Read Falam Chin JOB 31 Bible Online

JOB 31 - Falam Chin bible

JOB 31

¹Sual duhnak thawn fala zoh lo dingah siatcam in thu ka kam zo.

²Van ih um Ziangkimtithei Pathian hnenin ka covo ziangso a um? Milai hnaṭuannak parah ziangtin so ro a zem hai?

³Ṭhat lonak a tuahtu hnenah cun Siatsuah le hlohralnak a thlenter.

⁴Pathian in ka tuahmi hmuahhmuah a thei ṭheh, Ka ke kar khal a hmu ṭheh.

⁵Thuphanper in ka feh dah lo; Midang bum khal ka tum dah lo.

⁶Pathian amah in a dikmi cuai in i thlai seh, Mawhnak ka neih lo zia kha a hmu ko ding.

⁷A dikmi lamzin in ka pial ih, Thilsual tuah duhnak in i leem ih, Sualnak in ka kut ka borhhlawhter a si ahcun,

⁸Ka lo rawl siat ṭheh sehla, Ka cinmi rawl cu midang in ei ṭheh hai seh.

⁹Ka innhnen pa ih nupi cu mawi in ka hmu ih, A inn sangka lengah relh in ka bawh a si ahcun,

¹⁰Ka nupi in mipa dang hrang rawl suang sehla, Mipa dang in a ihkhun ah ihpi seh.

¹¹Cubangtuk sualnak cu a siava mi a si ruangah daan vekin cawhkuan pek ding a si.

¹²Cubangtuk sualnak cu ka neih cia mi hmuahhmuah a kang ṭhehtu Hell meisa bangtuk a si.

¹³Ka hnen-um pakhatkhat ka parah lungkim loin a phunzai a si ahcun, A simmi ṭhatein ka ngaihsak ding, Cule diktein a parah ka nung ding.

¹⁴Cutiih ka tuah lo asile, Pathian hmai ka zoh ngam ding maw? Ka thu ṭhen ding ih a rat tikah, Ziang so ka ṭong thei ding?

¹⁵Ka nu pum sungih i siamtu Pathian cu, Ka siahhlawh pawl a siamtu Pathian thotho a si.

¹⁶Mifarah bawm ding ka el dah lo; Nuhmei pawl khal riahsia in ka ret dah lo.

¹⁷Kei rawl ka ei laiah ngakṭah farah rilrawng in ka umter dah lo.

¹⁸An hnenah pa bangtuk in ka um ih, Ka nun sung ṭhatein ka kilkhawi hai a si;

¹⁹Mi tlasam zet ka hmu ih an farah tuk ruangah hruk ding hnipuan hman an lei thei lo a si ahcun,

²⁰Ka tuurual ihsin ka lakmi tuuhmul hnipuan ka pe ṭheu. Cutin ka parah an lung a awizet ṭheu.

²¹Thuṭhennak hmunah ka neh ding ti thei in, Ngakṭah farah ka bum a si ahcun,

²²Ka baan kiak ṭheh sehla, Ka liang ihsin tlongthluh hai seh.

²³Pathian ih cawhkuan pek ka ṭih ruangah, Cubangtuk thil ṭha lo cu ka tuah dah lo ding.

²⁴Sui parah ka rinsannak ka re lo, Sui ṭha bik khal ka ring cuang lo;

²⁵Mi neinung ka si ruangah ka puar dah lo; Lennak tampi ka khawm ruangah ka puarthau dah lo.

²⁶A tleu-aw tiah ni ka bia dah lo; A mawi-aw tiah thlapi hmaiah ka kun dah lo.

²⁷Cubangtuk sualnak tuah dingah thlemnak ka tong dah keel lo; Anmah upatnak ah ka kut zaphak khal ka hnam dah lo.

²⁸Cuvek sualnak a tuahtu cu thah tlak a si; Ziangahtile Pathian a dungtun ih a hnong a si.

²⁹Ka ral pawl harsatnak an tuar tikah ka lung a awi lo; Siatsuahnak an ton tik khalah ka di a riam lo.

³⁰An thihnak ding siatcam thlacam in ka sual dah keel lo.

³¹Ka hrangih hnaṭuantu pawl in Mikhual pawl ka inn ih ka tlunter cu an thei ṭheh ko.

³²Sukso tawivak pawl ka inn ah ka riahter ih, Lamzin ah ka itter dah lo.

³³Midang cun an sual an thup tum; Asinain kei cu ka sualnak ka thup dah lo.

³⁴Mipi in ziangtin in rel ding ti ka phang dah lo; In hnihsan pang ding ti phang in innsung khalah ka khum-aw dah lo.

³⁵Ka ṭong hi zotal in in ngai lo ding maw? Siatcam in ka kam: Ka thusimmi hi kam khat hman a dik lo a um lo. Ziangkimtithei Pathian in i sawnseh. I raltu pawl in mawh in phurhnak cu Ka hmuh dingah ngan suak thei hai sehla,

³⁶Hmaihngal zetin ka liangah ka pu ding ih, Sui lukhuh bangin ka lu ah ka khum ding.

³⁷Pathian hnenah ka tuah mi hmuahhmuah ka sim ṭheh ding; A mithmai ah hngalzet in ka um ding.

³⁸Ka thlawhmi lo in i mawhthluk ih, Riahsia in a mitthli ka tlakter a si ahcun,

³⁹A khomi rawl ka ei ih, Lo a thlotu sawn rilrawng ih ka ret a si ahcun,

⁴⁰Ka lo ah sangvut le fang ai ah Hrampi le hling kho sawnseh. Job ih ṭong cu cutiin a cemta.