Read Falam Chin JOB 38 Bible Online

JOB 38 - Falam Chin bible

JOB 38

¹Cule phusiing sung ihsin BAWIPA cu Job hnenah a ṭong. BAWIPA in hiti in a ti:

²Zoso na si, ka fimnak thu a el ṭohṭotu cu? Theihnak nei lopi in na tlok rero ve cu!

³Pacang vekin na timtuah in ding awla, Thu ka lo suh dingmi pawl hi i let hnik aw.

⁴Leilung ka rak seemsuah laiah nang khuiah na um? Thu na theizet ngai a si ahcun i sim hnik.

⁵Leilung hi ziangtia a si ding ti a relcattu zoso a si? A tlunih ramri tahnak zoso a zam? Na theimi a um maw?

⁶Leilung a hun dotu ṭhuam pawl ziang parah so an din? Zo in so a kilphum lung a phum?

⁷Cuih ni khawfingcat ah arsi pawl hmun khatah hla an sak; Vanmi pawl[15] cu lungawi in, an au ciamco.

⁸Leilung pum sung ihsin tifinriat a rak suah laiah, A khamtu ding kotka zo in so a rak khar?

⁹Tifinriat kha khawdur in a khuhtu le, Thimnak in a tuamtu cu Keimah ka si.

¹⁰Tifinriat hrangah ramri ka tuah ih, Kalhmi kotka sungah ka ret.

¹¹“Hi tiang lawng ra awla, hi hlei na feh thei lo; A cak zetmi na tilet pawl hinah an cawl pei!” tiah tipi cu ka ti.

¹²Job, na nun sungah ni khatkhat, ‘Khua vaang thlang aw’ na ti dah maw? ‘Khawfing cat thlang aw’ tiah thu na pe dah maw?

¹³Khawfingcat in leilung tlet dingah le, Miṭha lo pawl an relhnak hmunih va hnin suak dingah thu na pe dah maw?

¹⁴Nitlang in tlang le horkuam pawl fiangtein a langter, Puan buh mi bangin le tlak parih hmin ngannak hminkhen mi bangin a langfiang.

¹⁵Sun nitleu cu miṭha lo hrangah a tleu tuk ih, Thisen luanter ding a kham a si.

¹⁶Tifinriat tawdeng ih tipuutnak na thleng dah maw? Tipithuanthum tawdeng ah lam na leng dah maw?

¹⁷A thimzet mithi khua ih kotka le A kiltu pawl zo in an lo hmuh dah maw?

¹⁸Leilung hi ziangtia a si ti na thei maw? Na theih asile i sim hnik!

¹⁹Tleunak hi khuitawk in a ra ti na thei maw? Thimnak teh khuiinso a suah?

²⁰An fehnak ding lamzin le An kirnak ding hmun na sim thei maw?

²¹Na tarzet thlang ih leilung a seem lai ih Na rak suak zo a si ahcun na sim thei ding ka zum.

²²Vur le rial ka retnak khaan na pal dah maw?

²³Harsatnak tikcu caan hrang le Ral awknak le do awknak caan hrangah ka ret a si.

²⁴Ni a hung suahnak hmun khi na thleng dah maw? Asilole nisuahnak lam thli a rat nak na pal dah maw?

²⁵Ruah ti luannak horkuam cu zo in so a hriat? Khawri le thlisia hrangah zo in so lamzin a sial?

²⁶Milai um lonak hmun thlaler ramṭhing ah zoso ruah a surter?

²⁷Hrampi hring kho hai seh tiah Ramro le ramcaar zo in so tidai a toih?

²⁸Ruah in pa a nei maw? Daitla in hringtu a nei maw?

²⁹Zo ih pum sung ah so vur a seem? Zo ih pum sung inso tikhal a suah?

³⁰Zoin so tidai cu lungto vekah a canter ih, Tifinriat ih hmai cu a khangter?

³¹Siruk rawlṭawm khi hmun khatah na ṭem thei ding maw? Likhuk caang thum ṭemnak hri na phoih thei ding maw?

³²Arsi anmah le an caan ciar ih Suak dingin na fial thei ding maw? Ngambawm le zawltling khi lamzin na hmuh thei ding maw?

³³Van ih a ummi thil pawl thlunmi daan umzia na thei maw? Leilung ahhin thu na run neihter thei pei maw?

³⁴Khawdur khi, “Ruah in i run surh aw” tiah na fial thei pei maw?

³⁵Nimthlakau khi thu pe cila, anih in, “Na thu vekin siseh,” a lo ti ding maw?

³⁶Zoin so ciinphung vate[16] cu ti a lian ding tiah a simter? Zoin so butlak cu ruah a sur ding tiah a thanter?

³⁷Zoin so khawdur siar thei tlak in a fim? Zoso tidai run thle dingah van tikuang khi thu a pe thei?

³⁸Khawdur ihsin ruah a sur tikah Zoso leivut pawl a erh awkter ih leilung cu thir bangin a hakter?

³⁹Kiosa pawl rawl ei ding na hawl sak maw? Kiosa no rilrawng pawl an pum na puarter maw?

⁴⁰Kiosa note tla an kua sungah an um ih lungpuk sungih an relh laiah zo in so rawl a pek?

⁴¹Tlang-ak rilrawng in an vak ih An faate tla rawl duh ah ka hnen an ai tikah zo in so rawl a pek?