Read Falam Chin JOB 34 Bible Online

JOB 34 - Falam Chin bible

JOB 34

¹Nannih mifim le thuthei pawl, Ka thusimmi hi ngaihnik uh.

³Rawl cu nan tep ih a thawt le thawt lo nan thei; Nan hna in thu nan thei ih thudik a si le si lo nan thei.

⁴Na thu cu thudik a si le si lo kan hril pei; Thu ṭha a si le si lo khal kan ruat hnik pei.

⁵Job in, “Mawhnak ka nei lo; Ka parah Pathian in dingtein thu a ṭhen lo;

⁶Ziangtin so ka mawh ngai a si, tiah thuphan cu ka rel thei ding? Ka hma hi dam thei sal ding rual a si lo, Asinain sualnak cu ka nei lo,” a ti.

⁷Job vek milai nan hmu dah maw? Pathian hmuhsuamnak cu ol tein a rel; A hrangah cun tidai in tluk in a ol a si.

⁸Miṭha lo pawl thawn pawl awk a duh ih, Misual pawl thawn an feh tlang ringring.

⁹Pathian ih rualpi ṭha si hi Zianghman ṭhathnemnak a um lo, a ti.

¹⁰Nannih theihthiamnak a nei pawl I ngai uh! Pathian in thil ṭha lo a tuah ding maw? Ziangkimtithei in thil sual a tuah ngai ding maw?

¹¹Milai cu an hnaṭuan thawn kaih-aw in hlawhman Pathian in a pek, An tuahmi ziaza thawn mil-aw in an parah a thlenter a si.

¹²Ziangkimtithei Pathian cu zo ih par hmanah a ding lomi a tuah lo; Zokhal bangraan tein a zoh.

¹³Midang zotal in Pathian hnenah thuneihnak an pe maw? Leilung pumpi hi kil aw, tiah zotal in ṭuanvo an pe maw?

¹⁴Pathian in a thlarau a lak ih nunnak thaw a lak kir a si ahcun,

¹⁵Nunnak nei mi hmuahhmuah hi an thi ding ih, Minung hi leivut ah a cang sal ding a si.

¹⁶Fimnak nan neih ngaingai a si ahcun i ngaihnik uh!

¹⁷A dingmi le a nasami Pathian nan hnong a si maw? Pathian in thudik a hua, sisehla ziangtinso leilung a uk thei ding?

¹⁸Pathian in siangpahrang le hotu pawl a hnong, Santlai lo le mi ṭha lo an si ahcun.

¹⁹Pathian in mi hmuahhmuah a tuah, Zohman a thleidang lo; Uktu bawi a ṭan loih mifarah hua in milian a duh cuang lo.

²⁰Milai cu rinlopi in zanah an thi thei; Pathian in a vuakthluk ih an hlota. Micak zet khal ziangtitham loin a cemter a si.

²¹Pathian in minung lamzin a zoh, Milai ih ke kar cu a zohhliah!

²²Ziangvek thimnak a si khalle misual hmu lo dingin Pathian a phen theitu thimnak a um lo.

²³Pathian hmaiah milai feh tahrat in a thu ṭhen dingah, Pathian in tikcu khiah a ṭul lo.

²⁴Hotu pawl hnong tahratin hotu dang re dingah, Pathian in an thu zingzoi rero ta a ṭul lo.

²⁵Ziangahtile an tuahmi fate bik khal a thei ṭheh; Zan ah a hlon hai ih a siatsuah ṭheh.

²⁶Misenpi hmuh theinak hmunah misual pawl a hrem;

²⁷Ziangahtile amah an thlun duh nawn lo ih, A thukham hmuahhmuah tla an poisa nawn lo.

²⁸Anmah pawl in mifarah an tisiat ruangah an hui ih an ṭap; Mifarah pawl ih bom dilnak aw cu Pathian in a thei.

²⁹Pathian in umsan meen dingih a ruah ahcun, Zoin so an mawhthluk thei ding? A hmai a thuh ahcun milai in ziangso an ti thei ding?

³⁰Anmah uktu ah Pathian thei lo, mi-neh-nen hmang ret hman sehla, Ram sungmi pawl in ziangso an ti thei cuang ding?

³¹Job, Pathian hnenah na sualnak na phuang zo maw? Sual nawn lo dingin thu na kam-aw zo maw?

³²Ka mawhnak i hmuh hram aw, tiah na dil maw? Thil ṭha lo tuah nawn lo dingin na lung a kim zo maw?

³³Pathian ih hnaṭuannak na soisel zo hnuah, Na duhmi lo tuahsak dingah na beisei lai mawsi? Hi thu cu nangmah ruahcat ding a si, Kei ih ruahcat ding a si lo! Atu-ah na ruahnak in sim hnik!

³⁴Thu a ruat thei pawl cu an lung a kim ko ding; Ka thusimmi a theitu mifim pawl an ti ve ko ding:

³⁵Job hi thuhla thei ngah loin a rak ṭong pang a sihi! A ṭong mi hi sullam a rak nei lo a sihi! an ti ko ding.

³⁶Job ih ṭong hi ṭhateih nan ruat a si ahcun, Miṭha lo pakhat vekin a ṭong a si, ti nan hmu ko ding.

³⁷A sualnak ih tlunah dodalnak a beet ih, Kan mithmuh le kan hna theih ah Pathian a hnihsan, a hmuhsuam a si.