Read Falam Chin JOB 33 Bible Online

JOB 33 - Falam Chin bible

JOB 33

¹Curuangah Job, ka ṭong dingmi hmuahhmuah hi ṭhatein ngaihnik.

²Ka thinlung ih a ummi ka hmurka in a suak ding;

³Ka ṭongmi hmuahhmuah hi ka thinlung ih ummi thungai an si; Felte in ka sim ding.

⁴Pathian ih thlarau in i tuah ih, Ziangkimtithei ih thaw in nunnak i pek.

⁵I let hnik, i leh thei asile, Na ṭong dingmi cu ruat hnik! Ka hmaiah ding in ṭang hnih!

⁶Nang le kei cu Pathian hmaiah kan bangrep. Kan pahnih in tlaklei ih tuahmi kan si.

⁷Curuangah i ṭih duh hlah; Ka lo neh-nen ciamco lo ding.

⁸Na ṭong ka theih mi cu:

⁹“Mawhnak ka nei lo, thilṭha lo zianghman ka tuah lo; Mawh nei lo ka si ih sualnak in ka luat.

¹⁰Asinain Pathian in i do duh ruangah thu a hawl ih, a ral vekah i tuah.

¹¹Ka ke thir cikcin in a ṭeem ih Ka ke kar hmuahhmuah tla a zohhliah a si,” na ti.

¹²Asinain Job, fiangtein ka lo sim: Na palh a si! Pathian cu zovek milai hnak hman in a tumsawn a si.

¹³Ziangah so milai ih phunzainak a sawn dah lo tiah, Pathian cu na mawhthluk rero?

¹⁴Pathian cu milai hnenah atu le atu a ṭong, Asinain a ṭongmi cu zianghman ah an siar lo.

¹⁵Milai an itthat lai, an mang ah Mang le langnak in an hnenah a ṭong.

¹⁶A ṭongmi ngai dingah an hna a ongter ih a sim, Ralrinnak a simmi kha an ṭih.

¹⁷Sualnak tuah nawn lo dingah le Mi puarthau si nawn lo dingin a sim.

¹⁸Thlankhur sung a thlenter hai lo; Thihnak ihsin a run hai a si.

¹⁹Pathian in milai nun a sim tikah natnak a tuarter, An taksa pumpi in natnak a tuar.

²⁰Mi dam lo pawl cun rawl ei an hiar lo; Rawl thaw bik hman an luak a suak.

²¹An taksa a cem deuhdeuh ih An ruh lawng a taang.

²²Thlankhur an pan deuhdeuh, Mithi khua an thleng cing ding.

²³Milai ṭuanvo simfiangtu dingah, Pathian vancungmi thawng tampi lakah pakhat tal, Cuih milai bawm ding le a dikmi sim dingah a ra meen ding.

²⁴Vancungmi in zaangfahnak thinlung thawn, “Anih kha cu thlah uh! Mithi khua ih feh dingmi a si lo; Amah tlennak man hinah a um,” a ti ding.

²⁵Cutiin a taksa cu a no ding ih a cak sal ding.

²⁶Thla a cam tikah Pathian in a let ding, Lungawi in Pathian a bia ding ih, Pathian in a hrangah ziang hmuahhmuah a tluangter sal ding.

²⁷Cule anih in misenpi hmaiah, “Ka sual a si, a dik lo ka tuah, Asinain Pathian in ka nunnak i zuah.

²⁸Thlankhur feh ding i siang loih Sun khawtleu ka hmu hrih a si,” a ti ding.

²⁹Cutiin Pathian in atu le atu hna a ṭuan;

³⁰Mi nunnak cu thlankhur thleng loin a run ih, A san sungah lungawinak a pek.

³¹Curuangah Job, ka lo sim mi hi ngai aw; Daite in um awla ka ṭong hrih ding.

³²Asinain thusim ding na neih asile sim aw, ka ngai ding; Lungawite in na dik a si ka ti ding.

³³Cuti a si lo ahcun daitein um awla i ngai aw; Fimnak thu ka lo sim ding.