnak le ṭahnak aw lawng ka thei.