Read Falam Chin JOB 35 Bible Online

JOB 35 - Falam Chin bible

JOB 35

¹Job, nang in, “Pathian hmaiah mawhnak ka nei lo,” na ti hi a dikmi a si tiah na ruat mawsi?

³“Ka sual lonak hin ziangso i ṭhathnempi? Sual ningla teh kei hrangah ziang so a sawt cuang?” tiah na ti.

⁴Nangmah siseh, na rualpi pawl siseh Keimah in thu ka lo let ding.

⁵Van khi hun zohhnik! Khawdur tla khi hun zohhnik! Ziangtluk in so nang hnakin an saan?

⁶Na sual a si hmanah Pathian cu harsatnak a pe lo. Thilsual voi tampi na tuah hmanah Pathian cu a hnaihnok lo.

⁷Na dingfel ruangah Pathian ka bawm tiah na ruat mawsi? Na hnen ihsin Pathian ih haimi zianghman a um lo.

⁸Na sual ruangih a tuartu cu nangmah ih rualpi an si. Na ṭhatnak ih a bommi cu anmah thotho an si.

⁹Milai cu hremnak an tuar tikah an hui an aihram ṭheu; Runtu pakhatkhat hnenah runnak duh ah an dil ih an au.

¹⁰Sikhalsehla harnak caan ngaingai a thleng ih anmah thazaang a petu, Anmah Siamtu Pathian cu an hoih duh lo.

¹¹Ramsa le vate hnakin fimvar deuh ih in tuahtu, Pathian cu an pan duh hrimhrim lo.

¹²Bomnak duh ah an au, an ṭap, Asinain Pathian in a sawn hai lo; Miṭha lo le mihngal an si ruangah.

¹³An au rero man a um lo, Ziangkimtithei Pathian in a hmu lo; A theih khal a thei hai lo a si.

¹⁴Job, nang cun Pathian ka hmu lo na ti; Asinain thinsau zetin hngak aw, Na thuhla a hmaiah a thleng a si.

¹⁵Pathian ih thinhengnak in mi a hrem lo, Sualnak khal a poisa lo, tiah na ruat.

¹⁶Sullam nei loin na ṭong men, Na ṭong reromi ih tican ziang a si ti zianghman na thei lo.